Yaok 7 thun sa mbang, tui adat cambat, urang Cam di huyện Tuy Phong, tỉnh Bình Thuận hu peih ngak Palao Sah. Ini hu mong yau sa adat prong dalam bhap bani urang Cam. Gru Thường Xuân Hữu, Akaok Hội đồng chức sắc Bàlamôn tỉnh Bình Thuận brei thau: “Adat ini 7 thun peih ngak sa mbang. Dahlau diah kayua gaok kan kandah nan ye mikva oh peih ngak adat ini, tak thun 2023 ini meng padang peih ngak gilac Palao Sah. Adat ini biak prong, oh njauk mbuan ngak. Piah peih ngak hu adat ini njauk hu mbaok ginup abih halau janeng di dua gah Awar Ahier daok veik haong gauk, gul pataom gauk, sa panuac haong gauk ba tabiak harei bilan piah gam gauk ngak.”

Tui adat Palao Sah hu peih ngak dalam dua harei. Gah Awar padang sa kajang, gah Ahier padang sa kajang saong peih ngak adat tui agama di gah drei, min jeng peih ngak tui danak dak, ala bruk tacei ba di dom po gru.

Adat ngak Palao Sah hu peih akaok meng bruk dom ong Kapah, Paseh (halau janeng gah Ahier) peih ngak adat balih, pahacih dom labik vin taom dar mblang taneh piah ngak dat, piah palao klaak dom kadha kanjah jhak, ba mai siam mekre ka bruk peih ngak adat.   

Patui di nan, ong Ka-ing (halau janeng Cam Bàlamôn) peih ngak Rija Harei, yau lac bruk ngak khan brei ka dom po yang thau ka bruk palih ruah labik peih ngak adat jeng yau makna di bruk peih ngak.

Tamat adat ngak Rija Harei ye tal mbang dom halau janeng di dua gah Awar, Ahier peih ngak dom adat tui agama di drei. 

Taong abih dom adat jeng ba jalan ka  mikva tal bruk kakuh likau hu pren yava, angin siam hajan lagaih, phun pala tamuh siam, brei ka urang taong ikan nao tabiak tasik hu siam mekre.

Urang Cam mong adat ngak Palao Sah biak prong. Dahlau diah, jaik abih palei Cam jeng hu peih ngak, abih di nyu nan lac dom palei daok jaik tasik. Dom urang ini brei thau lac ong akaok ong kei di dom urang ini jeng diuk rai meng bruk nao tasik taong mek ikan di tasik praong. Adat ngak Palao Sah hu peih ngak di pabah lamnge nan jeng lac piah pahadar tal ong kaok ong kei meng kan saong kakuh likau daong veih ka dom urang ini ngak hu ginup hu meda.

Phaok Giáo sư, Tiến sĩ Thành Phần, urang dahlau diah dang akaok Pasak Roh duah Việt Nam saong Đông Nam Á brei thau: “Adat ngak Palao Sah hu meng kan mai, palei Cam halei jeng peih ngak (grauk palei Cam di Parang, Parik, Kraong, Pajai) min hadei mai ini lahik nao, tok daok veik dom palei Cam di bhum Kraong, huyện Tuy Phong daok ngak. Adat Palao Sah hu peih ngak di pabah lamnge (labik baoh kraong tuh trun tasik). Jalan ngak adat ini piah likau ka mikva khang tangin jap takai, angin siam hajan laghaih, pala hagait hu nan, ngak hagait hu nan. Adat ngak ini hu makna biak dalam atah, brei mboh bruk gul pataom di dua gah Awar Ahier (Bàlamôn saong Hồi giáo Bàni”.

Oh din dang lamang ndaih yau harei Katê atau Ramưwan min adat ngak Palao Sah  hu pambak gah hatai saneng biak prong dalam bhap bani urang Cam dalam huyện, ngak brei pambuak gauk catang jang bruk gul pataom di dua agama dalam bhap bani urang Cam. Sa-ai Thường Thị Mỹ, daok di palei Lạc Trị, xã Phú Lạc, huyện Tuy Phong brei thau: “Mai haong adat ini dahlak mboh biak bui sambai dalam hatai. Tapa ini, khik ramik hu adat cambat tanarakun di urang Cam ka rai rah harei hadei. Urang Cam pak ini hu dua agama, sa gah lac Bàni sa gah lac Bàlamôn bo pataom gauk veik peih ngak sa adat njauk ndom lac biak gheih.”

Urang Cam di huyện Tuy Phong hu labaih 2.000 baoh sang ngan haong 10.000 urang. Dalam dom thun tapa, gam haong bruk sangka di Đảng, Karja, rai diuk di mikva Cam di huyện Tuy Phong, tỉnh Bình Thuận hu glaong tagok di taong abih gah kinh tế, ilamo, XH.

Bruk peih ngak adat Palao Sah oh lac ba palao dom kadha oh siam, dom bruk oh patuah jamo dalam rai diuk yaok harei, dom kadha oh siam laghaih ka anek manuac bo daok lac dom panuac kadha likau brei hu rilo pren yava, angin siam hajan laghaih, ngak mbang ginup meda, rai diuk hu trei sil. Abih di nyu lac bruk gul pataom gauk, njauk hatai haong gauk di dua gah Awar saong Ahier dalam bhap bani urang Cam. Tapa nan, pambuak pakajap bruk gul pataom di dom palei Cam haong gauk./.