Dom thun tapa, urang hu angan je lac kapul ba akaok nao dahlau, kham merat jak ba, pato pakai anek taco dalam but pajaih saong dalam puk palei tame bruk khik ramik saong patagok dom yaom glaong ilamu meng kan.

Di palei lan am Hamu Traok, ban sit Phước Dân, huyện Ninh Phước, thei jeng thau tal ong Đàng Chí Quyết, urang đảng hadah krah, urang hu angan je dalam bhap bini. Lac menuac tuk halei jeng abih hatung hatian haong ilamu bangsa drei, ong hu pathau khan bhap bini tame khik ramik saong cakrok hu siam mekre yaom glaong ilamu bangsa Cam, abih di nyu lac 2 inem krung ilamu phi vật thể “Harei Katê di urang Cam Ninh Thuận saong bruk ngak lan am meng kan di urang Cam palei ngak lan Hamu Traok”. Langiu di nan, ong haong dom nghệ nhân dalam palei hu pato bruk ngak lan ka dam dara, padang Kalup kapul tamia bhap bini Cam, khik ramik 2 tal pato Ghi năng saong megru puac Ariya ka jaik 80 urang daok ranaih umo thun. Ong Đàng Chí Quyết tuk halei jeng ndom lac, langiu di bruk padang kapul urang ranaih patui jalan dom urang rai dahlau, daok brei daong yaih khan dom siam mekre di ilamu bangsa tal tuai damuai, tapa nan, duh ka bruk cakrok du lịch di palei ngak lan Hamu Traok.

Jeng hu hatai khik ramik ilamu bangsa, ong Pi Năng Trách, daok di xã Phước Thắng, huyện Bác Ái meda lac kak kajap haong Chapi saong Mã La, nan ye ragu ragam bangsa oh kurang hu dalam raidiuk di ong. Ong tuk halei jeng sahneng duah, ngak habar ka mikva khik ramik hu ginup abih dom ilamu siam mekre di bangsa drei. Sahneng ye ngak, labaih pluh thun dahlau, ong pambuak bruk haong dom nghệ nhân dalam palei jak ba mikva khik ramik dom bộ Mã La dalam buh pajaih, dalam baoh sang, khik ramik 2 kapul Mã La haong jaik 20 urang, pato me-in alat ragam ka anek saih dom sang bac dalam huyện; tame dom kapul daoh tamia, nao parang me-in haong dom bangsa karei di Trung ương saong rilo tỉnh, ban dalam taneh ia...

Ong Trách khan lac: Ngan saong dahlak, ragu ragam meng kan di Raglai oh lac hatai takre, daok lac bruk njauk ngak di rahra. Kayua lac tuk dom yaom glaong ilamu hu khik ramik saong patagok, meda daong pato pakai ilamu meng kan, ngak brei hadah mbaok meta bangsa dalam bhap bini dom bangsa takik, meng nan, pachreih tagok hatai kham merat dalam ngak mbang, bac megru di mikva, rik prein yava tame bruk cakrok patagok taneh ia, palei negar .

Meng dom kham merat di rup drei, ong Pi Năng Trách hu Akaok negar pok brei angan Nghệ nhân ưu tú dalam gah Inem krung ilamu phi vật thể thun 2019.

Di xã Phước Hà, huyện Thuận Nam hu jaik 1.000 sang, gam haong jaik 4.000 manuac. Dom thun tapa, taphia dom labik hadah ka bruk patrun kathaot, mbaok mata puk palei salih bahrau, dom yaom glaong ilamu bangsa jeng hu khik ramik saong tagok hu siam mekre.

Meng thau cambaih ilamu meng kan di bangsa drei, urang hu angan je di xã tuk halei jeng duah jalan khik ramik ilamu siam mekre ka rai hadei, daong ka rai ranaih mboh anit ranam jang, iek praong jang saong thau khik ramik, cakrok ilamu di bangsa drei. Pagap yau ong Bà Râu Đắc, urang hu angan je di palei Giá, xã Phước Hà, meng hatai caong khik ramik hu ragu ragam bangsa anak dom ragu ragam bahrau, ong kham merat pambuak bruk haong dom nghệ nhân, dom sang bac dalam xã peih dom mbang megru pandar alat ragam ka dom kapul daoh tamia, dom kalup kapul taih Mã la. Urak ini, ong daok khik bruk pato taih Mã la ka dom anek saih di sang bac Phổ thông Bangsa bán trú THCS Phước Hà; gam haong nan, jak ba dom but pajaih, dom baoh sang khik ramik dom bộ Mã la. Meng nan tal urak ini, dalam xã daok khik hu labaih 20 bộ Mã la; dom kalup kapul daoh tamia dalam palei hu khik ramik.

Ong Tà Thía Banh, Bí thư Đảng ủy xã Phước Hà brei thau: dom urang hu angan je dalam xã langiu di bruk jak ba mikva ngak njauk tui dom sarak di Đảng, hukum di Karja, daok hu jak ba mikva patagok dom yaom glaong ilamu meng kan hadah krah di bangsa yau ye: Akhar vak, haroh cih, ragu ragam, khan ao bangsa, dom adat cambat tanarakun meng kan. Dalam thun blaoh, mikva Raglai biak uan tabuan saong chreih chrai tuk Adat uan padai bahrau hu Mintri Ilamu, Thể thao saong Du lịch ba tame angan inem krung ilamu phi vật thể pakat negar. Ini lac bruk njauk uan tabuan, rik daong tame bruk cakrok di bhum bhap bini daok di bhum ceik tỉnh Ninh Thuận./.