Ngan haong urang Cam daok di Ninh Thuận, klau janih alat ragam lac: Paranưng, Ghinăng saong kadeit Saranai yau sa binah ralow darah bo rilo rai rah urang Cam kham merat khik ramik tal rai hadei. Saong sa dalam dom urang jeng daok harei harei rik daong prein yava tame bruk khik ramik nan,  lac nghệ nhân Lai Lầu daok di thôn Bỉnh Nghĩa, xã Bắc Sơn, huyện Thuận Bắc. Meng dom rik daong dalam bruk khik ramik saong pato pakai alat ragam Cam, thun 2022, ong Lai Lầu hu Akaok negar pok brei angan “Nghệ nhân ưu tú”. Khaol drei tui pang kadha vak di Minh Triều – Urang pambuak bruk haong rayo sap ndom Viet Nam di TP HCM ndom ka nghệ nhân Lai Lầu:

  Meng rilo thun ini mai, dom tal bac biak karei daok hu peih tabiak di dom sang bac di xã Băc Sơn, huyện Thuận Bắc. Tal bac kayua nghệ nhân Lai Lầu dang tabiak peih ngak ngan haong hatai caong khin daong ka rilo urang chreih takre jang dom janih alat ragam meng kan ini. Sap yava meng tal pato bac alat ragam meng kan di urang Cam oh lac hu jeng sa bruk biak karei di palei Cam Bỉnh Nghĩa bo daok lac sa jalan ngak piah khik ramik ragam ragu Cam biak gheih, biak karei ini. Adei Thuận Văn Tài anek saih tal 9, Sang bac THCS Hà Huy Tập, huyện Thuận Bắc, tỉnh Ninh Thuận khan lac:" Ong Lai Lâu hu pato khol dahlak taong ghi nang meng 14 thun..."

Tal bac oh hu kik, bàn, oh hu tapuk siphau, nghệ nhân Lai Lầu pato tacei ka dom anek saih meng dom hagait bo ong thau saong meng hatai takre alat ragam meng kan di bangsa.

Adei Mang Gôn, anek saih tal 9, Sang bac THCS Hà Huy Tập, huyện Thuận Bắc, Ninh Thuận brei thau, labaih 2 thun tui bac tal taong Ghinăng di nghệ nhân Lai Lầu; meng sa urang oh thau hagait ka bruk yuk Saranai, uak Kanhi, pah Paranưng, taong Ghinăng, urak ini adei Mang Gôn meda me-in hu taong abih dom janih alat ragam meng kan di urang Cam.

 Ndom ka bruk rik daong di ong Lai Lầu, sa-ai  Lâm Huỳnh Đô, urang jakar UBND xã Bắc Sơn, huyện Thuận Bắc, Ninh Thuận brei thau:

Daok ong Lượng Đại Vệ, Akaok Mban adat cambat tanarakun palei Bỉnh Nghĩa, xã Bắc Sơn, huyện Thuận Bắc, tỉnh Ninh Thuận ndom ka ong Lai Lầu yau  ini: " Ong Lai Lầu  hu buh prein rilo ngak bruk daong puk palei pato ghinang ka dom uaranaih"

Oh cang sa bruk daong meng sa kadung jien phun halei, Nghệ nhân Lai Lầu jeng dang tabiak peih tal pato oh mek jien, blaoh gam haong anek saih hu mbaok di grauk dom lễ hội piah taong me-in dom janih alat ragam ini… Jeng oh cang thei khan brei thau, dom anek saih duah mai tal bac di nghệ nhân Lai Lầu dak harei dak rilo, dalam nan hu gam dom dam dara palei Cam yaom lac biak jan van haong bruk ngak mbang ngak huak yaok harei.

Nghệ nhân ưu tú Lai Lầu, daok di palei Bỉnh Nghĩa, xã Bắc Sơn, huyện Thuận Bắc,  Ninh Thuận khan lac: "Drei ngak piah pandar dalam sang min mboh rilo ranaih takre bac nan ye drei pato brei..."

   Nghệ nhân Lai Lầu taong ginang, ngak ginang, blaoh pato veik ka rai ranaih umo takre alat ragam Cam jang yau sap yava di Ginang, Paranưng. Ngan haong ong, tuk sap ginang yava tagok ye mboh dalam hatai biak chreih chai, palei negar sron mbon saong mikva bui sambai. Meng rilo thun ini mai, yaok pluh likei dam jeng yau rilo nghệ nhân meng tuk hu ong Lai Lầu pato tacei ye thau pandar thau ma-in alat ragam Cam, meng nan hu nao ma-in saong duh ka bruk ngak yang ngak mebhang di urang Cam.

 Oh lac thau ngak, thau ma-in alat ragam, nghệ nhân Lai Lầu daok mong iek  alat ragam Cam lac janih pandap hu suan yava. Tuk thun umo taha, pren yava oh daok khang kadang, ong tuk halei jeng saneng tal bruk ngak habar piah pato veik ka rai rah Cam harei hadei khik ramik veik alat ragam Cam.

 Ragu ragam dalam ilamo Cam nan lac bruk pambuak pagam biak ginreih di anek manuac saong yang mebhang, langik tasik taneh riya. Dalam rai diuk urak ini di palei Cam Bỉnh Nghĩa, dom sap yava di Ginang kayua nghệ nhân ưu tú Lai Lầu ba mai nan lac sa bruk pambuak pagam karei. Nan lac bruk pambuak pagam di dom urang anek palei Cam, pambuak pagam dom urang trak hatai haong ilamo meng kan di bangsa Cam, sa bein ilamo biak gheih, mekre./.