Pathau mik va song tong abih gauk!

Mai palei Thái An xã Vĩnh Hải, huyện Ninh Hải, tỉnh Ninh Thuận, dalam tuk bilan pandiak thu dui atah, khol hulin mboh dom phun taganui nho tasak dok caga paik boh. Mik va urang nong di labik ni kham merat kuac raok bingun mek ia pruh ka phun nho dalam bilan pandiak thu.

Urak ni, palei Thái An, hu abih tih labaih 115 ha taneh pala drak, dalam nan hu labaih 66 ha taneh pala nho, dok veik pala dom janih njam patam yau lasun, meriak... Ong Phạm Văn Mại, urang jakar pachreih nong xã brei thau: urang nong di labik ni rilo meng pala nho. Kayua langik pandiak dui atah, piah ka phun nho tamuh siam, mik va dalam palei hu kuac raok bingun song salih tapa pandar jalan pruh ia patak patom piah dong ka 60 ha nho dok dalam tukvak paik boh song 6 ha nho dok cakrok patagok.

Di palei Thái An, urang nong kuac raok labaih 80 bingun, yaok bingun dalam labaih 8 m, gar 6 m song abih meng 7 tal 10 triệu đồng sa bingun. Khol hulin nao tui jalan ba tame mblang hamu pala nho di lBầu Tró mboh sa mblang hijao mekre, dom chùm nho mekre meta meng hu jalan pruh ia patak patom. Urang nong Phạm Văn Linh daok di palei  Thái An khan lac: Piah hu ia pruh ka 3 sào nho, bahrau ni sang saai kuac raok 2 bingun abih 15 triệu đồng song buh tabiak 15 triệu đồng blei nding ba ia meng Bầu Tró tal bein nho 350m, pagam labaih 200 bét pruh ia abih 11 triệu đồng. Meng hu yau nan, 3 sào nho di sang saai mek hu labaih 6 tấn, urang mai tal bein blei yaom labaih 90 triệu đồng. Kaoh abih phun jien kuac raok bingun, sang saai laba hu oh hadom min biak sambai kayua bein nho oh metai kayua kurang ia pruh.

- Nhạc ngắn

Ngan song dom boh sang oh ginup jien piah ngak ye rik jien tame kuac raok song gauk, Saai Đỗ Đức Thơ ndom lac, oh njauk dok ala cang hijan, nan ye hulin song saai Nguyễn Đức Phước song Trần Trọng Ân ba gauk rik jien kuac raok 3 bingun, abih labaih 20 triệu đồng. Yau Yuan lac “trời không phụ người”, tuk bahrau kuac trun hu 6 m, hu gaok halau ia ba mai pruh ka 7,5 sào nho dok cang ia. Sang salih tong abih tapa jalan pruh ia ginup piah pruh ka dhar hala song ginup pasah ka phun nho patagok gam patak patom jalan ia pruh. Urak ni, mong yaok chùm nho tasak meriak daok cang paik boh, hatai hulin biak chreih chrai, bui sambai.

          Kayua samar kuac raok bingun mek ia pruh, mik va urang nong di palei An Thái xã Vĩnh Hải, Ninh hải njauk bilan nho, saong daok khik hu mblang taneh pala nho patagok siam dalam bilan pandiak thu ni./.