Thun ini lac thun ka 2, Sang bac THCS Phan Đình Phùng, huyện Ninh Phước, tỉnh Ninh Thuận peih praong bruk sang bac haniem phul. Dom mong bac di pak ini jeng hu padang ngak haong dom bruk ba drei tame atau peih akaok mong bac meng dom kadha me-in pak di labik, daong ka anek saih saong dom gru pato hu dom mong bac biak bui sambai, chreih chrai. Adei Kiều Thị Mỹ Duyên, tal bac 7A, Sang bac THCS Phan Đình Phùng, lac:“Tame thun bac, sang bac di anek hu ba tabiak bruk sang bac haneim phul. Anek mboh dom gru pato biak bui sambai chreih chrai…….” 

Daok adei Kiều Hồng Vy, anek saih tal bac 7A, Sang bac THCS Phan Đình Phùng, huyện Ninh Phước, tỉnh Ninh Thuận tuk camereip mboh huac nao bac, oh takre nao tal sang bac, min urak ini adei mboh lac yaok harei nao bac jeng biak bui sambai. Meng takre nao tal sang bac, blaoh takre bac ta-a, dom gru pato di pak ini daok kham merat ngak brei dom mong bac ka anek saih mboh biak haniem phul. Saong haniem phul dahlau di abih lac meng bruk ngak brei anek saih mboh bui sambai hu nao bac yaok harei:“Anek mboh nao bac biak bui sambai, ayut sahabat hu taom gauk ndom biai nao mai.”

Huyện Ninh Phước, tỉnh Ninh Thuận peih ngak iek bruk padang sang bac haneim phul di 9 sang bac THCS. Ninh Phước lac huyện hu urang Cam daok rilo abih di tỉnh Ninh Thuận, nan ye piah ka anek saih oh daok mboh huac, tuk padang ngak sang bac haneim phul, dom gru pato tuk halei jeng nao jaik, daong dom adei khang hatai jang, jia tame rup di drei jang tuk dang ndom biai anak tal bac. Anai Kiều Thị Huyền Trân, Gru pato sang bac THCS Phan Đình Phùng, huyện Ninh Phước brei thau: Dalam yaok mong bac, gru pato jeng sangka pato pasram ilamu ndom menyai dalam kapul nyaom piah paglaong siam mekre bruk bac ta-a. Ngak habar ngak jeng labik pato pakai bo anek saih tuk nao bac mboh biak bui sambai, kanal hadar, oh mboh hagait trak damak:“Peih ngak bruk sang bac haneim phul ye drei brei salih jalan ngak habar ka anek saih daok jaik haong drei jang….”

Cei gru Hoàng Văn Lợi, hiệu trưởng Sang bac Phổ thông Bangsa Bán Trú Tiểu học, THCS Ngô Quyền, huyện Bác Ái, tỉnh Ninh Thuận brei thau, tui bruk di anak meta bo yaok palei padang sang bac haneim phul di dom pakat bac karei di gauk, min dom kadha praong abih lac brei hu anit ranam, salamat, iek praong gauk. Kadha nan hu meng hatai anit ranam di cei gru, anai gru saong bruk pambuak gauk di baoh sang, di sang bac: “Camereip abih lac bruk taduan raok di dom gru pato ngan saong dom adei, nan lac bruk bui sambai taduan raok, peih ngak dom bruk, dom kadha me-in meng kan di bhap bini. Dom bruk ngak, tapa kadha me-in bo bac piah ka dom adei gam bac, gam bui sambai mai bac, piah dom adei mboh lac yaok harei tal sang bac lac sa harei bui sambai di dom adei”

Thun bac ini, tỉnh Ninh Thuận ba tabiak haong gauk 2 danak dak, danak dak klak 2016 ngan saong dom tal bac 5,9,12 saong danak dak phổ thông bahrau 2018 ka dom dom tal bac daok veik. Anek saih hu ba drei tame rilo jang, hu tacei jalan ka bruk ngak aval jang, bruk pato pakai jeng lagaih haong sang bac haneim phul bo Gah pato Megru tỉnh Ninh Thuận ba tabiak pak di dalam thun bac ini. Ong Nguyễn Anh Linh, Phaok Yam ndok Sở Pato Megru tỉnh Ninh Thuận brei thau:“Sở Pato Megru pambuak haong Mintri Pato Megru hu tacei pato, peih pato pasram ka dom sang bac padang ngak sang bac haniem phul, ngak habar ka taong abih dom sang bac brei khik hu dân chủ, siam mekre dalam talei pambuak bruk, dalam taom gaok, ndom menyai nao mai piah ba siam lagaih di abih ka anek saih, urang jakar, gru pato ba gauk hu mbaok tame piah hu jak jeng siam mekre di abih dalam bruk pato saong bac”

Sở Pato Megru tinh Ninh Thuận hu tabiak harak tacei pato dak padang sang bac haneim phul di dalam tỉnh, dalam nan, brei biak caik hatai tal bruk dak padang sang bac haneim phul di dom puk palei bhum ceik, bhum urang bangsa takik, saong hatai caong pambak tabiak bruk ba akaok nao dahlau di urang dang akaok dom sang bac, halan hatian salih bahrau piah ba mai haneim phul ka anek saih. Piah ka yaok harei nao tal sang bac ngan saong dom adei, biak lac sa harei bui sambai./.