Sa-ai A Thang dang anak baoh sang di drei 

Diuk pasang sa-ai A Nuôi saong Y Byenh, palei Kon Tơ Neh nan lac sa dalam 5 baoh sang di xã Đăk Tờ Re, huyện Kon Rẫy, tỉnh Kon Tum halar hatian vak harak likau karja xã pasang iek brei tabiak truh angan baoh sang kathaot.

Sa-ai Y Byenh, thun ini umo 38 thun khan lac, makna ngak ka hadiuk pasang sa-ai laik tame kan kandah nan lac kayua hu tal 4 urang anek. Daok bruk diuk pasang sa-ai vak harak likau karja xã pasang iek brei tabiak truh angan baoh sang kathaot, sa-ai Y Byenh brei thau, meng thun 2016 tal ini dom urang anek prong paje nan ye takik rambah jang, gam haong bruk tari tareng ngak mbang nan ye sang dak harei dak tani tanat jang. Urak ini meng labaih 2ha bei pleim, labaih 200 phun cao su gam haong phun bời lời blaoh raong limo, raong menuk ada jien mek tame jeng hu dom pluh triệu yaok thun. Sang urak ini takik kan kandah nan ye khin ba bruk sangka, daong ba di Karja brei ka dom baoh sang kan kandah jang drei: “Angan sang kathaot ye sang dahlak hu mbang tui 3 thun. Thun ini dahlak likau tabiak truh angan baoh sang kathaot piah ka mikva mblah tui. Hu angan lac baoh sang kan kathaot nyu jeng daong ka drei sa binah halei min dalam rai diuk drei njauk brei veik ka gauk, ka dom urang halei kan kandah jang drei. Drei njauk pambak tame pren khang di drei piah cakrok patagok”.

Dalam 5 baoh sang halar hatian vak harak likau karja xã Đăk Tờ Re, huyện Kon Rẫy pasang iek brei tabiak truh angan baoh sang kathaot hu tal 4 baoh sang urang bangsa takik. Nan lac dom baoh sang: Y Byenh, A Cách, bangsa Ba Nar, sang daok di palei Kon Tơ Neh; baoh sang A Thang, A Lanh, bangsa Xơ Đăng dhar Xơ đrá,  daok di palei Kon Rơ Lang.

Bruk njauk biai jang nan lac dalam 5 baoh sang ini hu 2 akaok palei halar hatian vak harak likau karja  palei brei tabiak truh angan baoh sang kathaot nan lac sa-ai Y Byenh saong sa-ai A Thang. Ong A Đi, Phaok Bí thư thường trực Đảng ủy xã Đăk Tờ Re brei thau: “Tuk xã taduan hu harak di mikva, xã mboh biak bui sambai kayua lac mikva drei saneng mboh hu dalam bruk yam tagok ngak mbang ngak huak piah tapa truh kathaot. Hadei di tuk taduan mek hu harak bloh xã jeng brei urang jakar trun tal piah pasang iek, duah thau ka rai diuk di dom baoh sang ini yau habar bo vak harak likau tabiak truh angan baoh sang kathaot. Hadei di tuk nao pasang iek duah thau, mong rah tapa dom baoh sang ini jeng hu bruk ngak mbang ngak huak tani tanat”.

Ong Võ Duy Ngọc, Akaok Phòng Lao động, Thương binh saong Xã hội huyện Kon Rẫy brei thau: “Dahlak taong yaom ini lac sa kadha bahrau salih hu ka jalan saneng di bhap bani oh daok pagam pambak tame bruk daong di karja brei ka baoh sang kathaot. Bruk njauk biai di pak ini lac bruk gul pataom dalam bhap bani daong ba gauk tapa truh kan kathaot. Dom danak dak, Dự án abih di nyu lac Danak dak bruk ngak negar patrun kathaot khang kajao hu peih ngak tal dom baoh sang kathaot saong baoh sang jaik kathaot hu mbang tui nan lac biak siam”.

  Đăk Tờ Re nan lac xã biak kan kandah di huyện Kon Rẫy, tỉnh Kon Tum. Dalam xã hu 1.300 baoh sang ngan haong 6.500 urang saong hu tal 79% bhap bani urang bangsa takik. Dom thun dahlau diah baoh sang kan kathaot di xã meblah tal labaih meteh

Tui Đảng ủy saong UBND xã Đăk Tờ Re, meng ngak siam danak dak bruk ngak negar patrun kathaot khang kajap di Raja-ei jeng yau dom danak dak, dự án daong ka urang kathaot di puk palei nan ye baoh sang kathaot di xã daok trun khang. Ta-eng thun 2019 ini, xã trun hu labaih 9% baoh sang kathaot glaong jang rilo mbang dut haong jalan ngak brei trun kathaot di tỉnh Kon Tum.

Bruk lac mbang akaok meti dalam xã Đăk Tờ Re jeng yau dalam tỉnh Kon Tum hu 5 baoh sang halar hatian vak harak laikau karja xã mong iek brei tabiak truh angan baoh sang kathaot nan lac bruk njauk pok meyaom./.

Urang lang: Jasi