Adit halei jeng yau nan, tal harei senecar, sap puac Ariya di ong Thông Đinh Phụng yava tagok di grauk palei Cam Lâm Thuận. Abih di nyu lac ragu drut drui di ong tuk puac Ariya Cam Bini di kreh melam joa, ia bulan hadah, ngin la-an, ngak ka urang pang mboh sa-uh sa-uan saong drut drui tui yaok panuac ariya yau mbuah kan ka bruk meyut meyau di dam dara Cam karei agama.
Ong Phụng brei thau, Ariya nyu ndung bak panuac pato urang kumei Cam ka adat ngak menuac tui jalan darah gah amaik yau ye Ariya Muk thruh Palei; Ariya Pataow Adat; atau Ariya Gru Pataow anek likei tuk praong tagok brei tari taring bac ta-a ka jeng menuac jeng urang. Bruk njauk biai nan lac, Ariya Cam saong Bàni lac sa kadha ndung bak hatung hatian di dam dara anit ranam gauk min oh jeng diuk jeng pasang hu.
Ong Phụng caong khin hu rilo dam dara, urang daok ranaih mai ini bac: "Harei ini Karja daok tabiak panuac ieu khik ramik Ariya di urang Cam. Kayua ngan saong urang Cam, Ariya yau sa bruk biak."
Langiu di bruk pato tapak, ong haong anek likei di drei daok ghi hình veik ngak jeng clip daoh - puac Ariya bloh ba tagok dom blah mạng xã hội, dui pachreih hu biak rilo menuac tui iek saong pachreih tui bruk ngak ini di ong.
Sa-ai Nguyễn Công Luận daok di xã Phong Nẫm, ban Phan Thiết brei thau, kayua oh hu tukvak tame bac tal pato puac Ariya di ong Thông Đinh Phụng peih di sang, nan ye sa-ai bhian tame blah mạng xã hội piah pang saong bac: "Adei biak takre ragu daoh bhap bini Cam, abih di nyu lac daoh – puac dom kadha Ariya."
Tui ong Phụng, dalam saman số, ini lac sa dalam dom jalan piah menuac sia thau hu jalan daoh, jalan puac Ariya, abih di nyu lac dam dara, urang daok ranaih.
Sa-ai Thông Đinh Chương, anek likei di ong Thông Đinh Phụng khan lac, sa-ai saong ame di drei gam haong dom urang praong thun karei dalam palei daok kuhria padang danak dak pato puac Ariya tui jalan online, ngak jeng sa kapul mangaok blah mạng xã hội piah bac online. Saong urak ini, kapul ini daok dui pachreih hu yaok pluh rabau urang hu mbaok tame.
Piah meda pato Ariya ka dam dara, urang daok ranaih, bruk camereip abih ong Phụng brei ngak nan lac pato akhar Thrah. Nan ye tuk padeih hè, ong Phụng hu peih tal pato akhar Thrah pak sang di drei brei ka dom adei sit dalam palei tame bac. Tuk dom adei vak gheih puac joi, ye ong pato puac Ariya.
Amuk Lư Thái Tuyên, Phaok Yam ndok Miuyim tỉnh Bình Thuận brei thau, dalam tuk ngak bruk haong ong Thông Đinh Phụng piah duah thau ka Ariya, oh lac ta-eng ong bo abih menuac dalam sang ong thei jeng takre daoh takre puac Ariya.
"Ong bhian peih pato puac Ariya ka dom anek kamuan dalam sang, dalam palei. Saong daok hu pato mangaok Facebook di tuk melam puac adit. Meng jalan pato di ong hu daong khik veik saong cakrok Ariya di urang Cam. Dahlak mboh lac harei hadei meda cakrok rilo jang."
Likau la ong, kol dahlak hadar miat panuac ndom di ong lac: “Tuk tabiak truh eik lipa, kan kathaot, jeng lac tuk ilamu Cam dak hu khik ramik saong patagok, tui nan, Ariya hu patoa veik meng rai ini tapa rai karei”./.
Viết bình luận