Labik padeih takai camereip abih tuk tuai mai tal palei Phũm Soài lac labik ngak ahar ko am di sa-ai Rofiah. Labik ngak ko am tuk halei jeng dui pachreih hu tuai mai ravang, mai mbang iek janih ahar biak karei ini. Sa-ai Rofiah brei thau: ini lac bruk ngak meng kan mai di sang drei, lac janih ahar di urang Cam, nan ye sa-ai tuk halei jeng khin yaih khan tal tuai damuai.

“Ahar ini ngak meng brah, saradang, la-u. Lac ahar di urang Cam. Hu tuk gaok pandiak ngak brei ahar nyu tasak, pahe, bingi”.

Tok buh tabiak 10.000 đồng jien Việt Nam, tuai hu ba drei tame ngak iek ko am di urang Cam Islam. Urang eng drei jaok tapung, tuh tagok khali pandiak, gum veik meng tuk gaok pandiak. Blaoh cang ahar tasak saong bui sambai mbang iek baoh ha ko am pandiak pahe bingi kayua drei ngak tabiak meng tacei pato di sa-ai Rofiah – urang gak ahar dane angan di palei Phũm Soài.

"Rilo taneh ia lo. Ý, Anh, Đức, Canada, Bỉ… Bhian di nyu lac harei senecar, harei adit, harei som, harei ngar tuai mai tal ini. Mai ravang iek, mbang ko am. Tuai takre lo. Nao sa kapul 30 – 40 urang. Hu kapul hu tal  70 – 80 tuai" ,Rofiah  khan veik.

Labaih sa thun ini mai, sạp pandap sit tapen jalan anak sang di sa-ai Rofiah tuk halei jeng hu tuai du lịch dalam taneh ia saong langiu dunya mai ravang iek. Sa-ai bui sambai lo, kayua lac ahar ko am meng kan di urang Cam Islam hu tuai tah jaik biak takre, bo bruk ngak ahar ko am di urang Cam Islam jeng hu peih praong tuk sa-ai haong jaik pluh baoh sang dalam palei pambuak rahra dalam palei, ba gauk peih tour du lịch, brei ka tuai thau hu dom inem krung gheih mekre di urang Cam Islam yau ye: mbang huak, palei ngak meng kan, sang megik, sang klak, daoh takơ bhap bini…

Tuai urang takre. Tuai Prang, tuai Yuan jeng mai ini. Urang mboh camlaik urang tame ndok ngak iek drei jeng brei ngak. Ahar tasak mboh mekre urang jeng takre. Urang lac laik 1. Drei uan tabuan kayua ilamu di urang Cam hu urang thau tal rilo. Tuai Prang daok di labik menyim, labik ha ko am jeng nao haong gauk, nao halei urang jeng nao haong gauk.

Menyim khan sarong di urang Cam Islam lac sa bruk ngak hu meng yaok ratuh thun. Yaok blah sarong menyim tabiak mai meng biak rilo prein yava buh tame, yau ye taro marai, nhuộm sambo, lai sambo, ngak jeng bingu la, nga-ngeh, manyim… Urak ini, bruk ngak ini tok hu labik menyim di sang ong Mohamed daok di palei Phũm Soài brei ka tuai maong iek, duah thau.

Meng hatai anit ranam bruk menyim meng kan, caong khin khik hu bruk, sang ong Mohamad brei padang “labik menyim khan sarong palei Cam”. Piah yaih khan dom gheih mekre di bruk menyim khan sarong Châu Phong, tuai mai tal ini oh lac hu duah thau bruk menyim - ngak khan sarong di urang Cam, bo pak di labik menyim ini, sang ong Mohamed daok hu caik sa bilik sit ngak jeng bilik lakhah tui adat cabat di urang Cam Islam. Tuai mai tal, meda cuk ngui khan ao Cam Islam piah ngak jeng pangin tin lakei, pangan tin kamei.

Gam haong duah thau bruk menyim khan sarong, tuai daok hu pang urang khan brei thau ka raidiuk siam mekre di drei… thau hu ilamu di bhap bini dom bangsa adei sa-ai daok diukrai mangaok bhum taneh hình chữ S! Bruk ini hu ong MoHaMad sahneng tabiak saong ba tame tour du lịch “Sa harei ngak urang Cam Châu Phong”. Ong Mohamad khan lac:

“Urak ini, hulin daok sahneng jang tal bruk du lịch tui jalan ngak lac du lịch bhap bini. Nan lac kham merat daong ka dom sang pak ini hu mbaok tame ngak. Pagap yau hulin ngak labik menyim blaoh, mapein lin urang ngak ahar atau ngak hagait nan. Blaoh ramik ngak veik dom baoh ginang dahlau daih. Labik ini hulin hu sa urang ngak tung lò mò.. Jeng pambuak gauk ngak di labik ini. Nyu jeng ngak tabiak hagait nan bahrau ka tuai du lịch. Patagok du lịch bhap bini gam lac ba jien tame ka mikva, gam khik ramik inem krung ilamu di ong muk caik veik”.

Yaom lac bahrau peih tour meng kreh thun 2023, hadei di tuk adat cambat dalam rai anek menuac saong bruk menyim khan sarong di urang Cam Islam xã Châu Phong hu vak angan tame inem krung ilamu phi vật thể pakat negar, min tour “sa harei ngak urang Cam Châu Phong” hu taduan raok labaih 2.000 mbang tuai dalam taneh ia saong mangaok dunya.

Ba gauk ngak, ba gauk hu kein laba, ba gauk patagok bhap bini, ba gauk khik ramik ilamu di muk kei caik veik! – hatai sahneng nan hu daong ka bhap bini dom bangsa takik di taneh ia drei jum pataom gauk jang, pabak prein khang jang piah patagok inem krung di muk kei, ngak ka inem krung jeng jien ndo. Saong urang daok ngak hu bruk nan, daok dak harei dak pambak tabiak ilamu Việt Nam tal dunya./.