Tui bruk di anak meta, yaok bilan dom mbang, 30 adei saai kamei  bangsa  Sê đăng di palei Kon Pao Kram, xã Đăk Pxi, huyện Đăk Hà taom gaok gauk di  Sang rông di palei piah ginum bruk khik iek glai...Lac sa dalam dom urang kham merat haong bruk khik glai,  saai  Y Hạnh brei thau, tong abih adei saai jeng thau cambaih kein laba di glai ba mai ka rai duik, meng nan ba gauk khik iek glai.  

 “Kein laba ka drei. Khik glai piah hu ia, hu lingik tasik hajao mekre, hacih saat. Khik  glai ye adei saai  abih drei saong  jum pataom gauk ”.

Piah khik iek hu glai, 30 adei saai urang kamei palei Kon Pao Kram kakei gauk, ngak habar ka tong abih urang dalam sang pachreih tui, abih di nyu nan lac pasang likei hu pren yava saong thau cambaih jalan nao mai. Gam slut mbut, gam khang hatai dalam bruk ngak di urang haduik, urang amaik, adei saai urang kamei  Kon Pao Kram oh lac ngak brei abih menuac dalam sang mboh lac njauk, bo dok taduan hu bruk pachreih tui di tong abih  74 boh sang dalam palei ba gauk tame khik iek glai  . Saai A Thìn, sa urang  dalam plaei khan lac, tanye drei hu pang, tain drei hu thau, nan  ye biak pachreih tui bruk ngak di duik drei.

 “Urang kamei ndom ka yaom glaong di glai, makna di glai ye pasang likei khol hulin jeng thau bloh. Boh sang hulin, abih palei khol hulin jeng pachreih tui bruk ngak di dom urang kamei. Pasang likei pachreih tui abih bruk di urang kamei . Oh brei urang jah glai ngak puh.  Diuk pasang ginum biai haong gauk, dom adei saai mik va jum pataom gauk khik iek glai. 

Hu bruk dong di tong abih bhap bini, adei saai kamei  Kon Pao Kram dak harei dak jia tame bruk khik iek glai.  Tapa nan, kol meblah glai urak ni oh dok mai tal pak ni. Meng nan, jiak  400ha glai bo dom boh sang dalam palei taduan khik iek tuk halei jeng hu siam mekre. Saai Y Huy, akaok dhar kapul urang kamei  palei Kon Pao Kram brei thau, gam song bruk khik iek glai, dalam tuk  nao ngak hamu ngak puh, 30 adei saai dalam palei dok parabha jeng  4 tổ bhian nao pasang iek, samar mboh dom bruk lih mek glai. Tui saai Y Vân, AkaokKapul urang kamei xã Đăk Pxi, bruk brei 30 adei saai urang kamei  palei  Kon Pao Kram nao dahlau dalam bruk khik iek glai dok hu makna biak prong ngan song bruk likei kamei samu gauk:  

 “Urang kamei drei thau saong hu khik iek glai. Thau piah khik glai tra. Oh lac dom urang likei saoh bo dok hu urang kamei. Hadei ni, piah tacei pato ka anek kamuan. Oh lac urang likei saoh, bo urang kamei jeng hu khik iek glai yau khik ramik drap ar di drei ”.

  Xã Đăk Pxi, huyện Đăk Hà hu yaok ribau ha glai, bo xã  giáp ranh haong  rilo huyện,  yau  Kon Rẫy, Tu Mơ Rông, Đăk Tô... Ong A Sự, Phó Bí thư Đảng ủy, Chủ tịch HĐND xã brei thau, glai di  xã bhian njauk khol  meblah glai maong tame. Meng siam lagaih di bruk urang kamei khik iek glai  di palei  Kon Pao Kram, Đảng ủy, karja  xã Đăk Pxi meda peih prong bruk ni tabiak 8 palei dok veik:

 “Urak ni bruk khik iek glai di palei Kon Pao Kram di, adei saai urang kamei mboh biak siam. Anak tal, khol hulin brei peih prong jalan ngak ni ka dom adei saai kumei dom palei karei.”. 

Meng hadah mbaok lac bruk khik iek glai kayua urang kamei taduan ngak,  30 adei saai urang kamei bangsa  Sê đăng di palei  Kon Pao Kram, xã Đăk Pxi, huyện Đăk Hà  dok ngak hu sa bruk biak hu makna karei, nan lac brei mboh labik dang di urang kamei ngan song bruk ngak di puk palei bo dahlau deih lac bruk di urang likei./.