Mikva urang Giẻ Triêng daok di palei Roóc Nầm, xã Đăk Nhoong, huyện Đăk Glei, tỉnh Kon Tum taduan bruk khik iek glai haong mBan khik ramik glai pacang caga Đăk Nhoong tal harei ini hu 13 thun. Dom thun tapa, labaih 600ha glai jaik palei tuk halei jeng hu khik iek siam meng 70 sang bhap bini.

Ngan saong mikva, bruk khik iek glai duah hu jien tame tani tanat, labaih 200 triệu yaok thun ka palei, saong daok khik caga hu halau ia, môi trường sinh thái. Ong A Bon, akaok palei Roóc Nầm, lac: “Jien padai oh lac taong abih bo praong jang nan lac glai daok diuk, daok mekre, oh lihik glai. Mikva thau thau khik iek glai, paglaong akaok sahneng khik caga glai habar ka nyu siamt, oh caik ka glai lihik, khik brei glai daok miat haong mikva. Daok glai ye ia daok nduac, daok ia brei ka mikva.”

          Kadha praong di bruk khik iek glai di tỉnh Kon Tum lac jien piah khik iek glai tagok biak rilo saong jien bayar ka bhap bini hu tagok glaong mboh di anak meta. Dahlau di thun 2011, bhap bini khik iek yaok ha glai tok hu 100.000đồng yaok thun, min meng tuk hu sarak khik iek glai, yaom jien khik iek hu tagok 400.000đồng sa hecta yaok thun.  Meyah yaok sang khik iek 30ha, yaom jien taduan hu lac 12triệu đồng yaok thun. Bruk tagok yaom jien khik iek glai nan, nyu daong kak kajap trách nhiệm saong quyền lợi di bhap bini haong glai. Meng nan, glai hu khik iek siam jang.

          Ong Hồ Tấn Hoàng, akaok mban khik ramik glai pacang caga  Đăk Nhoong, huyện Đăk Glei, tỉnh Kon Tum  brei thau, dahlau daih, tuk oh ka hu sarak bayar jien khik iek glai, yaok thun, mban khik ramik di ong tok hu buh brei 1 tỷ đồng piah khik iek glai.. 5 thun jaik di ini, tuk hu sarak khik iek glai, jien brei ka bruk khik iek galai tagok jang labaih 3 mbang, jaik 3tỷ 200 triệu đồng yaok thun. Jien tagok, nyu pachreih bhap bini hu mbaok tame khik iek glai hu siam jang: “Tuk hu sarak khik iek glai, mban khik ramik hu jien piah bayar ka bhap bini. Meng nan, bhap bini paglaong akaok sahneng dalam bruk khik iek glai. Bhap bini bhian nao khik iek, pagui mek kol meblah glai, meng nan glai hu khik caga siam, oh njauk urang kaoh mek.”

          Kuhria tal urak ini, dalam tỉnh Kon Tum hu 29 sang mac thủy điện saong 10 sang mac ia hacih njauk bayar jien khik iek glai, ngan saong 360.000ha glai hu bayar jien khik iek, meblah 60% glai tự nhiên di tỉnh. Thun 2017 ini, dom đơn vị nan hu buh tame kadung jien khik iek saong cakrok glai tỉnh Kon Tum jaik 120 tỷ đồng. Yaom jien ini hu ba nao bayar ka dom po glai saong dom puk palei, dom sang taduan khik iek glai. Bruk bayar jien nan hu peih ngak cambaih laih, hu bruk pasang iek catang di dom pakat, dom ngành meng tỉnh tal huyện, xã. Ong Hồ Thanh Hoàng – Giám đốc Quỹ khik caga saong cakrok glai tỉnh Kon Tum, brei thau: “Kol dahlak tuk bayar jien ka dom po glai ye hu UB bhap bini dom xã, ban sit saong mikva puk palei, kol dahlak hu khan brei thau cambaih laih. Ba tabiak bruk nan angaok  blah thông tin điện tử di kadung jien khik caga patagok glai. Jien kol dahlak bayar ka dom đơn vị ye chuyển khoản, bloh kol dahlak  ủy thác ka mBan bayar jien khik iek glai pakat huyện kayua dom Hạt kiểm lâm dang ngak”

          Hadei di 6 thun peih tabiak, sarak bayar jien khik iek glai tuk camereip brei mboh jalan ngak njauk saong kein laba di Tỉnh Kon Tum. Sarak hu daong paglaong akaok sahneng, trách nhiệm saong quyền lợi di bhap bini dalam bruk khik iek glai. Tapa nan, rik daong khik iek glai hu khang kajap jang./.