Inegirai brei mboh ka bruk ginreih pambuak haong dalikan di urang bangsa Việt lac “con rồng, cháu tiên” Inegirai lac brei mboh ka hajan siam hangin lagaih, ngak padai hu padai, ngak tangei hu tangei. Thun sak inegirai lac thun tuk halei jeng hu urang Việt Nam maong akaok di abih kayua nyu ba mai bruk siam makre, kaya mada. Kayua yau nan ye, anek inegirai biak hu yaom glaong dalam raidiuk, ilamo, chính trị saong dalam hatai sahneng di urang Việt.

Dalam zaman bahrau ini, urang Việt jeng oh var pambuak ilamu meng kan haong urak ini, rup bingu inegirai Việt tuk halei jeng hu ngak gheih ka dom kiến trúc, hội họa, cih, sarak; anek inegirai hu pet mangaok aw kumei, hu mikva bangsa ba tame dom blah khan bai manyim meng kan.

Di palei manyim khan bai Cam Chakleng, ban sit Phước Dân, huyện Ninh Phước, tỉnh Ninh Thuận tukvak tapa duah pataom hu labaih 100 janih bingu la meng kan Cam saong daok hu pandar rilo di mangaok dom blah khan bai manyim meng tangin. Dalam nan, tok hu sang amuk Lâm Nữ Minh daok khik hu dom blah khan bai manyim hu rup binguk anek inegirai. Amuk Lâm Nữ Minh brei thau:“Sang dahlak daok khik veik dom bingu hala ka anek inegirai kayua amaik dahlak manyim saong caik veik…”

Tui amuk Lâm Nữ Minh, janih merai hu pandar piah menyim bingu hala anek inegirai hu sambo mbong, kanjik katam saong bhong maraik. Hadei di tuk manyim blaoh binguk inegirai, urang manyim meda jhik haong blah khan bai sambo mbong, pagam thaot anek inegirai di labik takai khan bai piah cuk tuk rija, roya atau tuk hu mbaok tame dom bruk praong: “Piah manyim hu sa blah dom bingu hala anek inegirau njauk buh tabiak rilo prein yava meng ngak hu…”

Piah ngak jeng dom bingu hala meng kan hu thaot anek inegirai di blah khan bai manyim, urang manyim brei yaok saong rami ramik dak yaok rabau rak marai atah saong sambo mau ka nyu njauk, piah tuk katung talei marai tame janeng manyim ka nyu njauk. Tuk manyim brei khik tangin ka nyu tani tanat piah haluak nduac samu gauk ye bruk pambuak dom sambo mau meng njauk, ginup dom bingu la meng kan. Bruk ngak biak glaih glar, min ngan haong hatai caong khik ramik ilamo siam gheih di bangsa drei, amuk Lâm Nữ Minh haong dom urang ngak dalam Hợp tác xã manyim khan bai Cam pak palei Chakleng jeng daok tari tareng, kham marat duah pataom, pasiam veik dom janih bingu hala thaot anek inegirai piah pato veik ka anek taco. Ong Phú Văn Ngòi, Yam ndok HTX jhik manyim khan bai Cam palei Chakleng, ban sit Phước Dân brei thau:“Bruk manyim khan biai hu biak rilo bingu hala meng kan. Dalam nan, hu bingu hala anek inegirai. Ini lac bingu hala kayua nghe nhan Phú Thị Mỡ duah jalan ngak tabiak…”

Langiu di nan, rup binguk anek inegirai di urang Cam daok hu mboh dalam dom adat cambat agama, adat taco bimon kalan, taneh riya saong dom blah agar bac. Thaot binguk anek inegirai oh lac hu dalam dom blah khan bai manyim meng kan bo daok hu pandar dalam bruk điêu khắc, dalam agama, adat cambat di urang Cam./.