Dahlau daih, di harei roya, urang Cam Islam di An Giang bhian klah rabha pandap mbang brei ka gauk. Dom sang dalam palei meda sik sa drei limo blaoh parabha brei ka gauk mbang. Ralow rilo, mbang dalam harei oh abih, nan ye rilo menuac sahneng tal bruk kaoh sit ralow, ướp gia vị tame blaoh jaih tame tung lamo, ba tual di sang ging piah mbang lavik harei. Mboh pandap camlaik bo mbang bingi, pahe gac, nan ye rilo sang jak gauk ngak. Meng nan, tung lamo hu jeng sa dalam dom janih pandap mbang di urang Cam. 

Ong Hứa Hoàng Vũ (daok hu angan ieu lac Sales) daok di palei Phũm Soài, xã Châu Phong, ban sit Tân Châu, po labik ngak tung lamo ANAS brei thau, piah ngak tung lamo, brei ngak meng ralow lamo that bahrau sik, oh mek ralow lamo ruak, matai. Mek labik ralow pha atau ralow cada piah ngak. Hadei di nan chai klik ralow haong lamek lamo, buh amriak kalu haong toi tame. Taong abih janih nan hu jaih tame tung lamo, kak jeng khúc atah jaik sa tấc. Dahlau di tuk ba cambu, mikva mek gai hu akaok haluak sit klauk tame dom tung lamo brei ia nyu sraiy tabiak langiu ka nyu samar thu. Meyah khin mbang that ye caik nyu tame tu la-an, tuk mbang ba tabiak ka nyu ralai ia patau blaoh tuk atau cuh meng khali. Tung lamo tasak nyu sraiy lamek tabiak saong pahe, bingi, yamen, langeim di ralow lamo. 

Mboh lac Châu Phong hu rilo sang ngak tung lamo pablei, min oh labik halei hu bao bì, nhãn mác. Piah padang hatai jia ka urang blei mbang, thun 2012, ong Hứa Hoàng Vũ khang hatai brei padang labik ngak saong pablei mek angan ieu lac Tung lamo ANAS. Kham merat padang angan je Tung lamo di urang Cam Châu Phong tal menuac blei mbang dalam taneh ia.

Ong Hứa Hoàng Vũ brei thau, bruk njauk biai di labik ini lac tung lamo di urang Cam hu ngak meng ralow lamo min lac drei lamo hu urang Islam sik takuai, oh blei ralow lamo di gah langiu mai ngak. Nan ye di mangaok bao bì tung lamo di ANAS jeng hu haroh Halal – lac tung hu ngak meng ralow drei lamo hu urang Islam sik, piah ka urang Islam halei jeng mbang hu.

Meng janih pandap mbang hu meng lavik saman di urang Cam, tung lamo hu jeng pandap angan je di tỉnh An Giang, thun 2019 hu UBND tỉnh pok brei angan lac 1 dalam 6 janih pandap OCOP 3 patuk camereip abih di tỉnh. Oh dang veik di sa janih pandap lac tung lamo, ong Hứa Hoàng Vũ daok hu ngak ralow lamo pandam saong jeng mek hu angan OCOP. Tal urak ini, xã Châu Phong hu 2 pandap hu pok brei angan OCOP 3 patuk. Ini jeng lac bruk bui sambai saong ngak brei hadah mbaok meta ong Vũ. Ong khan lac, tuk drei ngak tabiak pandap, hu darak pasar takre blei nan lac bruk biak bui sambai, haniem phul:  "Dahlak uan tabuan lo tuk drei ngak hu tung lamo ba tabiak pablei saong mikva biak takre blei mbang". 

Hu buh jien blei mac moc jamriak bahrau, labik ngak tung lamo ANAS daok hu jak ba rilo sang urang Cam dalam palei Phũm Xoài tame bruk ngak haong gauk. Langiu di nan, yaok harei hu 10 urang kumei Cam ngak bruk, jien bilan hu meng 4-5 triệu yaok bilan. Sa-ai Aminah, sa urang ngak bruk di labik ngak tung lamo ini hu labaih 10 thun brei thau, hu bruk ngak, hu jien bilan tani tanat kuhria ka raidiuk.

" Drei ngak di labik ini meng harei camereip peih tabiak. Drei lac kumei oh nao ngak atah hu, patuah hu bruk ngak jaik sang".

Meng sa pandap mbang lavik saman di urang Cam, tal urak ini, tung lamo – janih pandap mbang angan je di urang Cam Islam tỉnh An Giang hu menuac sia dalam taneh ia thau tal saong blei mbang. Urang Cam di Châu Phong sanya lac tuk halei jeng khik kajap chất lượng di tung lamo  piah ka rilo tuai atah jaik dak harei khin mai tal bhum taneh Châu Phong saong An Giang piah mbang janih pandap mbang bingi ini./.