Tame bruk ngak lan am meng umo 18 thun, tal urak ini bak 55 thun dalam bruk, amuk Đàng Thị Tám biak bui sambai tuk bahrau ini hu UBND tỉnh Ninh Thuận daa hu mbaok tame haong kapul ngak bruk di tỉnh tapa Negar Ma Rốc piah yaih khan ka ilamo ngak lan am di urang Cam Ninh Thuận saong hu mbaok tame mbang nyaom di Ủy ban dom rajaei Sarak 2003 di Unesco vak angan “'Ilamo ngak lan am di urang Cam di Việt Nam lac inem krung ilamo oh maong mboh, njauk khik ramik samar drah”. Nghệ nhân Đàng Thị Tám, daok di Khu phố Bàu Trúc, ban sit Phước Dân khan lac: “Tuk hu tinh daa dahlak lambaok ka dom urang ngak di Bàu Trúctabiak negar langiu hu mbaok di mbang nyaom piah Unesco pok brei angan lac inem krung ilamo…”

Maong iek nghệ nhân Đàng Thị Tám ngak lan am, khol drei meng thau hu hatai anit ranam di amuk ngan haong bruk ngak lan am. Dalam tukvak ka oh tal 10 minit, meng haluk, ia saong cuah, amuk Tám ngak salah sa bình klauk bingu. Oh hu blah bi-an, mbaik kalam,bản vẽ, bo harei harei, nghệ nhân Đàng Thị Tám gam gam ngak tabiak dom mẫu lan am bahrau. Oh deih gauk, oh ngak tui mau halei, yaok pandap lan am lac sa hatai saneng karei di gauk. Amuk Đàng Thị Tám bhian hu daa tabiak Hà Nội piah pasiam veik dom mẫu mã lan am daok lahik nao.Tapa plak tangin gheih haong hatai saneng duah ngak bahrau, gam haong jalan ngak oh hu bàn payeng, jalan am cuh lan di langiu langik hu ngak jeng bruk gheih makre biak karei di lan am Bàu Trúc: “dahlak pato hu 3 tal ngak lan am di palei…”

Nghệ nhân Đàng Thị Tám hu 10 urang anek, 4 likei, 6 kumai. Bruk ngak ka amuk mboh bui sambai di abih  lac taong abih dom anek kumei di amuk jeng tui bruk ngak lan am saong hu hatai anit ranam bruk ngak meng sit. Hu amaik drei pato ngak lan am meng tuk umo 12 thun, urak ini dom pandap lan am bo saai Đàng Thị Ngọc Ngà ngak tabiak oh lac dom pandap lan am meng kan bo daok lac dom mẫu lan am mỹ nghệ. Saai Ngà brei thau lac: meng bac megru hu brukngak lan am meng plak tangin gheih di amaik di drei bo dom pandap lan am kayua saai ngak tabiak hu tuai biak takre. “meng di tuk praong tagok dahlak mboh amaik ngak lan am paje…”

Raidiuk di palei Cam Bàu Trúc harei ini lac jalan pachreih hatai sahneng ka nghệ nhân Đàng Thị Tám ngak tabiak dom janih lan am gheih, makre. Hatai anit ranam bruk ngak lan am di dom nghệ nhân yau amuk Đàng Thị Tám hu rik daong ka ilamo Cam hadah hadai jang./.