Urang Cam Bani peih bruk uan raok Ramưwan dahlau abih meng bruk nao ghol bol riak. Adat ini thun halei jeng brei peih ngak dalam 3 harei dahlau di tuk tame mbang mukei tame bilan eik. Harei ghol, taong abih mikva brei ngui cuk khan ao di bangsa Cam, ndua ndol hala, hala meneing, ahar, gilau…mai da-a mukkei mai sang uan raok Ramưwan haong anek taco. Urang Cam Bani dalam dom harei ini, yaom lac daok ngak mbang atah pak hlei, njauk brei ramik tukvak mai palei nao ghol bol riak raok mukkei. Ong Não Văn Sáu daok di palei Ram 2, xã Phước Nam, huyện Thuận Nam, tỉnh Ninh Thuận khan lac: " Ramưwan thun ini anek bik daok ngak bruk dalam Ban Gon jeng hu mai sang uan raok muk kei bui be".
Ngan haong baoh sang muk Trượng Thị Kim Tiên daok di palei Nho Lâm, xã Phước Nam, huyện Thuận Nam, tỉnh Ninh Thuận ye biak bui sambai tuk baoh sang hu taom mbaok uan raok Ramưwan thun ini lac 3 urang anek di muk bac tamat đại học saong duah hu bruk ngak tani tanat di Ban raya HCM. Muk Tiên bui sambai lac: " Anek taco ngak mbang hu ginup hu meda, prein yawa khang kajap...".
Thun ini, mikva urang bangsa Cam di tỉnh Ninh Thuận thei jeng sambai kayua raidiuk dak harei dak tani tanat saong kaya meda. Rilo baoh sang urang khang hatai buh jien tame ngak mbang , thau ba ilamu ky thuat tame pala drak, raong glang, salih janih phun pala, athur raong hu lagaih. Thành Tín –lac palei Cam Cuah Patih, xã Phước Hải, huyện Ninh Phước, tỉnh Ninh Thuận. Dalam palei hu labaih 1.000 baoh sang, labaih 6.000 urang saong hu dua agama Bini saong Bàlamôn. Ong Kiều Thanh Phiên, Akok palei Thành Tín khan lac, palei hu 267 ha taneh pala drak, langiu ngak padai, mikva Cam daok pala dom janih phun kein laba glong yau: Nho, medar dom janih njam patam, abih di nyu lac măng tây xanh…Langiu di kaya nong, daok hu 28 baoh sang ngak mbang pablei salih gah ngak nong hu siam lagaih. Meng patagok gah ngak nong, pablei salih, Thành Tín hu trun meng 71 baoh sang kathaot dahlau diah daok 30 baoh sang kathaot. Tuk hu tangi sua ka bruk uan raok Ramnưwan thun ini di urang Cam yau hlei, ong Kiều Thanh Phiên khan lac: " Mikva mbang mukkei bui be, thang halei ngak hamu hu padai..."
Jeng yau mikva urang Cam huyen Thuan Nam, Ninh Phuoc, mikva Cam Bini daok xã Xuân Hải, huyện Ninh Hải, tỉnh Ninh Thuận daok chreih chrai uan raok Ramưwan. Gam haong bruk ramik caga tani tanat uran raok Mukei di mikva, karja palei pak ini hu peih ngak rilo bruk ilamu, the thao bhap bini, daoh tamia…ndung bak makna siam gheih di bangsa Cam. Dom harei ini, urang jakar tỉnh jeng hu brei padang kapol nyaom mai rivang, alin pandap ka dom ong imem, acar, urang jakra bangsa Cam daok ngak bruk saong padeih hưu, dom baoh sang dalam sarak karja lac bangsa Cam dalam tỉnh. Ong Imem Dương Điệp, palei Pablap Birau, xã Xuân Hải, huyện Ninh Hải, tỉnh Ninh Thuận khan lac: "Mukkei thun ini chreih chrai jang dom thun dahlau kayua meng halei, lac dom anek kamuan nao atah palei duah hu bruk ngak tal harei mukkei gilac veik mai ba jien mai daong baoh sang, amaik ame uan raok mukkei.."
Tal melam ka 3 di Ramưwan (23/3), mikva Cam ba brah, jien, pandap panda tame sang megik piah ngak pahala, caong khin po brei salamat siam mekre. Tui yaok baoh sang kaya mbang ngui mik va brei rik tame rilo atau takik. Dom halau janeng saong bhap bini tame sang megik kakuh sampahyang dalam bilan Ramadan lilau brei palei negar, abih gauk siam mekre. Dom bruk ngak nan piah kak kajap talei jum pataom gauk, khik ramik ilamu meng kan mai di bangsa./.
Viết bình luận