Kadha vak "Pambuak pagam inem krung piah patagok du lịch bhum urang Cam" di urang pambuak bruk Minh Triều hu daong ka mikva saong taong abih gauk thau cambaih jang:

Sa-ai Hán Thị Kim Sương daok di palei Cam Hậu Sanh, xã Phước Hữu, huyện Ninh Phước mboh biak chreih chrai tuk mbang camereip hu pato pasram bruk pambak tame inem krung ilamu Cam piah cakrok khang kajap haong bruk hu mbaok di bhap bini, kayua Hội đồng Anh pambuak bruk haong Pasak ilamu Cam Ninh Thuận peih tabiak. Tal bac hu 35 urang, mai meng palei ngak lan am  Bàu Trúc, palei menyim khan bai Mỹ Nghiệp saong dom palei hu bimaong kalan Cam. Sa-ai Hán Thị Kim Sương khan lac: "Tuk hu tame tal pato pasram, adei mboh biak siam lagaih piah ka drei hu pabak ilamu…"

 Langiu di bruk hu tacei pato dom ilamu ka patagok bruk ravang iek puk palei, bhap bini, dom urang bac daok hu duah thau ka alat ragam meng kan di urang Cam, daoh ragu daoh bhap bini, dom ragam tamia Cam, jalan ngak tabiak sa pandap lan am, sa blah khan bai di urang ngak daok di palei ngak. Taong abih dom bruk pato pasram jeng piah daong ka rahra pandar hu siam dom inem krung piah patagok ravang iek puk palei.

Meng dom bimaong kalan Cam daok yau jiak tamo, gam haong dom rija roya meng kan hu peih ngak yaok thun, saong dom palei ngak meng kan yau palei menyim Mỹ Nghiệp, palei lan am Bàu Trúc, meyah hu peih ngak siam meda lac dom labik nao tal biak chreih chrai, piah Ninh Thuận pandar siam dom inem krung ilamu Cam cakrok bruk ravang me-in puk palei, ravang iek bhap bini. Ndom ka prein khang cakrok bruk ravang me-in puk palei hu kein laba, sa-ai Phạm Thu Nga, Hội đồng Anh brei thau:  “Gam haong bruk hu mbaok tame di bhap bini ye kol dahlak jia lac karja palei meda patagok hu dom yaom glaong meng kan, saong peih ngak hu dom bruk gam khik ramik, cakrok hu dom yaom glaong ilamu, gam daong ka bhap bini dalam palei patagok bruk ngak mbang kinh tế pambak tame inem krung ilamu di palei drei”.

Urak ini dom labik nao tal yau palei lan am Bàu Trúc, palei menyim Mỹ Nghiệp yaok harei hu labaih 300 tuai mai ravang iek. Daok bimaong Pô klong Girai, yaok thun dui pachreih hu jaik 120 rabau tuai. Mai tal Ninh Thuận, tuai hu thau ka raidiuk di urang Cam haong rilo adat cambat meng kan saong hu ba drei tame bruk ngak mbang ngak huak yaok harei di urang Cam Ninh Thuận. Di palei lan am Bàu Trúc, langiu di bruk ngak lan oh hu bàn payeng ye bruk mek haluk lan ngak lan am saong ilamu am cuh langiu langik jeng biak gheih, ngak ka tuai biak takre. Tuk mai tal palei lan am Bàu Trúc, meng bruk ba tangin tame ngak tapak bruk ngak lan am haong dom nghệ nhân, tuai damuai daok lac menuac daong yaih khan pandap lan am Cam Bàu Trúc tal yaok labik dalam taneh ia. Sa-ai Siêu H Riêng, sa urang tuai daok di tỉnh Gia Lai, lac: “Dalam tukvak nao ravang iek di palei ngak lan am Bàu Trúc, dahlak mboh lac hu biak rilo drap ar lac prein khang piah cakrok jeng du lịch cộng đồng. Sa dalam dom drap ar praong abih lac lan am Bàu Trúc. Tuk lan am Bàu Trúc hu Unesco pok angan lac inem krung dunya, nan lac sa prein khang biak praong meyah bhap bini Cam di palei Bàu Trúc meda pambuak haong dom labik karei atau dom nghệ nhân pambuak haong ilamu daoh tamia piah cakrok du lịch cộng đồng Bàu Trúc”.

Meng 2 thun ini mai, di palei lan am Bàu Trúc hu padang mBan du lịch bhap bini hu ginup dom kapul yau ye: Kapul taduan raok tuai, kapul mbang huak, kapul ngak lan am, kapul daoh tamia… Meng ngak gheih bo Mban du lịch bhap bini Bàu Trúc oh lac duh ka tuai mai ravang iek di palei ngak bo daok hu da-a nao parang me-in, yaih khan pandap lan am Can di rilo tinh ban dalam taneh ia. Urak ini, dom urang dalam mBan du lịch bhap bini Bàu Trúc daok pasram daoh tamia piah yaih khan rilo ilamu karei di drei, parang iek bruk ngak lan am meng kan saong pandap mbang huak Cam ka tuai ravang me-in di palei ilamu dom bangsa Việt Nam. Sa-ai Đàng Thị Ngọc Ngà, daok di Khu phố Bàu Trúc, ban sit Phước Dân, huyện Ninh Phước, tỉnh Ninh Thuận brei thau: " Meng harei Mban du lịch bhap bini palei Bàu Trúc hu padang tagok, kol adei hu tacei pato, pasram bruk ngak du lịch bhap bini…"

Pambak tame inem krung ilamu piah patagok bruk ravang me-in di dom palei Cam Ninh Thuận hu ba rilo bruk hit ngak mbang saong jien tame ka bhap bini. Taphia nan, ravang iek pambak tame inem krung daok daong khik ramik saong patagok dom yaom glaong ilamu meng kan di urang Cam Ninh Thuận.

Gam haong dom pandap du lịch urak ini daok hu di Ninh Thuận, ravang iek duah thau inem krung ilamu hu jeng sa binah oh kurang hu di tuai damuai tuk nao tal tỉnh Ninh Thuận. Inem krung ilamu Cam meyah hu pambuak pagam, oh lac daong cakrok du lịch bo daok daong ka dom palei ngak patagok, daong khik ramik saong cakrok dom yaom glaong ilamu meng kan dalam tukvak urak ini./.