Hadei di ini, khol dahlak ba mikva saong grauk ayut mai rivang dom palei Cam piah uan raok Tet hong mikva, tapa kadha vak “Xuan 2023 mai hong bhap bini Cam” di Aí Nghiêm – urang vak di Rayo sap ndem Viet Nam di Ban raya HCM:

Yaok thun tet mai, xuan tal, tuk bingu mai chroh nerak kanjiak katam ye urang Cam daok di Ban raya HCM jeng chreih chrai hong uan raok bilan xuan. Diuk rai jaik haong urang Kinh yau nan ye harei Tet Nguyen dan, urang Cam jeng pachreih tui uan raok Tet. Mikva diukrai sambai hong gauk, abih di nyu nan lac uranaih, sambai ma-in Tet, angui cuk khan ao birau. Ngan hong urang prong, Tet hu nao rivang  adei sa-ai, ayut sahabat tadhau ayuh sa thun birau rilo bui sa mbai.  Urak ini, Ban raya HCM hu labaih 10 ribau urang bangsa Cam diukrai. Dom thun tapa, hu bruk sangka di Đảng saong Karja meng rilo sarak yau daong sang daok, brei mesre phun jien piah ngak mbang, mien jien bac ka anek saih bangsa takik…gam hong bruk kham merat yam tagok di mikva rik tame padang ngak dom khu pho  urang Cam dak harei dak  salih birau, ilamu bangsa hu khik ramik saong patagok. Ong Mach Dares Samael, Akok Mban Đại diện Cộng đồng Cam Islam Ban raya HCM brei thau: " Karja, dom gah di Ban raya HCM hu sangka daong brei urang Cam. Kon lin uan tabuan, likau Alluah brei ka rahra thun birau siam mekre, jap karo..."

Bruk chreih chrai uan raok thun birau nasak Tapai 2023 hu pambak tal yaok janah jalan, puk palei Cam. Ngan hong urang Cam palei Phũm Soài, xã Chau Phong, ban sit Tân Châu, tỉnh An Giang, Tet Nguyen dan oh njauk tet di urang Cam, min ba drei tame haong tet bangsa , urang Cam hu veik sa tet tra. Thei jeng bui sambai, uan raok cang mong sa thun birau  salamat saong haniem phol. Dom harei ini, dalam yaok baoh sang, yaok urang hu mai taom gauk ngak dom janih ahar, pandap mbang meng kan di bangsa piah uan raok Tet. Sa-ai Fatimah daok di palei Cam Phũm Soài, xã Châu Phong, thị xã Tân Châu, tỉnh An Giang bui sambai lac, ngan hong urang Cam, ini jeng lac tuk piah pato padar anek taco mong gilac veik sa thun tapa bruk hagait ngak hu, bruk hagait oh ka ngak hu piah thun anak kham merat jang.

 Ngan hong urang Cam daok tỉnh Ninh Thuan, meyah dom harei Ramưwan, roja roya lac brei ngak adat cambat kakuh dom po yang, ye Tet Nguyen dan  lac ma-in sambai, taom mbaok gauk gar. Thành Tín – palei Cam Cuah Patih,  xã Phước Hải, huyện Ninh Phước, tỉnh Ninh Thuận. Dalam palei hu labaih 1.000 baoh sang, labaih 6.000 urang saong hu dua agama Bini saong Bàlamôn. Ong Kiều Thanh Phiên, Akok palei Thành Tín khan lac, palei hu 267 ha taneh pala drak, langiu ngak padai, mikva Cam  daok pala dom janih phun kein laba glong yau: Nho, táo, dom janih njam patam, abih di nyu lac măng tây xanh…Langiu di kaya nong, daok hu 28 baoh sang ngak mbang pablei salih gah ngak nong hu siam lagaih. Meng bruk patagok gah ngak nong, pablei salih, Thành Tín hu trun meng 71 baoh sang kathaot dahlau diah  daok 30 baoh sang kathaot.

 Tuk hu tangi sua ka bruk uan raok Tet Nguyen dan di urang Cam yau hlei, ong Kiều Thanh Phiên khan lac: Bilan Tet njauk tuk birau yuak kuak blaoh yau nan ye urang brei alin pandap, tadhau ayuh ka gauk bui sambai. Tet mai, mikva Cam ba brah ndiuk, manuk tapa palei urang Yuan kein randap atau ayut ngak mbang pablei salih hong gauk piah alin ka gauk. Dom baoh sang hu gauk gar, anek taco daok atah mai tuk Tet hu taom mbaok huak lisei puac thun. 

 Gam hong chreih chrai raok Tet Nguyen dan, uan thun birau lac dom bruk ma-in sambai, daoh tamia. Dom hare ini, grauk bhum palei Cam, dom kumei dara, likei dam parang tamia dom ragu daoh, ragam tamia di bangsa Cam duh ka mikva hu sambai uan Xuan, raok thun birau.

Meng lavik mai, harei Tet Nguyen dan hu jeng harei roya hu makna praong dalam thun di urang Cam. Tet oh lac piah pataom mbaok gauk dalam sang bo daok lac Tet di bruk jum pataom, pambuak dom bangsa adei sa-ai haong gauk, diukrai anit ranam gauk di mangaok bhum taneh Viet Nam praong uranam./.