Thun  ini, mikva urang bangsa Cam di tỉnh Ninh Thuận thei jeng bui sambai kayua raidiuk dak harei dak tani tanat saong kaya meda. Rilo baoh sang urang khang hatai buh jien tame ngak mbang, thau ba ilamu ky thuat tame pala drak, raong glang, salih janih phun pala, athur raong hu lagaih. Thành Tín –lac  palei Cam Cuah Patih,  xã Phước Hải, huyện Ninh Phước, tỉnh Ninh Thuận. Dalam palei hu labaih 1.000 baoh sang, labaih 6.000 urang saong hu dua agama lac Bini saong Bàlamôn. Palei Cuah Patih hu 267 ha taneh pala drak, langiu di ngak padai, mikva Cam  daok pala dom janih phun hu kein laba glong yau: nho, medar, dom janih njam patam, abih di nyu lac măng tây xanh…Langiu di kaya nong, daok hu 28 baoh sang ngak mbang pablei salih gah ngak nong hu siam lagaih. Meng patagok gah ngak nong, pablei salih, palei Cuah Patih uan raok bilan Ramưwan biak bui sambai, trei sir.  Dalam palei Cuah Patih, Ramưwan thun 2024 hu peih ngak rilo bruk ilamu, daoh tamia, padhih the thao. Abih di nyu nan lac bruk tamia di mblang palei  hu 50 urang. Muk Kiều Thị Lâm Viên – Akok Kapol urang kumei  xã Phước Hải, huyện Ninh Phước, tỉnh Ninh Thuận khan lac:“ Thun ini lac thun akaok meti tamia di mblang palei, ngak kadha ma-in bhap bin, dat blong, caoh mbang …duh ka mikva main sambai Ramưwan” 

Jeng yau mikva urang Cam huyen Ninh Phuoc, mikva Cam Bini daok di xã Phước Nam, huyện Thuận Nam, tỉnh Ninh Thuận daok chreih chrai uan raok Ramưwan. Mikva ngak rilo janih ahar, nan lac: tapei nung, tapei bilik, giraong laya, pay choh…piah da-a muk kei saong bayak tuai damuai. Gam haong bruk ramik caga mbang Muk kei tani tanat di mikva, karja palei di labik ini peih ngak rilo bruk bui sambai, daoh tamia, ma-in kadha bhap bini, daoh tamia…ndung bak ilamu di bangsa Cam. Muk Đạo Thị Che daok di palei Ram, xã Phước Nam, huyện Thuận Nam, tỉnh Ninh Thuận bui sambai lac:“ Anek taco ngak mbang hu ginup meda. Po jak jeng bilan muk bilan kei, nao tal ceik gilac veik tal thang.”

Dom harei ini, tỉnh Ninh Thuận jeng hu padang kapol nyaom mai rivang, alin pandap ka dom ong imem, acar, urang jakra bangsa Cam daok ngak bruk saong padeih hưu, dom baoh sang dalam sarak karja lac bangsa Cam dalam tỉnh. Ong Imem Từ Công Dư, Pho kaok Hội đồng Sư cả Bani tỉnh Ninh Thuận brei thau:“ Thun ini hu rilo bui be, anek kamuan di mikva drei praong tagok nao ngak mbang tah hu jien padai, Ramưwan mai tal gilac veik mai daong baoh sang drei payak muk kei.”

Dom bruk peih ngak dalam dom harei Ramưwan lac piah pambuak khang kajap bruk jum pataom, daong gauk khik ramik ilamu siam mekre meng kan mai di bangsa./.