Meng 5 rai ngak lan, pandap lan di sang saai Đổng Thị Mỹ Trinh daok pak palei Hamu Traok, ban sit Phước Dân, huyện Ninh Phước hu ginup janih lan meng kan saong lan mỹ nghệ. Tui bruk pablei pandap tapa mang, urak ini, pandap lan di sang saai Trinh hu mayaih khan saong hu pablei di rilo mạng xã hội.“Drei lac urang kumei dalam sang hu ilamo ngak lan rilo rai. Dahlak lac rai ka 5 paje…”

Palei Hamu Traok hu 2 hợp tác xã, 11 labik ngak lan, pablei pandap pambuak haong cak rok patagok du lich. Taphia di bruk pablei pak di labik ka tuai du lịch, urak ini dom labik ngak lan pak ini jeng pandar dom mạng xã hội piah gam mayaih khan gam pablei pandap. Kayua yau nan ye, bruk pablei pandap mboh hu mbuan lagaih. Di HTX lan am Cam pak palei Hamu Traok, taeng gah pablei pandap lan online meblah 30% dom jien mek tame di palei ngak. Ong Phú Hữu Minh Thuần, Yam ndok HTX lan am Cam Hamu Traok, ban sit Phước Dân, huyện Ninh Phước ndem lac:“Tuk mikva saong dom urang dalam HTX thau pandar kong nghe 4.0 ye kol dahlak sahaneng lac ini lac jalan ngak biak lagaih oh taeng di HTX bo mikva jeng yau nan…”

Bahrau ini, tapa danak dak mbaoh tangin pambuak bruk 3 gah, lac: Pasak daong peih bruk ngak mbang bahrau di negar – Mintri Ilamo - Công nghệ saong Liên đoàn Pablei salih - Ngak kong Việt Nam haong dom doanh nghiệp, HTX, sang pablei salih di palei ngak lan am Hamu Traok, pandap lan di palei Hamu Traok hu ba tagok sàn pablei salih online Droppii. Tiến sĩ Phạm Thị Hồng Phượng, Sang bac Đại học công nghiệp TPHCM ndem lac:“Palei ngak di kol drei hu ba tagok sàn pablei salih online nan lac sàn Droppii haong bruk yam takai nao gam di Pasak daong peih bruk ngak mbang sahneng duah jalan bahrau pakat negat, Cục cak rok  darak pasa saong KHCN urang yam takai nao gam haong drei piah ba pandap panda palei ngak lan hu tagok sàn pablei salih online tui jalan hệ thống veik abih tih saong pandap di palei ngak hu thau tal biak tantu cambaih laih.”

Meng di tuk ilamo ngak lan meng kan di urang Cam hu ba tame harak angan inem krung ilamo oh maong mboh di mata pakat negar, dom tuai mai rivang iek palei ngak dak harei dak rilo. Urak ini, palei ngak lan Hamu Traok daok pataom prein tame cak rok patagok bruk du lich rahra pambak tame inem krung ilamo oh maong mboh di mata, gam rik daong khik kajap raidiuk ka rahra, gam khik ramik hu dom siam gheih ndung bak ilamo hadah krah di urang bangsa Cam daok pak ini. Meng bruk jhul khang pandar kong nghe khau tin di mangaok mạng xã hội, pandap lan Cam hu pablei biak samar drah. Ong Nguyễn Hữu Trường, Akaok Jabat lambaok VCCI Bình Thuận – Ninh Thuận brei thau:“Daong ka dom doanh nghiệp ba dom pandap panda di drei tagok sàn pablei salih online piah daong ka bruk mayaih khan pandap panda Việt Nam, abih di nyu nan lac pandap lan di palei hamu Traok hu mayaih khan praong dalam jang, daong ka mikva saong HTX di lan Hamu Traok hu lagaih piah ba pandap lan di drei tabiak darak pasa dunya rilo jang. Meng nan, rahra Hamu Traok hu jien mek tame glaong jang meng bruk ngak lan meng kan”

Gam haong hatai anit ranam, oh padeih sahneng duah bahrau ngak tabiak pandap lan biak karei, gheih mekre di dom urang ngak lan palei lan am Hamu Traok, meng bruk daong prein di dom jabat chức năng, dom doanh nghiệp, meda lac jalan lagaih piah ka pandap lan saong ilamo ngak lan di urang Cam palei Hamu Traok dak harei dak yam atah saong diuk miat haong thun bilan./.