Tapa dom tal bac ini, uranaih bangsa Cam oh lac hu bac sap Cam, vak haroh Cam di bangsa drei, bo daok hu bac rilo bruk siam mekre karei dalam raidiuk. Kadha vak hu ba tagok blah web VTV5 ka “Tal bac sap Cam ka uranaih” di An Giang. Da-a mikva saong taong abih gauk tui pang.

Mangaok blah bảng mika patih lac dom talei haroh hu cih meng dom haroh klak abih di dunya, nan lac haroh dalam Koran. Ini jeng lac bruk pato pasram haroh di dom adei sit urang Cam Islam di tal bac ini. Yaok harei tuk oh ka tal bilan hè, dom adei mai ini bac hadei di tuk tamat mon bac di sang bac. Daok tuk padeih hè, dom adei mai bac harei dua jala, mesup saong biar harei, meng harei som tal harei adit, padeih harei suk lac harei jumaat. Adei Mohamat Suphi, daok di ấp Châu Giang, xã Châu Phong, ban sit Tân Châu, tỉnh An Giang khan lac:  “Yaok harei anek nao bac tuk mesup haong tuk melam anek mai ini bac haong dom sahabat. Bac coran, bac hukum Islam. Anek takre bac Koran lo.”

Dahlau daih urang Cam Islam oh pachreih anek taco nao bac, anek likei bac abih pakat tiểu học ye padeih bac, anek kumei daok di sang, takik tabiak gah langiu tui rasam di urang Cam Islam. Bruk pato bac dalam dom baoh sang rilo meng tui jalan pato meng cambuai, oh tui sa siphau halei. Tuan gru Abdul Hamit - daok di ấp Châu Giang, xã Châu Phong, ban sit Tân Châu, tinh An Giang brei thau: “Bac sap Cam jeng dreih yau gah urang Kinh, meng mầm non tagok mẫu giáo. Yaok adei meyah khin bac hu  saong cih hu sap Cam lac meng umo 8 thun tal 15, 16 thun meng bac hu, cih hu”.

Tal bac di Tuan gru Hamít tok lac sa dalam dom tal bac sap Cam di ấp Châu Giang. Ini lac dom tal bac hu pato brei saoh, oh mek jien ndo hagait. Di dom sang megik, dom adei hu bac haroh, bac koran, bac gam ilamu saman dahlau di urang Cam Islam. Thạc sĩ  Adorohiem – daok di ấp Châu Giang, xã Châu Phong, ban sit Tân Châu, tinh An Giang khan lac:  “Urak ini hu 3 tal bac. Daok caga tame bac, blaoh tal tal ka sa saong tal ka dua. Dom adei brei thau haroh, thau bagaih. Mangaok nan sa tal dom adei brei thau bac tah panak, saong bac tabiak sap yau habar ka nyu njauk”.

Daok Tuan gru Trương Trí Hùng – Đại học An Giang brei thau: “Pato sap Cam Islam dalam rahra Islam urak ini nyu biak hu makna saong lac bruk njauk ngak. Yau kol drei thau bloh, sap menyai mendom saong haroh cih lac suan yava di yaok bangsa. Bruk kol drei pato sap menyai mendom ka uranaih lac jalan piah daong ka dom adei thau iek praong saong meng nan thau khik ramik, patagok sap menyai mendom saong haroh cih meng bangsa di drei”.

Bruk khik ramik dom tal pato saong bac sap Cam yau ini, lac kham merat di abih menuac urang, meng dom Tuan gru dang pato tal dom uranaih. Yaok harei nao tal labik bac, lac yaok harei urang kak kajap haong bangsa, dalam blah khan ao, dalam sap menyai saong haroh cih karei di bangsa drei./.