Mesup ni hu 9 urang njom bahrau gac njom covid 19 rilo labik peih bruk pacang caga 

Kuhria meng maong 6 melam 02/02 tal maong 6 dah page harei 03/02, negar drei hu 9 urang njom bahrau, di Hải Dương, Hà Nội, Gia Lai saong Bình Dương. Kayua yau nan ye, kuhria tal maong 6 dah page harei ni (3/02), Việt Nam hu abih tih 1003 urang njom COVID-19 kayua njom dalam negar, dalam nan dom urang njom bahrau kuhria meng 27/1 tal urak lac: 310 urang. Abih tih urang taom gaok jaik saong tame negar meng bhum jit daok hu tui iek prein yava (brei daok karei) lac 27.714 urang.

Brei panuac tamat Mbang ginum biai Rajaei bilan 1 rah tabiak harei kabroi, Thủ tướng Nguyễn Xuân Phúc ieu kakei dom mentri, dom gah, dom tỉnh ban ngak haong gauk 3 bruk praong ka pacang caga jit ruak Covid-19 saong sangka Tết ka bhap bini. Tui jalan lac oh caik ka urang halei kurang Tết, abih di nyu lac urang di sarak, urang kathaot, bhum palei gaok bala meng langik tasik, bhum atah bayah, labik bjauk pacang veik kayua jit ruak. Ndem tal vaccine pacang jit, Thủ tướng brei thau cambaic laic: Rajaei njauk hatai tui bruk bo hadei tuk Mentri Y tế pang iek bruk ba vaccine tal bhap bini chip dalam quy 1 ini lac sa bruk lagaih saong Việt Nam”.

Tui panuac khan di mbang nyaom kayua jabat rajaei peih tabiak di bier harei 2/2, Thứ trưởng Mintri Y tế Trần Văn Thuấn brei thau Mintri Y tế hu mbaoh tangin pambuak bruk haong negar Anh piah blei vắcxin di Công ty AstraZeneca pabak ka bruk pacang caga jit COVID-19.Tui nan, dalam thun 2021 gah negar Anh  meda pabak labaih 30 triệu mbang vắcxin ka Việt Nam, tui kuhria aval abih lac quý 1/2021.Min, kayua vaccin blei oh ka rilo, nan ye domvắcxin nan hu klauk dahlau ka dom urang lac: urang jakar y tế pambuak tapak tal bruk pacang caga jit, urang praong thun, urang hu ruak dahlau dalam rup mbuan metai mayah njom COVID-19.

Melam 2/2, di Ban ine Hà Nội rah tabiak Danak dak daoh tamia “Caong khin - Pahadah” salam uan Nyaom roya pakat negar mbang ka 13 di Đảng Cộng sản Việt Nam hu jak jeng siam mekre. Danak dak nan kayua Ban Tuyên giáo Trung ương, Mentri Ilmau, Thể Thao saong Du lịch, UB bhap bini Ban Hà Nội pambuak gauk peih ngak.  Peih tabiak dalam tuk jit ruak Covid-19 rah tabiak srau kadau, Mban peih ngak Danak dak daoh yamia “Caong khin - Pahadah” hu peih bruk mek darah dut iek ruak Covid-19 ka taong abih dom nghệ sĩ, diễn viên hu mbaok tame danak dak, saong ngak catang tui bruk pa atah di gauk piah pacang jit. Ini lac danak dak hu padang ngak biak tani tanat saong asal kadha: pok meyaom Đảng, pok meyaom WaHo praong uranam, meyaom bruk jum pataom taong abih bangsa ngak hu bruk jak jeng praong, hu makna sajarah dakrai di bruk salih birau saong patagok di taneh ia.

Di mbang ginum biai haong mban pato pakai pacang caga jit Covid-19 peih tabiak di bier harei kabroi, ong Võ Văn Hoan, Phó akaok UBND TPHCM ndem lac: ban raya thau cambaih saong ngak catang bruk pacang caga jit meng Trung ương, langyah dom bruk ngak suan min oh “pacang kraong, pakauk darak”; ngak habar piah khik salamat, min jeng ba mbuan lagaih ka bhap bini rok Tết. Ong Hoan brei thau lac, tal urak ni ban raya HCM lac labik ka oh hu jit njom mbak dalam rahra, min mbuan njom biak glaong ka dom anek ruak meng gah langiu.

Hu 5 ranaih saong sa urang praong thun metai dalam bala cuh phao rahtabiak di Muskogee, dalam bang Oklahoma, Mỹ. Dalam 1 pathau khan di jabat cảnh sát, jabat ni taduan hu sa mbang ieu phone di maong 1 meteh kreh melam (tui maong pak ni) ka bruk lac hu rilo urang njauk cuh phao di sa sang praong di labik gah đông nam Mu-xco-ghi. Di tuk nan, kapul cảnh sát hu nao tal labik rah tabiak bala saong duah mboh sa urang medil daok par phao. Hadei di mbang pagui cap mek, urang ni hadei di nan hu cap khik. Urang ni hu brei thau lac sa urang gauk gar haong urang njauk bala.

Jabat khik ramik jru tavao di Australia ndem lac vaccine caga Covid-19 di hãng jru Pfizer oh ngak kan kandah tal urang taha; min jabat ni kakei dom bác sĩ njauk caik hatai dahlau di klauk janih vắc-xin ni ka dom urang hu prein yava oh khang.

Rajaei Mỹ meda parabha yaok triệu mbang vaccine caga Covid-19 nao tapak tal dom tiem jru pablei sit meng harei 11/2 anak tal. tui kuhria, dalam tukvak camereip peih ngak, rajaei Mỹ meda pabak labaih 1 triệu mbang ka 6.500 tiem jru dalam negar yaok adit. Tuk jru hu pabak tagok, danak dak ni meda hu peih praong tal 40.000 tiem jru./.

Urang lang: Thu Thảo -Ái Nghiêm -3/2