Kiên Giang kurang ia pandar di bilan pandiak bhang

  Di huyện An Biên, jiak abih dom kraong ribaong jeng njom ia mbak, độ mbak glaong abih lac labaih 25angaok sa ribau, bhap bini oh pandar hu ia di kraong ribaong. Thun ini kayua ia mbak njom tame aval yau nan ye labaih 1.200 mikva  di xã  Nam Thái A, huyện An Biên kurang ia pandar. Tui yaok pataom di Pasak ia hacih saong vệ sinh môi trường palei pala tỉnh Kiên Giang, dalam bilan thu thun ini hu labaih 20 ribau baoh sang di 10 palei dalam tỉnh yau An Biên, An Minh, Giang Thành, Phú Quốc, U Minh Thượng v.v.. meda kurang ia pandar. Ong Hứa Văn Nôn daok palei Bảy Biển, xã Nam Thái A brei thau: “Ia pak ni pandar oh hu, pala phun kiểng anak sang pruh ia ini nyu metai abih”    

Piah langyah samar bruk kurang ia pandar di dom labik tapen tasik, kaoh pulao dalam tỉnh, Pasak brei kuac ngak hacih 8 baoh bingun klak, dalam nan hu 5 bingun di huyện Kiên Hải saong 3 bingun di Phú Quốc; pasiam veik saong peih praong nding di dom balai pabak ia yau Lại Sơn, Hòn Tre - Kiên Hải, Cửa Cạn – Phú Quốc piah ba ia pandar.

Ngan saong dom xã taphia negar, xã bhum tasik saong xã kurang ia pandar, pasak kuac ngak hacih veik 25 baoh bingun ia saong pambuak atah ống ba ia, pagam đồng hồ ia tame sang ka bhap bini piah parilo baoh sang mikva  di 17 xã tapen tasik hu ia taba pandar. Kuac 4 baoh bingun piah hu rilo ia piah caga di dom balai ia Đông Thái (An Biên), xã Cửa Cạn (Phú Quốc), xã Bình An (Kiên Lương) saong xã Minh Thuận (U Minh Thượng). Gam pakhang veik thiết bị saong brong ba ia, pasiam veik công nghệ di dom sang mac ba ia daok khut trak, salih pandap hlang ia di dom balai piah patagok công suất. Anak meta brei ba ia pandar ka 8 ribau baoh sang bhum kan kandah. Ong Phạm Văn Lùn daok di xã Nam Thái A,  birau hu Pasak ba ia hacih tame tal sang sambai lac: “Urak ini, hu ia ini ngak mbang huak, menyum jeng hu. Urakini biak sahanang, ia hu ginup, langik bilan ini pandiak oh daok huac kurang ia.”

  Ong Nguyễn Thanh Bình, Yam ndok Pasak ia hacih vệ sinh môi trường palei pala brei thau:“ Pasak hu ngak rilo jalan langiu bruk buh jien padai tame ngak labik ba ia praong daok pabak pakuan padang ia ka mikva labaih 4 ribau baoh, peih dom tal pasram jeng yau pabak pandap pandar piah padang ia pak sang ka rilo sang mikva dom palei, abih di nyu lac dom xã  kaoh pulao saong tapen tasik.”

Tuk ini kayua jit ruak Covid 19 yau nan ye tuai damuai mai Phú Quốc trun rilo duk saong dahlau daih, bruk ini jeng patrun bruk kurang ia pandar dalam bilan thu thun ini. Yau nan min, langik pandiak yau urak ini, ia di danao Dương Đông di huyện Phú Quốc yaok harei trun 5-6 cm. Tui kuhria dahlau meda pabak ia pandar tal bilan 4. Urak ini, UB bhap bini huyện daok ngak harak gar piah peih ngak danak dak peih praong veik binek ia Dương Đông puac bilan ini. Tui kuhria dahlau tal  thun 2021 ngak brei salah saong ba tame pandar công suất pabak ia khang tagok labaih 30 ribau met khoi dalam sa harei. Ta-eng binek padang ia Bãi Cây Mến di xã đảo An Sơn, huyện Kiên Hải kayua Sở Ngak nong ngak po urak ini daok samar ngak brei salah di puac thun ini. Binek padang ia Bãi Cây Mến hu yaom jien buh tame ngak lac 120 tỷ đồng, pabak ia taba ka 10 ribau bhap bini di kaoh pulao./.

Urang lang: A.Nghiêm -16/3