Dalam dom harei akaok thun bahrau sak inegirai thun 2024, labik manyim khan bai meng kan Mohamad di palei Phũm Soài, xã Châu Phong hu raok rilo tuai negar langiu mai tal, rivang iek dom pandap manyim khan bai meng kan di urang Cam. Ini lac labik manyim duy nhất di Châu Phong daok ngak bruk ngan haong labaih 10 kik manyim, dalam nan hu kik manyim klak hu meng yaok ratuh thun.

Ong Mohamad lac po labik manyim khan bai ini. Lac urang anek di palei Cam, daok tui bruk manyim meng ame amaik, ong Mohamad biak abih hatung hatian haong bruk manyim hu meng yaok ratuh thun di palei Cam. Ong Mohamad brei thau, bruk manyim khan bai di urang Cam dahlau deih jeng ngak meng tangin, meng njom, cuk tasi, tame cako saong manyim jeng khan, abih di nyu nan lac ngak tabiak bingu hala tapak di mangaok kik manyim. Bruk njauk biai dalam ilamo njom meng kan lac sambo mau biak hadah makre bhian hu mek meng phun kayau dalam glai:“Jalan njom khan bai dahlau deih biak kan kandah, tukvak njom biak suai…”

Dom pandap manyim jeng kak kajap haong raidiuk yaok harei di mikva yau aw, khan ma-aom, xà rông .. haong dom sambo mau saong bingu hala yau baoh haluak, gom lồng đèn, kẻ sọc, ô vuông… Min meng dom thun 2000 mai ini, meng bruk cak rok patagok di pandap ngak kong, dom pandap manyim meng mac tabiak rai, hu yaom lap daok salih ka bruk manyim meng tangin.

Meng hatai anit ranam bruk manyim meng kan, caong khik hu bruk ngak, saai Safinal haong ame di drei lac ong Mohamad hu padang “labik manyim khan bai meng kan di palei Cam”. Dom pandap yau khan ma-om, xà rông… menyim tabiak di pak ini hu pablei di rilo labik dalam TPHCM, Sóc Trăng, Trà Vinh, pablei tapa Malaysia, Indonesia, Campuchia…

Piah brei mboh bruk gheih mekre di khan bai Châu Phong, saai Safinal hu ngak brei labik manyim khan bai jeng labik rivang ma-in, du lịch. Tuai mai tal ini hu thau ka bruk manyim meng ka, gam daok la manyim, hu duah thau adat cambat di urang Cam. Abih di nyu nan lac hu cuk dom blah khan aw di urang Cam. Saai Safinal brei thau:“Tuai mai pak ini meda hu pah dom blah khan aw ngui cuk piah jeng urang Cam…”

Labik manyim Mohamad daok hu ba bruk ngak tani tanat ka yaok piluh urang kumei Cam haong jien mek tame meng 4-6 triệu đồng yaok bilan. Hu bruk ngak, hu jien mek tame, nan ye dom urang menyim hu jalan khik ramik bruk ngak. Saong bruk hu makna praong abih lac hu patoa veik hatai anit ranam ka rai ranaih. Sa-ai Marinal, lac urang menyim  bui sambai khan lac:"Tuk saai taha nao, piluh thun atau dua piluh thun tra jeng brei hu menuac patui bruk. Hadei di ini, saai meda pato bruk ngak ka anek, kayua saai anit ranam bruk ngak, kak kajap haong bruk ngak dua piluh thun ye, nan ye njauk pato ka anek kamuan di drei. Saai biak khin ka bruk ini hu tagok, tuk halei jeng khin lac hadei di ini hu rilo sang gam anit ranam bruk manyim saong daok tui bruk manyim".

Meng dom kham marat oh padeih, bruk manyim khan bai meng kan di urang Cam Châu Phong hu Mintri Ilamo - Thể thao saong Du lịch pok brei angan lac Inem krung ilamo oh mboh di mata pakat negar. Ini lac bruk hadah mbaok mata ngan haong urang Cam, lac jalan piah ka kanja palei iek praong bruk khik ramik inem krung ilamo bangsa. Ong Huỳnh Thanh Duy, urang jakar UBND xã Châu Phong, ban sit Tân Châu brei thau:"Bruk manyim khan di urang Cam cak rok patagok kinh te hu rik tame binah halei min, min tapa bruk manyim khan bai hu ba bruk ngak ka mikva, patagok kinh tế bruk ngak meng kan, brei ka tuai thau tal bruk manyim khan bai di mikva. Kayua yau nan ye, xã hu padang jalan ngak piah khik ramik, peih praong tabiak dom labik ngak bahrau, piah ba bruk ngak ka mikva. Gam haong nan, pok panuac ka Sở Ilamo peih rilo jang tal pato bruk ngak, daong phun jien ka mikva sahanang cak rok patagok".

Bruk manyim khan di urang Cam daok di Châu Phong bhian dang anak bruk mbuan lahik nao. Min urak ini, meng hatung hatian caong khin khik ramik bruk ngak meng kan hadah krah di urang Cam An Giang di dom urang ngak pak ini bo bruk manyim khan daok hu siam veik. Caong lac, sa harei oh atah, sap haluak di kik manyim di mikva urang Cam hu chreih chrai tagok di labik tapen kraong Châu Giang dane angan./.