Dom harei ini, urang Cam daok di dom tỉnh An Giang,  Tây Ninh, Bình Dương, Bình Phước, Ban raya Hồ Chí Minh saong rilo labiik karei daok chreih chrai caga ka bilan eik Ramadan. Ong Mohamad daok di Phường 1, Quận 8, TPHCM brei thau, dalam bilan Ramadan dom urang Islam  brei eik, oh mbang, oh menyum, oh njuk pakao, oh brei hagait tame rup…meng tuk ia harei tagok tal tuk ia harei tame, hadei di nan meng hu mbang menyum. Daok dom urang ruak kik, kumei metian, hu anek sit daok mum amaik, uranaih umo ala 15 thun…, hukum oh pacap eik.  Abih gauk kham merat ngak bruk siam, bruk pahla, oh puac mesao gauk, bo brei anit ranam gauk, jum pataom gauk, ba gauk ngak amal ibadat. Dalam bilan eik, oh brei peih bruk main sambai, daoh tamia. Harei tame bilan eik Ramadan lac harei 1 bingun bilan 9 Hijrah, min melam dahlau di harei nan, meyah mboh ia bulan ye urang Islam brei tame eik dahlau sa harei, saong harei nan hu kuhria lac harei camereip di bilan eik Ramadan. Thun ini, meyah oh mboh ia bulan, bilan Ramadan lac harei 23/3 saong eik tal abih harei 21/4 tui saka ia harei. Ong Mohamad khan lac: “ Bilan Ramadan ini phot phot siam mekre…drei ngak hasa sunat min allauh brei drei pahala”

Piah caga ka harei tame bilan Ramadan, mikva dalam palei pataom gauk biai bruk blei pandap, blei limo ngak jamuwan tuk takaih eik haong gauk di sang megik. Bruk njauk thau nan lac urang Islam oh menyum alak mbia, hukum pacang klaoh, duh sa biak trak urang Islam halei menyum alak bia.

Pandap mbang hu mikva takre dalam dom var talaih eik lac cari saong ca-pua. Ca-ri bhian hu ngak meng rilow limo, daok cà púa bhian hang jang, ma-mbeik jang cari. Langiu di nan, daok hu tung lamo. Tung lamo hu ngak meng ralow nạc, vụn haong lamek limo, hu cakak sit, srau haong amriah kalu, bot ngot, saradang, dom janih ya vi karei, dalam nan hu lisei la-ar. Sraw blaoh caik ka rilo nyu tame yavi blaoh jiah tame tung limo, bloh ba nao pambu pandiak. Caik lavik dak mesam dak bingi jang. Khin mbang tung limo, brei ba nao am atau cuh  atau cuh ka nyu tasak, bingi jang meyah mbang kiem haong njam metak, patei plak…Muk Amina daok di Phuong 15, quận Phú Nhuận, TPHCM brei thau: “Tame bilan Ramadan thei thei sambai lei, bilan eik sambai ngak pandap mbang lo, hu ngak oh nak nyu sambai oh…”

Ngan haong urang Cam Islam, suak Zakat lac sa dalam 5 paka di rukun Islam. Dalam bilan eik Ramadan, urang pataom iek veik jien ndo haong drap ar hu kandaong labaih dalam thun, blaoh suak tabiak 2,5% dom jien ndo, drap ar nan piah brei ka urang ngak amal, ibadat, urang kan kathaot. Urang muslim ngak tui hakum  nan lac ngak dom bruk siam ka dunya, mekre ka agama. Jeng hu makna lac meda taduan hu dom pahla, dom siam mekre mai haong drei dalam raidiuk. Patagok jalan diukrai siam ka dunya, mekre ka agama, saong mai meng hatai ranam urang, rilo mikva Cam kham merat klah rabha haong urang kan daman, urang oh patuah dalam bilan Ramadan. Sa-ai Abu Kubi, akok Nyaom Pahala Muslim di Ban raya HCM khan lac: “Bruk ngak pahala meng hatai min khik daong mikva urang kan…”

Eik ginup 30 harei di Bilan Ramadan bloh, urang Cam Islam mbang Roya. Roya hu mbang dalam 3 harei, meng harei 1 tal harei 3 bilan Shawwal. Ini jeng lac tuk pataom mbaok dom urang dalam sang. Yaom lac nao ngak mbang atah palei jeng kham merat veik mai palei, rivang ong muk, amaik ame, adei sa-a mikva, puk paga. Roya Edil Fitry lac dom harei biak sambai suka, urang nao ravang sirah gauk, ma-ah brei ka gauk dom hagait oh njauk hatai gauk tukvak tapa, saong sang halei jeng hu caga lisei, ahar, pandap mbang bingi piah payak tuai damuai.

Thun ini, urang Cam Islam gah Meraong caga taduan bilan eik Ramadan dalam bui sambai, chreih chrai, kayua langik lagaih, radiuk, bruk ngak mbang di mikva hu ginup meda tagok. Karja palei jeng hu tacei pato dom gah, dom pakat brei sangka daong palagaih ka mikva urang Cam Islam mbang eik bilan Ramadan dalam siam mekre, salamat./.