Bình Sơn lac labik hu rilo urang ngak, rilo urang tui agama, rilo urang bangsa takik. Mboh sa-ai A Mi Roh, akaok kapul daoh tamia di sang ilamu bangsa Cam tuk halei jeng sami samar, abih hatai haong bruk ngak, dom pakat kapul urang kumei hu da-a urang kumei daok ranaih umo ini mai ngak urang pambuak bruk ka Danak dak Patagok bruk pan akaok, khik ramik saong patagok bruk ngak, labik dang di urang kumei dalam tỉnh Đồng Nai tukvak 2016-2020.

Sa-ai A Mi Roh khan lac, sa-ai bhian nao haong dom urang jakar kapul urang kumei xã, nao tal dom labik sang trọ, sang urang kumei hu agama piah jak ba padang dom kapul urang kumei công nhân daok sang pah, kapul urang kumei agama... Lac urang hu mikva anit ranam meng lavik mai, nan ye tuk sa-ai A Mi Roh pathau khan ka kein laba di bruk hu mbaok tame dom kapul urang kumei daok sang pah, kapul urang kumei hu agama, rilo adei sa-ai chreih chrai hu mbaok tame. Tukvak nan, sa-ai haong kapul urang kumei xã jak ba hu 12 kapul urang kumei daok sang pah, kapul urang kumei hu agama, rik daong jhul tagok bruk di urang kumei dalam palei dak harei dak cakrok.

Jeng meng bruk sami samar, abih hatai jai, dalam tukvak ini, urang kumei Cam daok ranaih ini hu taduan tame ngak urang jakar ilamu di xã. Langiu dom bruk ngak di urang jakar ilamu xã, yaok harei 3 mbang, sa-ai A Mi Roh hu mbaok di Rayo papar sap di xã piah pathau khan dom jalan ngak, dom sarak di tỉnh, huyện, xã tal mikva. Meng nan, thun 2018, sa-ai hu ba tame Đảng. Sa-ai A Mi Roh brei thau: “Lac urang daok ranaih, anek kamuan di urang bangsa takik, hu tame Đảng lac bruk hadah mbaok meta, hulin uan tabuan lo, hadah mbaok meta lo. Jeng meng nan, hulin mboh lac njauk kham merat jang dalam bruk ngak saong dalam raidiuk yaok harei”.

Sa-ai daok brei thau lac, thau cambaih hu bruk ngak di urang đảng, sa-ai haong urang jakar, urang đảng di chi bộ tuk halei jeng duah thau hatai caong di bhap bini, kham merat pathau khan, jak ba, brei thau dom jalan ngak, dom sarak di Đảng, di puk palei, abih di nyu lac dom jalan ngak, dom sarak pambuak tal danak dak mblang kapal haoh Long Thành brei ka bhap bini dalam palei thau cambaih.

Thun 2019, sa-ai A Mi Roh hu ba tapa ngak Phó bí thư Đoàn dam dara xã. Ngak bruk bahrau, min dom ilamu di sa urang jakar Đoàn yau hu blaoh dalam sa-ai, kayua yau nan ye bo sa-ai tame bruk biak samar. Sa-ai bhian peih dom mbang sinh hoạt đoàn haong rilo jalan ngak piah jak ba, dui pachreih dam dara hu mbaok tame; peih dom mbang taom gaok, ndom biai nao mai piah ka dam dara brei panuac ka jalan ngak bruk di Đoàn, Hội… Meng nan, rik daong hu siam dalam bruk kapul nyaom saong bruk dam dara dalam palei. Thun blaoh, sa-ai haong Kapul urang kumei xã daok padang hu 1 dhar kapul dam dara daok sang pah saong 1 dhar kapul dam dara agama, bangsa.

Bharau ini, gam haong pakat ủy Đảng, karja, sa-ai A Mi Roh haong kapul dam dara xã kham merat pathau khan, jak ba dam dara ngak siam Hukum Nghĩa vụ quân sự; peih bruk nao ravang, alin hadiah pandap ka dom dam dara tagok jalan nao ngak lin…. Meng nan, rik daong siam tame bruk pilih ruah lin dalam xã. Piah ngak hu siam jang ka bruk ngak di drei, urak ini, sa-ai A Mi Roh daok gam ngak, gam bac Đại học ngành luật. Sa-ai daok hu mikva pilih ruah, pok ngak urang lambaok HĐ bhap bini xã Bình Sơn, vaktu 2021-2026.

Ong Hakim ĐÔ HÔ SÊN, gam lac urang hu angan je dalam bhap bini Cam xã Bình Sơn brei thau, sa-ai A Mi Roh lac sa dalam dom urang anek naih gheih di bhap bini Cam dalam xã. A Mi Roh tuk halei jeng kham merat daong ka mikva, ka puk paga, lac kreh camin hadah dalam anek kamuan urang Cam./.