Phường 1, Quận 8, TP.HCM hu labaih 300 baoh sang urang Cam ngan haong 1.400 urang. Piah khik ramik panuac ndem saong akhar vak ka  bhap bini Cam, meng thun 1960 di labik ini hu peih tal pato bac baoh huroh Cam.

Dalam 5 melam yaok adit, langiu di melam suk saong melam adit, Sang megik JAMIUL ANWAR, Phường 1, Quận 8 chreih chrai sap bac meng tal bac sap huroh  Cam. Labaih 50 urang bac hu parabha jeng dua mbang, ba gauk bac, ba gauk vak akhar huroh Cam. Yaom lac tok bac dalam sa mong meteh min dom tal bac tuk halei jeng hu peih pato. Sang sa-ai Say Nap, urang Cam Islam daok di Châu Đốc, An Giang, urak ini daok di Huỳnh Văn Bánh, Phường 17, quận Phú Nhuận, TP.HCM, dua urang anek di sa-ai langiu di bac sap Viet, melam mai jeng hu nao bac sap Cam. Dom anek bik mai tal ini hu bac panuac Cam, kadha bac ngak manuac, bac piah ndom puac daok dang siam gheih haong gauk saong khik ramik ilamu bangsa drei, agama di drei. Sa-ai Say Nap brei thau:“Daok tah halei jeng  pajeng anek bik mai bac…”

Langiu di bruk pato vak huroh saong bac panuac ka anek saih Cam di Ban raya, tal bac daok hu dom urang umo taha jeng mai bac. Ong Mohamad Tah-lan Phường 1, Quận 8, TPHCM thun ini umo 69 thun min daok nao bac sap Cam yaok melam.

Tal bac ini pato hu labaih 60 thun tapa. Urak ini, tal bac hu 5 cei gru saong 2 anai gru pato. Ong Haji Mohamad Amin lac Na-ep Sang megik JAMIUL ANWAR lac sa dalam tinjuk urang pato panuac, akhar Cam labik ini. Ong Amin khan lac, bruk kan kandah di urak ini lac oh hu tapuk pato akhar Cam, dalam nan tapuk pato klak paje, urak ini tok hu 3 baoh tapuk klauk  tal bac 1-2-3, gam hu dua sap Cam saong sap Viet, hu So Pato megru Tây Ninh saong An Giang ngak tabiak.  

Dahlau diah bruk pato panuac, akhar Cam di dom cei gru, nai gru lac halan hatian. Dom thun mai, dom cei gru, anai gru  hu karja palei saong Mban Bangsa TPHCM daong 2 trieu dong yaok quý. Piah hu jien kuhria ka raidiuk, langiu tuk melam pato bac,  yaok mesup dom cei gru, nai gru daok pablei salih piah duah jien mbang cai. Glaih glar yau nan min hu pato akhar huroh Cam  ka mikva anek kamuan nan lac bruk hu pahala, haniem phol di dom cei gru, anai gru di labik ini./.