Pathau mik va song tong abih gauk: Lac anek saih bangsa takik, sang kan kandah min adei Hoàng Ngọc Cường daok di palei 1, xã Ea Sar, huyện Ea Kar, tỉnh Đắc Lắc kham merat bac da-a naih joi. Mbang pakacah palih ruah meng bloh, adei hu 27 điểm meteh, hu tame sang bac Đại học Cảnh sát bhap bini ban raya Hồ Chí Minh. Hương Lý - urang vak di rayo sap ndom VN dok di Tây Nguyên hu khan ka bruk kham merat yam tapa kan kandah bac da-a naih joi di Hoàng Ngọc Cường, daa mik va song tong abih gauk tui pang.

Thun 1990, sang adei Hoàng Ngọc Cường meng Cao Bằng tame Đắc Lắc padang mbang ngui, jeng lac tuk adei bahrau tame tal sa. Yau rilo mik va bangsa Tày bahrau tame dok di palei sa , xã Ea Sar, huyện Ea Kar, sang Cường gaok rilo kan kandah, kurang anak, kurang likuk. Ong hoàng Văn Nhượng, ame di Cường brei thau, kayua kan kathaot, sang bac dok atah, nan ye anek likei kacua brei padeih bac, dong amaik ame. Cường khin bac nan ye sang jeng kham merat brei ka nyu nao bac.

Ndik tapui tabiak anek jeng cong khin ka anek hu bruk ngak, piah bingi sahanag jang amaik ame. Yau amaik ame dahlau deih kan kandah oh hu nao bac, urak ni jeng yau nan. Amaik ame tame labik ni ngak nong rambah rambeip lo. Nan ye brei anek nao bac, nyu kham merat jeng hu siam jang. Hulin bhian pachreih anek yau nan, nyu jeng lac anek kham bac.

          Bruk nao bac di Hoàng Ngọc Cường jeng hu rilo kan kandah. Yaok harei nao bac, adei njauk nao takai jalan atah labaih 7km. Bilan pandiak bak thur mun, bilan hijan bak gluh baok. Rilo tuk, kham dong bruk sang, adei njauk nao tapa krong anak sang, nao tắt tapa mblang puh meng oh te bac. Glaih glar yau nan, min thun bac halei Cường jeng mek hu angan Anek saih Tiên tiến. Ndom kal bruk kham merat bac daa di adei Hoàng Ngọc Cường, gru chủ nhiệm Thái Văn Mạnh lac:

“Tapa tuk vak pato Cường, mboh Cường lac sa anek saih kham merat yam tapa kan kandah piah bac da-a, Cường biak tari tareing dalam bac daa nan ye drei pachreih ba Cường meng nan tacei jalan ka adei pakacah tame gah Công an piah harei hadei bac tamat hu bruk ngak tani tanat.

Tui jalan di gru chủ nhiệm, meng kham merat yam tapa kan kandah piah bac da-a, mbang pakacah palih ruah meng bloh, Hoàng Ngọc Cường hu tame sang bac Đại học Cảnh sát bhap bini ban raya Hồ Chí Minh song 27 điểm meteh. Taduan hu harak trúng tuyển, tong abih urang dalam sang Cường gam bui sambai gam duh hatai. Bui sambai kayua hu tame ĐH yau hatai cong khin, min duh hatai kayua jien mbang bac di ban raya HCM. Kayua yau nan ye, dalam tuk cang tal harei tame bac, Cường gam dong ka amaik ame bruk ngak hamu apuh gam ngak mbang pah duah jien bac daa.

Sang kan kandah nao bac Đại học abih rilo jien nan ye adei nao ngak mbang pah dong ka amaik ame jien bac daa harei hadei. Duh hatai di adei nan lac bac đại học abih rilo jien,labik bac daa nyu karei jang bac pakat 3, nan ye meda hu rilo kan kandah caik ka adei.

Mehit Cường tame đại học, oh lac sang adei bui sambai bo puk palei kan kathaot jeng chreih chrai, uan tambuan. Ong Chu La Đồng, Kapul urang taha praong thun di palei 1, xã Ea Sar brei thau: di bhum kan kandah ni, bruk nao bac daa di anek kamuan dok rilo cuang kandah, nan ye sa anek saih bangsa takik hu tame đại học song điểm glong yau Hoàng Ngọc Cường biak njauk pok meyaom

Langiu bruk bac di sang bac, mai sang Cường dok kham dong ka sang. Tuk tame bilan ye nao buac hareik, glang limo, rong pabui. Cường jeng thau lac hu bac da-a glong meng thau ilamu kỹ thuật, dong ka sang song XH

Pabah mbang sang bac ĐH dok caga taduan dom SV bahrau, Hoàng Ngọc Cường daok caga meng cao nguyên Đắc Lắc tame ban raya HCM piah bac, tantu lac gaok rilo kan kandah. Min menghatai kham merat di urang likei dam bangsa takik, ndih tapui tabiak saong prong tagok dalam kan kathaot, Cường kham merat bac megru siam piah jeng urang lin công an bhap bini./.