Ban raya HCM hu labaih 10 ribau urang Cam Islam daok caga yam tame Bilan eik Ramadan. Phường 1, Quận 8 lac labik hu rilo bhap bini Cam abih di  dalam 16 jam-ma-ah di TPHCM, haong labaih 3.000 urang daok vil val Sang megik  Jamiul Anwar. Tui Na-ep Mohamad Amin, Sang megik  Jamiul Anwar, P1, Q8, hu bruk sangka di Đảng, Karja raidiuk mbang ngui di mikva jeng yau jalan sahaneng di bhap bini dak harei dak salih birau. Min dalam thun 2023, bruk ngak mbang di mikva gaok rilo kan kandah jang yaok thun. Yaom lac yau nin, min  jaik abih mikva Cam jeng blei dom pandap Halal piah caga tame mbang eik bilan Ramadan. Thun ini, bilan Ramadan  meng harei 11/3 saka ia harei saong rah tabiak dalam 30 harei. Dalam bilan Ramadan, dom urang Islam brei eik, oh mbang, oh menyum, oh njuk pakao, oh brei hagait tame rup…meng tuk ia harei tagok tal tuk ia harei tame, hadei di nan meng hu mbang menyum. Daok dom urang ruak kik, kumei metian, hu anek sit daok mum amaik, uranaih umo ala 15 thun…, hukum oh pacap eik.  Ong Mohamad Amin daok brei thau lac:“Bilan Ramadan ini lac bilan phot phot siam mekre. Bilan alluah trun, drei ngak hasa sunat min, alluah brei ka drei hu pahala….”

Dahlau harei tame bilan eik Ramadan, mikva dalam palei pataom gauk kuhria bruk blei pandap, blei limo ngak jamuwan tuk talaih eik haong gauk di sang megik, urang Islam oh menyum alak mbia, hukum pacang klaoh. Sa-ai Sa-ly-mah daok di Phường 7, Quận 6, TPHCM khan lac: Pandap mbang hu mikva takre dalam dom var talaih eik lac cari saong ca-pua. Ca-ri bhian hu ngak meng rilow limo, daok cà púa bhian hang jang, ma-mbeik jang cari. Langiu di nan, daok hu tung lamo. Khin mbang tung limo, brei ba nao am atau cuh  ka nyu tasak, bingi jang meyah mbang kiem haong njam metak, patei plak: “Harei ini uan tabuan lo, nao brei ndap nda mai ngak ahar ngak cari…”

Ngan haong urang Cam Islam, suak Zakat lac sa dalam 5 paka di rukun Islam. Dalam bilan eik Ramadan, urang pataom iek veik jien ndo haong drap ar hu kandaong labaih dalam thun, blaoh suak tabiak 2,5% dom jien ndo, drap ar nan piah brei ka urang ngak amal, ibadat, urang kan kathaot. Urang muslim ngak tui hakum  nan lac ngak dom bruk siam ka dunya, mekre ka agama. Jeng hu makna lac meda taduan hu dom pahala, dom siam mekre mai haong drei dalam raidiuk. Patagok jalan diukrai siam ka dunya, mekre ka agama, saong mai meng hatai ranam urang, rilo mikva Cam kham merat klah rabha haong urang kan daman, urang oh patuah dalam bilan Ramadan. Ong Haji Mach Dares Samael, Quyền Trưởng Ban đại diện Cộng đồng Hồi giáo TPHCM khan lac:“Jakar Ban raya HCM hu daong brei adat ka mikva drei tame bilan eik Ramadan hu rilo siam mekre…”

Eik ginup 30 harei di Bilan Ramadan bloh, urang Cam Islam mbang Roya, ieu lac Raya Eidil Fitry. Roya hu mbang dalam 3 harei, meng harei 1 tal harei 3 bingun bilan Shawwal. Ini jeng lac tuk pataom mbaok dom urang dalam sang. Yaom lac nao ngak mbang atah palei jeng kham merat veik mai palei, rivang ong muk, amaik ame, adei sa-a mikva, puk paga. Roya Edil Fitry lac dom harei biak sambai suka, urang nao ravang sirah gauk, ma-ah brei ka gauk dom hagait oh njauk hatai gauk tukvak tapa, saong sang halei jeng hu caga lisei, ahar, pandap mbang bingi piah payak tuai damuai./.