Urang ngak Đạt Thị Nam hu ngak randap haong bruk manyim khan bai meng umo 10 thun saong menyim biak naih gheih tuk umo bak dara. Amuk Nam khan lac, marai di khan bai Mỹ Nghiệp hu njom sambo meng dom pandap hu dalam langik tasik nan ye biak gheih, mekre saong kan tabiak sambo. Khan bai Mỹ Nghiệp jeng hu dom bingu la meng kan ndung mbak ilamo bangsa, ngak jeng bruk karei jang dut saong dom pandap menyim di dom labik karei. Urang ngak Đạt Thị Nam ndem lac: “hu rilo pandap hu bingu hala biak gheih makre piah pabak ka tuai mai tal rivang iek…”

Meng hu rilo janih, khan bai Mỹ Nghiệp hu rilo urang thau tal saong biak takre. Hadei di tuk hu ba tame danak dak khik ramik, cak rok patagok palei ngak saong bruk ngak meng kan di urang Cam pambuak haong bruk peih ngak du lịch, palei menyim khan bai Mỹ Nghiệp dak harei dak pachreih hu rilo tuai mai rivang iek, duah thau, blei pandap. Taeng di  HTX Menyim khan bai Cam Mỹ Nghiệp, dalam thun 2022 dui pachreih hu labaih  8.000 mbang tuai dalam taneh ia saong dunya. Dalam tukvak ini, HTX menyim khan bai Cam Mỹ Nghiệp hu ba tabiak rilo janih pandap hu bingu hala bahrau, menyim dom blah khan siuk, khan lang di mban, kadung teik, thảm, băng đô, tamo, khan aw ngui cuk… duh ka tuai damuai mai tal Ninh Thuận. Amuk Lâm Nữ Minh – Phó Yam ndok HTX Menyim khan bai Cam Mỹ Nghiệp, ban sit  Phước Dân, huyện Ninh Phước, tỉnh Ninh Thuận ndem lac: “dalam harei roya, HTX hu peih bruk pakacah manyim khan bai ngan haong 15 urang hu mbaok tame…”

Di palei ngak lan am Bàu Trúc, dom urang ngak jeng brei tabiak mbaok rilo pandap piah duh ka tuai damuai. Hu amaik haong amuk pato ngak meng tuk daok sit, 50 thun tapa, amuk Đàng Thị Luyến jeng daok kham marat ngak saong kak kajap haong bruk ngak lan am. Amuk khan lac: bruk ngak lan am meng tangin, oh hu mban payeng saong pandar dom pandap meng langik tasik piah ngak bingu hala, nan ye yaok pandap lan am hu sa gheih mekre karei. Amuk Đàng Thị Luyến brei thau: “Meng di tuk UNESCO pok brei angan, mikva biak chreih chrai, hu kein lagaih piah cak rok patagok…”

Meng di tuk Ilamo ngak lan am di urang Cam hu UNESCO pok brei angan lac inem krung ilamo oh maong mboh njauk khik ramik samar drah, hu pabak prein khang ka palei ngak lan am Bàu Trúc cak rok patagok, jeng labik nao tal di rilo tuai damuai dalam taneh ia saong negar langiu. Dahlau di nan, piah caga ka harei ini, mikva daok di palei lan am Bàu Trúc hu pataom gauk puh ramik puk palei, tuan băng rôn, khẩu hiệu, pasram daoh tamia; peih bruk pakacah tangin gheih ngak… Amuk Đàng Sinh Ái Chi – Phó akaok UBND ban sit Phước Dân, huyện Ninh Phước, tỉnh Ninh Thuận brei thau: “Uan raok harak di UNESCO vak angan “ilamo ngak lan am di urang Ca hu vak tame angan inem krung ilamo oh maong mboh njauk khik ramik samar drah…”

Meng abih hatung hatian, dom urang ngak di palei ngak lan am Bàu Trúc saong menyim khan bai Mỹ Nghiệp daok khik ramik, cak rok patagok saong ba dom ilamo gheih makre di lan am Bàu Trúc saong menyim khan bai Mỹ Nghiệp nao grauk labik dalam taneh ia. Bruk taduan raok harak di UNESCO  vak angan “ilamo ngak lan am di urang Cam tame angan inem krung ilamo oh maong mboh njauk khik ramik samar drah” saong Harei pataom Nho - Vang Ninh Thuận thun 2023 hu maong lac jalan peih tabiak ka dua palei ngak meng kan ini yaih khan tal tuai damuai dalam saong langiu di taneh ia ka dom pandap gheih makre di urang Cam Ninh Thuận./.