Rilo kapul nyaom klah rabha bruk dong brei 

Kuhria tal mon 6h mesup ini (30/9), Việt Nam hu abih tih 1.094 urang njom Covid-19, dalam nan hu taong thit ruak ka 1.007 urang. Biar harei  29/9, hu 17 urang ruak lac urang meng negar Nga mai veik taneh ia dut iek mboh dương tính haong virus SARS-CoV-2, hu brei daok pa-atah chip hadei di tuk par trun. Dom urang ruak ini meng Liên bang Nga mai saong par trun di mblang kapal haoh Cần Thơ. Hadei di nan hu ba nao tỉnh Bạc Liêu piah brei daok karei di labik praong pataom menuac ruak brei daok paatah.

Công an TPHCM bahrau tabiak bruk khik ramik  an ninh trật tự di ban raya dalam tuk vak rah tabiak Nyaom roya Đảng bộ ban raya mbang ka  XI song Nyaom roya Đảng ủy Công an Trung ương mbang ka VII. Dalam mbang tabung glong dui atah tal harei  31/10, Công an TPHCM ieu pataom tong abih gah peih ngak siam bruk khik ramik an ninh trật tự, chap mek tội phạm… Jalan ngak lac kham merat paglaong bruk pasang iek chap khik bruk hình sự hu meng  77% tagok, trun meng 5% tagok dom mbang radeih paoh gauk ; oh caik rah tabiak bruk pataom gauk peih radeih ngak srau kadau jalan mbak song peih radeih pakacah gauk suan hukum .

Tỉnh ủy Bến Tre brei thau, meng harei 14-16/10 meda peih nyom roya Đảng bộ tỉnh Bến Tre mbang ka XI, vaktu 2020 – 2025. Hu 350 urang lambaok ka labaih 56.000 urang đảng dalam Đảng  bộ mai hu pambaok. Vaktu tal, Đảng bộ Bến Tre pataom tame ngak 11 danak dak praong, yau ye:  ngak ka nyu salah tatua Rạch Miễu 2; ngak ka nyu blaoh kraong ribaong pabvak ia dalam tỉnh; peih raong 4.000 ha hadang tasik công nghệ glaong, ba tame pandar dom danak dak điện hangin…Kham merat ngak bruk salam uan Nyaom roya Đảng bộ mbang ka XI vaktu 2020-2025, tỉnh Bến Tre hu jaik 20 danak dak hu ngak salah blaoh haong yaom jien buh tame ngak labaih 4.300 tỷ đồng.

Dom harei tapa, dom danak dak main sambai Tết Trung thu hu peih ngak ka uranaih di  11 xã bhum ceik song  4 xã Chăm dalam tỉnh Bình Thuận. Labaih 15 ribau pok pandap dalam nan hu ahar  trung thu, gom, katap anek saih… hu brei ka dom adei. Taphia di nan, rilo bruk ngak siam, hu makna hu dom pakat dom gah song bhap bini ba tangin tame dong ka uranaih kan kathaot, uranaih hu rai duik kan kandah, piah ka dom adei hu bui sambai dalam tuk Tết Trung thu.

UBND huyện Xuyên Mộc, tỉnh Bà Rịa – Vũng Tàu brei thau: CA daok duah thau kol ngak ja harak brei quyền pandar taneh dalam huyện. Dahlau di nan, akaok bilan 7/2020, di labik darak Bình Châu mboh hu 4-5 urang ndik radaih  ô tô sambo màu mbong, biển số TPHCM khan brei rilo menuac thau ka bra bruk ngak hu harak brei quyền pandar taneh haong yaom jien 30 triệu đồng sa harak, ngak brei rilo menuac njauk lah pachot. Tui jabat tut angan taneh riya huyện Xuyên Mộc, dom mblang taneh kayua dom urang ini ngak ja harak brei quyền pandar taneh jeng daok dalam khik iek di UBND xã Bình Châu.

Hadei di sa mbang ginum biai kandauk, Hội đồng bảo an Liên hợp quốc hu 15 negar  thành viên brei mboh bruk duh hatai ka dom bruk  quân sự prong rah tui jalan tapen negar di labik meriak gauk Na-gô-rơ-nưi Ka-ra-bát, saong hu panuac lên án khang bruk pandar phao ndao pak ni . Tabiak panuac ndom lac Hội đồng bảo an Liên hợp quốc ieu dom gah padeih bruk mesruh gauk chip, trun bruk  ngak brei catang tagok song peih bruk ginum biai veik . Meng puac adit dahlau, dom gah di  labik  ly khai Na-gô-rơ-nưi Ka-ra-bát  mesruh gauk song dom gah  di  A-déc-bai-dan. Ni lac dom mbang tong gauk khang di abiho di abih di 2 gah kuhria meng di thun 2016, ngak brei 98 urang metai , dalam nan hu  14 rahra.

Hạ viện Anh bahrau brei tapa danak dak hukum hu rilo panuac oh njauk gauk ka darak pasar dalam taneh ia, ngak ka taneh ia ini dak harei dak tabiak atah thỏa thuận Brexit mek hu haong Liên minh châu Âu di puac thun blaoh. Danak dak hukum “Darak pasar dalam taneh ia” bo rilo urang dalam rajaei jeng mboh lac suan hukum dunya meng di tuk hu pok tagok Thượng viện piah buh phiếu brei tapa. Tui Thủ tướng Anh, ini lac bruk njauk ngak piah khik caga Bắc Ai-len – lac 1 tỉnh di negar Anh, plaih bruk kan kandah yau dalam dom harak văn kiện hu brei tapa haongi Bruxells. Liên minh châu Âu hu panuac ieu negar Anh mek veik danak dak hukum dalam tuk dom bruk ginum biai ka talei pambuak bruk pablei salih hadei di Brexit daok oh ka duah hu jalan tabiak.

Liên minh Vaccine (GAVI) brei thau lac njauk gauk brei pambuak bruk song Viện Huyết thanh Ấn Độ ngak tabia 100 triệu mbang vaccine pacang Covid-19 piah pabak ka dom negar  duah hu jien takik song mbiah  dalam thun  2021. Tui Reuters, yau nan hu tong abih  200 triệu mbang vaccine pacang Covid-19 ka dunya  yaom glong di abih lac  3 USD/ sa mbang. Dahlau di nan, gah Y tế dunya, GAVI song Liên minh salih bahrau caga pacang jit ruak prong hu ba tabiak bruk saong tacei jalan  Sáng kiến vaccine dunya hu angan COVAX piah jhul khang bruk pacang caga Covid-19 ka bhap bini halei njauk khin abih di dunya./.

Urang lang: Hanipha -Mousaphuong