Uranaih njauk nao klauk jru ganap, njauk harei dom văcxin pacang caga dom ruak hu dalam danak dak klauk jru

Bruk klauk jru pacang cúm biak siam piah pacang caga jit ruak ni, kayua yau nan ye bhap bini njauk nao klauk jru pacang cúm, abih di nyu nan lac dom urang mbuan njom ruak glaong yau uranaih ala 5 thun, urang taha angaok 65 thun, urang kumei matian, urang ngak gah y tế saong dom urang ruak dom janih ruak suai lavik kayua dom urang ni mbuan njauk ruak jang.

Tui ThS.BS Nguyễn Hiền Minh - phó giám đốc y khoa pasak klauk jru pacang ruak VNVC, meng dahlau tết tal urak ni, dom menuac mai klauk dom văcxin yau ye cúm, phế cầu, sởi, thủy đậu... di pasak tagok tal 300% dut haong tukvak dahlau meng hu jit ruak.

Saai H.K.P. (34 thun, daok di Q.12, ban raya HCM) khan lac, sang saai biak suh sah hatai anak bruk njom mbak di COVID-19 nan ye abih urang dalam sang lac ong, muk, dua diuk pasang saai haong anek kumei 2 thun jeng nao tal pasak klauk jru VNVC piah klauk jru pacang caga cúm. Ruak cúm mboh dalam rup drei nyu dreih yau COVID-19 yau nan ye saai P. brei khan lac “plaih hu ruak halei ye plaih!”.

Daok saai T.A.L. (43 thun, daok di Q.Tân Phú) thau lac bruk klauk jru văcxin piah pacang caga ruak lac sa bruk hu makna biak praong. Nan ye harei 1-3 saai haong dua anek drei, sa anek 6 thun, sa anek 9 thun, nao tal pasak ni piah klauk jru pacang ruak cúm. Saai brei thau: “meng harei hu jit ruak tal urak ni, ayut sahabat di dahlak thei jeng ba anek di drei nao klauk jru pacang caga cúm. Uranaih hu prien pacang ruak biak biar, oh thau eng drei khik rup pabhap yau manuac praong yau nan ye njauk nao klauk jru pacang caga. Daok dalak pablei tạp hóa bánh kẹo, ia manyum pablei sỉ, yaok harei gaok rilo menuac, mbuan njom ruak nan ye nao klauk jru pacang caga”.

Dalam tuk jit ruak daok rah tabiak khang, dom văcxin njauk ba nao klauk dahlau di urak ini pambuak tal dom ruak kayua virus, vi khuẩn njom meng manuac ni tapa manuac daih tui jalan suak yava, trak jang di uranaih saong urang praong thun yau ruak viêm phổi, kan suak yava, nhiễm trùng darah, viêm màng não... Nan lac dom janih văcxin pacang cúm, văcxin pacang ruak phế cầu, văcxin pacang não mô cầu. Bruk klauk dom văcxin ni oh padeih di bruk pacang dom janih ruak trak bo nyu daok daong ka drei oh mbuan njauk dom ruak mayah mboh dalam rup hu dom janih dreih yau COVID-19.

Uranaih njauk nao klauk jru ganap, njauk harei dom văcxin pacang caga dom ruak hu dalam danak dak klauk jru peih praong saong dom văcxin tui umur. Jhui huac rilo ka jit ruak COVID-19 bo oh nao klauk văcxin. Min, amaik ame njauk pilih ruah dom labik klauk jru ngak siam bruk khử khuẩn, pametai anek ruak, khik siam bruk pacang caga ruak./.

Urang lang: Thu Thảo – 19/03