Tui yaok pataom di gah klauk jru vaccine pakat negar, dom vắc xin hu klauk bloh dalam negar kuhria tal harei 10/9 lac labaih 26 triệu mbang. 10 tỉnh ban hu klauk rilo abih kuhria tui dom mbang klauk haong iek tui dom vắc xin hu parabha brei, lac Đồng Tháp, Bình Phước, Vĩnh Long, Cà Mau, Lâm Đồng, Bạc Liêu, Cao Bằng, Bà Rịa – Vũng Tàu, Lào Cai haong Hậu Giang.

Kuhria tal abih bilan 8, hu jaik 12 rabau uranaih lac F0, 27 rabau uranaih lac F1, njauk ba nao taong ruak, brei daok karei piah pacang caga njom mbak COVID-19, gam haong nan, hu yaok ratuh uranaih laik tame metui amaik, ame kayua njauk Covid 19. Oh hu iek glang meng amaik ame, gauk gar, ba tal pandik harao ka dom uraniah. Urak ini, Mintri Lao động-Thương binh saong Xã hội pambuak bruk haong gah Y tế daok daong ka UB bhap bini tỉnh, ban padang jalan peih bruk klauk vắc xin pacang COVID-19 ka uraniah, brei iek glang, taong ruak ka dom uraniah njom ruak COVID-19 di dom labik taong ruak ka urang ruak njaom COVID-19.

Tui Mban tacei pato pacang caga jit COVID-19 tỉnh Bà Rịa - Vũng Tàu, dalam dom harei tapa dom menuac njauk COVID-19 bahrau dalam tỉnh daok trun khang. Dom labik oh hu menuac njom bahrau yau: Châu Đức, Xuyên Mộc, Đất Đỏ haong rilo xã, phường, ban sit hu peih talaih pacang, jeng bhum hijao hadei di rilo harei lac labik pandiak gah jit ruak. Harei kabroi dalam tỉnh tok hu 11 urang njauk ruak bahrau, dalam nan hu 1 urang dalam palei.

UBND ban sit Phan Thiết, tỉnh Bình Thuận brei thau, meng mon 12 melam 12/9, dom shipper pajeng ba pandap, urang peih radaih, menuac daong ka urang peih radaih angaok dom radaih pajeng pandap brei hu harak dut iek âm tính SARS-CoV-2 daok tukvak pandar dalam 72 mon. Di ban Phan Thiết, jit ruak jeng daok srau kadau, kuhria tal mesup ini 11/9, tỉnh Bình Thuận hu 2.801 urang njauk COVID-19, dalam nan ban sit La Gi hu 1.836 urang, Phan Thiết 574 urang.

Mban tacei jalan pacang caga Covid-19 di UB Bangsa daok likau panuac dahlau di tuk pok tagok Bộ trưởng Chủ nhiệm pasang iek, brei bruk daong ka 3.604 urang njom Covid-19 lac urang bangsa takik daok di dom tỉnh, ban, dalam nan hu   Cần Thơ, Kiên Giang, Sóc Trăng, Trà Vinh, Vĩnh Long, An Giang; Tây Ninh, Ninh Thuận, Bình Phước, Bà Rịa – Vũng Tàu haong 31 adei anek saih sang bac Dự bị Đại học TP Hồ Chí Minh (mbang 2) njauk Covid-19. Yaom daong lac: 1.000.000 đồng ka dom  F0 lac bangsa takik, 2.000.000 đồng ka dom  F0 lac anek saih sang bac Dự bị ĐH TP HCM, ngan saong yaom jien abih tih lac 3 tỷ 666 triệu đồng.

Tổng thống Mỹ Giâu Bai-đừn (Joe Biden) bahrau hu panuac ndom puac tuk bak 20 thun bruk khủng bố harei 11/09/2001 tame tòa tháp đôi pasak pablei salih dunya di Niu Yo-óc saong Lầu Năm góc ngak brei yaok rabau menuac metai. Bruk nan nyu ngak brei salih karei biak khang taneh ia Mỹ haong dunya.  Tui urang pan akaok negar Mỹ, bruk khủng bố nan nyu caik veik laka praong oh mbuan siam veik hu. Min jeng dalam tukvak kan kandah di abih, jeng meda mboh hu pui hadah, nan lac prein khang di anek menuac anak dom cuang kandah, tavak tavaiy.

Tổng thư ký Liên hợp quốc An-tô-ni-ô Gu-tê-rết (Antonio Guterres) harei kabroi hu panuac lac dunya daok nao suan jalan saong ieu dom taneh ia ngak bruk samar drah pacang veik jit praong COVID-19 haong biến đổi khí hậu. Tổng Thư ký Liên hợp quốc  daok brei thau lac, jit praong brei mboh bruk oh njauk gauk di dunya dalam bruk pambuak gauk ba tabiak dom jalan ngak ba mai kein laba haong gauk, yaom lac dang anak dom kan kandah ba tal metai lahik di dunya jeng oh pambuak gauk hu. Dom taneh ia ngak vắc-xin oh patagok bruk ngak piah klauk hu ka labaih 70% menuac sia dunya di dom bilan akaok thun 2022.

Rajaei Japon daok pasang iek brei adat dom nhà hàng, quán bar peih pabah mbang veik meng akaok bilan hadei saong daok kuhria brei pacadu dom bruk pacang veik kayua COVID-19 ngan saong gah du lịch, dom bruk praong saong brei pablei alak, mbia meng bilan 11. Bruk pacadu nan tui kuhria hu pataom tame dom menuac hu klauk vắc xin blaoh saong dut iek PCR mboh âm tính haong vi-rút Sar-Cov 2. Japon jeng daok kham merat klauk vắc xin ka taong abih menuac caong hu klauk, samar abih lac dalam bilan 10 atau bilan 11./. 

Urang lang: M.Phuong -11/9/2021