Dahlau daih, dom nghệ nhân yau amuk Trượng Thị Trâm daok di palei Bàu Trúc, ban sit Phước Dân, huyện Ninh Phước tok ngak dom janih pandap yau ye ging, gaok, jeik, pakaong…piah pandar yaok harei. Min urak ini tuk palei ngak Bàu Trúc salih tapa ngak lan am mỹ nghệ, amuk Trâm tari taring duah thau darak pasar, ngak bahrau bingu la, salih bahrau mẫu mã pandap. Amuk Trâm saong rilo urang ngak di palei Bàu Trúc uan tabuan lo tuk pandap lan am mỹ nghệ hu UBND tỉnh pachreih urang pilih ruah ngak pandap alin hadiah ka tuai da-a tuk mai tal Ninh Thuận. Amuk Trâm khan lac: "Tuk nan tok ngak lu, ngak ghing saong dom pandap pandar dalam sang, pajeng nao pablei rambah lo….”

Daok ong Phú Hữu Minh Thuần, Yam ndok HTX lan am Cam Bàu Trúc, ban sit Phước Dân, huyện Ninh Phước, tinh Ninh Thuận ye biak chreih chrai, kayau ini lac jalan ba pandap lan am Cam tal rilo bol bhap rahra: "UBND tỉnh hu sarak brei pilih ruah dom pandap di palei ngak lan Bàu Trúc piah ngak quà tặng dalam dom nyaom biai…, kol dahlak uan tabuan lo…"

Bimaong Pô klong Garai lac sa dalam dom bimaong dane angan di Ninh Thuận. Kayua yau nan ye, lan am mbeik thaik baoh bimaong Cam lac biak lagaih piah ngak pandap alin hadiah, piah yaih khan dom kiến trúc dane angan di Ninh Thuận tal tuai damuai tapa thaot binguk baoh bimaong kalan. Sa-ai Đàng Hữu Huệ, daok di palei Bàu Trúc, ban sit Phước Dân, huyện Ninh Phước brei thau: "Ngak dom pandap thaik thaok bimaong ka nyu mekre, dahlau di abih brei ngak ginup abih yau bimaong saong brei tari taring, ngak tani tanat meng mekre hu".

Meng dom pandap lan am, họa sỹ Chế Kim Trung hu caik rilo tukvak roh duah, cih dom bingu la hu sambo màu hadah tagok dom pandap lan am. Meng dua plaak tangin gheih, họa sỹ Chế Kim Trung hu cih tagok dom pandap lan am Cam saong tapa nan, yau cuk tagok blah ao bahrau ka dom pandap lan am, mboh biak mekre, dui pachreih tuai damuai. Meyah yaok bình lan Bàu Trúc hu  ngak karei di gauk ye dom bingu la hu họa sỹ Chế Kim Trung cih tagok bình jeng oh hu bingu halei yau bingu halei. 

"Drei kham merat jang piah ngak hu rilo mẫu mã jang piah ka pandap lan ini nyu mekre jang, njauk haong hatai caong di tuai blei…"

Hu thau, Sở Ilamu, Thể thao saong Du lịch tỉnh Ninh Thuận hu ba tabiak 6 janih pandap lan am, lac: Yang patuah jamo Ganesha; bình lan hu họa sĩ Chế Kim Trung cih ngak mekre, tượng Apsara; baoh lan mbeik thaik bimaong Pô Klong Garai; bình 2 quai piah ngak pandap alin ka tuai tuk mai ravang saong ngak bruk di Ninh Thuận. Sa-ai Trượng Thị Kim Thụy, nghệ nhân ngak lan di palei Bàu Trúc bui sambai brei thau, dom pandap lan am Cam di labik ini hu biak rilo janih, kol dahlak biak chreih chrai tuk tuai takre saong caik hatai jia.

 "Sang biak thau dhar phor tuai caik hatai jia saong blei pandap. Tỉnh jeng sangka kakei blei piah ngak pandap alin…"

Bol bhap rahra palei lan am Cam Bàu Trúc tuk halei jeng thau khik ramik dom gheih mekre di lan am Cam. Tuk dom pandap lan am Cam hu UBND tỉnh pilih ruah ngak pandap alin hadiah ye hu daong yaih khan pandap saong angan lan am Cam angaok darak pasar./.