Tui kuhria mboh di Mentri Công an, meng akaok thun tal ini, dalam mbang tabung glaong, công an dom tỉnh ban hu nao pasang iek, duah mboh labaih  109 ribau bruk ngak suan dalam pacang khuah padam khuah, hu taong phạt hành chính jaik 10 tỷ đồng, brei padeih ngak jaik 1.200 labik. Yau nan min  tal urak ini dalam negar jeng daok hu labaih 104 ribau 500 labik mbuan khuah patuh. Dalam nan dua bal prong  lac Hà Nội daok labaih 8.200 labik, bal raya Hồ Chí Minh labaih 12 ribau 400 labik. Dalam nan HU GAM dom công trình hu tapa mbaok thẩm định, suan kayua chủ quan meng gah chức năng.

Anak meta mboh lac, bruk bhian randap dalam sinh hoạt bất cẩn di bhap bani jeng mbuan ba tal khuah patuh. Pagap yau bruk khuah di chung cư Fideco Riverview (bal raya Hồ Chí Minh) harei 18/1/2018, yaok rituh sang daok pak ini njauk srau dhau tok kayua sa baoh sang vam padam ghing gas dahlau di tuk nao tabiak truh sang; bruk khuh chung cư Parcspring (thành phố Hồ Chí Minh) harei ¼ kayua bhap bani klauk sạc dự phòng caik suai ngak kayu patuh khuah. Bruk khuah rah tabiak di biar harei 25/5 pak chung cư Fodacon, (Hà Nội) lac kayua bhap bani bất cẩn ngak brei khuah đệm… Dalam dom makna di dom mbang khuah hu brei thau ye hu labaih 50% dom mbang khuah kayua chập điện. Ong Đại Ngọc Giang, Akaok ban an toàn, Tập đoàn điện lực Việt Nam, lac: “Dom pandap pacang abih mbong thiết bị điện ngak ka nyu pandiak ralo ba tal khuah patuh kayua chạm chập điện dalam sang. Bruk ba caik dom pandap điện hu tabiak pandiak glaong yau bàn ủi, bếp điện, lò am jaik pandap mbuan khauh atau van suak phích cắm bàn ủi, kadhik, lò điện tuk pandar blaoh.  Bruk pandar  sa ổ cắm điện ka ralo thiết bị điện tapa công suất, jeng ngak ka talei điện nyu pandiak, ba tal khuah tal papaok gah lingiu ngak ka nyu chạm chập.”

Urak ini, cơ sở hạ tầng, jalan mbak  nao mai,  aia duh ka bruk padam khuah oh ka samu gauk, dom gheng aia duh ka bruk padam khuah di dom bal daok kurang, ralo labik khut oh pabak hu ia, ngak kan kandah ka bruk mek aia saong padam khuah di bol lin. Taphia di nan, kapul pacang khuah padam khuah di cơ sở tok hu tui hình thức, ngak bruk oh siam jeng lac makna ngak ka mbang khuah oh padam hu tuk akaok mereip. Thiếu tướng Đoàn Duy Khương, akaok Công an bal Hà Nội brei thau: Kapul padam khuah pak cơ sở di drei, drei iek biak prong, min biak di nyu lac biak yếu. Ralo labik tuk pasang iek jeng hu mboh caik dom bình padam khauh di nan min tuk sua tangij jalan pandar ye oh thau pandar, biak livik meng pok tabiak hu. Ngan haong tukvak dahlak pasang iek ye apui nyu mbang abih paje. Kayua yau nan ye bruk ini jeng lac bruk yếu di abih.

Di nyaom biai ka bruk pacang caga khuah bahrau rah tabiak, Phaok Thủ tướng Trịnh Đình Dũng hu ndom tal jalan saneng di sa bộ phận, gam urang pal akaok dom pakat saong bhap bani oh ka thau cambaih ka bruk ngak saong yaom glaong di bruk pacang khuah padam khuah. Bahrau caik hatai tal bruk buh jien tame ngak min oh ka sangka tal bruk pacang caga dom bruk meda rah tabiak, abih di nyu lac khuah patuh. 

      Hu jeng bhian randap, hadei di yaok sa mbang khuah prong ngak khat lahik trak tal manuac sia saong drap ar, bruk pacang khuah padam khuah di bhap bani saong dom jabat  chức năng hu jhul khang tagok, bhap bani jak gauk nao blei talei thoát hiểm, bình xịt padam khuah, trang bị cá nhân pacang caga thak độc…; dom jabat chức năng patagok bruk pasang iek, duah thau, pandar dom po đầu tư peih ngak njauk thiết kế pacang khuah padam khuah… Min abih bruk hadei di nan nyu joa nao saong oh hu xử lý tal labik tal dhua. Yaok manuac urang njauk ngak siam dom jalan ngak pacang khuah padam khuah, plaih bruk "Lahik limo meng kuhria ngak van", kayua lac tuk khauh rah tabiak ye khat lahik biak prong./.