Kol drei mada mboh hu bruk bui sambai uan raok Ka tê di mikva Cam Bàu Trúc tapa kadha vak di Jasi, urang vak di rayo sap ndom VN daok di  TP.HCM:

Kol dahlak mai palei Cam Bàu Trúc dalam bui sambai chreih chrai uan raok Katê thun ini di mikva palei ngak lan klak abih bhum Đông Nam Á. Dahlau di nan, dom sang hu pataom abih prein yava piah ngak tabiak rilo pandap piah pablei ka tuai damuai mai ravang iek palei Bàu Trúc dalam dom harei Ka tê.

Langiu di bruk tual băng rôn, hala dok khan bai, pa nô, áp phích, mikva daok hu rami ramik sang danaok, tual hala dok taneh ia, puh ramik jalan mbak, puk palei ka nyu hijao, hacih, mekre. Anai Đổng Thị Mỹ Chinh, po labik ngak lan Mỹ Tiên di palei Bàu Trúc brei thau, sang drei tal urak ini tapa 4 rai ngak lan, urak ini labik ngak hu 5 urang ngak lan. Pandap ngak tabiak langiu di pablei ka tuai mai ravang iek, labik ngak lan Mỹ Tiên daok hu dom labik blei pandap tapa online. Labaih 1 bilan ini mai, sang sa-ai ieu pataom abih menuac dalam sang piah ngak tabiak rilo janih pandap haong rilo mẫu mã piah pablei ka tuai damuai saong piah parang iek dalam tuk Ka tê ini. Anai Đổng Thị Mỹ Chinh khan lac: "Urak ini adei rilo meng pablei pandap online saong jao tapa jalan bưu điện". 

  Ndaoh di nan dom baoh sang, labik ngak lan Đàng Tranh di sang sa-ai Trượng Thị Trâm jeng hu ramik veik sang danaok, labik parang iek piah caga raok tuai mai ravang me-in tuk Ka tê. Sa-ai Trâm brei thau, labik ngak lan Đàng Tranh hu tame bruk ngak meng labaih 6 bilan ini mai, min pandap pablei dak harei dak tagok. Sa-ai Trâm chreih chrai brei thau, labik di drei bahrau hu urang kakei blei 20 triệu đồng, tui nan sang hu jien blei pandap caga ka harei mbang Ka tê.

Jeng yau dom labik ngak lan karei di palei Bàu Trúc, HTX lan am Cam Bàu Trúc jeng pataom abih menuac dalam HTX piah ngak lan. Ong Phú Hữu Minh Thuần, Chủ tịch HĐQT gam lac Yam ndok HTX lan am Cam Bàu Trúc brei thau,, HTX hu padang tagok di thun 2016. Ini lac labik ngak lan praong abih di palei ngak, haong 45 urang, menuac rik pandap, menuac rik jien. Bahrau ini, dom urang dalam HTX mboh biak bui sambai tuk 2 bình lan Linga Yoni di HTX pablei to yaom hu 190 triệu đồng saong hu alin brei veik piah parang iek di Miuyim tỉnh Ninh Thuận. Ini lac 2 pandap camereip abih mek hu kỷ lục ka bruk brei mboh tapa ilamu, hatai sahneng praong dalam di urang Cam hu ngak tani tanat di abih.

 Tapa UBMT negar VN tỉnh Ninh Thuận, yaom jien pablei to yaom nan hu ba tame Kadung jien kayua urang kathaot. Ong Lê Văn Bình, Chủ tịch Ủy ban Mat tran negar Việt Nam tỉnh Ninh Thuận brei thau: "Dalam nan hu gu bình kayua mikva HTX lan am Bàu Trúc ngak biak tani tanat saong biak gheih mekre, hu chữ ký di Chủ tịch UBND tỉnh. Gu bình nan hu pablei to yaom saong gah peih bruk to yaom hu payua brei abih yaom jien pablei hu tapa to yaom. Jien ini hu ba abih tame Kadung jien kayua urang kan kathaot. Bruk ngak lan lavik saman di bhum Đông Nam Á di mikva palei lan am Bàu Trúc hu UNESCO pok angan lac inem krung ilamu oh mboh di meta njauk khik caga samar drah".

Daok tapen jalan Roya 1, ndaoh di ban Phan Rang - Tháp Chàm jaik 10km nao gah meraong, palei lan am Bàu Trúc hu jaik 400 baoh sang, dalam nan 70% rahra Bàu Trúc thau ngak lan am. Meng jien duah hu meng ngak lan, pambuak haong ngak hamu, raidiuk mikva palei Bàu Trúc dak harei dak trei sir, mbaok meta puk palei dak harei dak hadah, mekre.

 Amuk Đàng Sinh Ái Chi, Phaok akaok UB bhap bini ban sit Phước Dân, huyện Ninh Phước khan lac: "Ka tê thun ini hu rilo bruk daoh tamia, thể thao, duh pamere ka mikva dalam palei saong ka tuai damuai atah jaik mai ravang ma-in. Yaom lac mikva daok hu kan kandah, min bruk uan raok  Ka tê di urang Cam hu mikva caga ginup abih janih".

Palei lan am Bàu Trúc, ban sit Phước Dân, huyện Ninh Phước, tỉnh Ninh Thuận lac sa dalam dom palei ngak lan lavik saman abih di bhum Đông Nam Á tal harei ini jeng daok khik jalan ngak meng tangin takai. Urang ngak lan pak ini oh pandar papan payeng piah mbeik lan, bo meng dua plak tangin gheih di drei piah ngak jeng dom pandap biak mekre, hu ilamu glaong. Lan am Bàu Trúc oh pandar ging cuh bo cuh di langiu langik. Nan ye yaok pandap jeng mboh gheih mekre karei.

Ngan saong mikva Cam palei Bàu Trúc, Katê thun ini duk haong dom thun dahlau nyu biak karei jang, kayua lac harei 15/6 meng blaoh, tỉnh Ninh Thuận peih bruk taduan raok Harak di UNESCO vak angan "Ilamu ngak lan di urang Cam lac inem krung ilamu oh mboh di meta njauk khik caga samar drah''. Ini lac tuk piah yaih khan ilamu Cam  tal yaok menuac urang. Saong nyu jeng lac prein khang piah ka mikva Cam labik ini ba gauk khik bruk ngak./.