Tui kuhria meda hu labaih 30 triệu mbang vaccine pacang Covid-19 tal Việt Nam dalam bilan 9 song bilan 10/2021- bruk ni hu urang lambaok  mintri  Y tế brei thau dalam mbang họp báo rajaei bilan 8 rah tabiak tuk beir harei  6/9 di Hà Nội.

Meng harei 6/9, 4 huyện “bhum hijao” di tỉnh Bình Dương lac Bắc Tân Uyên, Bàu Bàng, Dầu Tiếng, Phú Giáo brei  pacadu bruk paatah di gauk tui Sarak 16 di Thủ tướng Rajaei trun ngak tui Sarak 15. Yau nan, Bình Dương daok veik dom ban sit Thủ Dầu Một, Dĩ An, Thuận An, Tân Uyên, Bến Cát daok paatah di gauk tui Sarak 16.  Bình Dương daok pamaong tal bruk lac tal harei 15/9 meda pasang iek hu jit, ba tỉnh mai veik raidiuk bharau yau dahlau daih.

Tal harei 05/9, dom tỉnh bhum Đông Nam Bộ song ban raya Hồ Chí Minh hu 1.154 urang njom Covid-19 lac urang bangsa takik. Dalam nan tỉnh Ninh Thuận hu 519 urang, Tây Ninh hu  376 urang, Đồng Nai hu  84 urang, Bình Dương 69 urang, Bình Phước 56 urang , Bà Rịa - Vũng Tàu 41 urang, Bình Thuận 09 urang; Tong abih dom urang F0 jeng hu rai duik biak kan kandah. Di tỉnh Bình Dương dok jhul khang bruk klauk vaccine. Jalan batabiak lac klauk labaih  250.000 mbang vaccine dalam sa harei, kham merat ba tỉnh mai veik raidiuk yau dahlau di harei  15/9/2021.

Tui Mban tacei pato pacang caga jit COVID-19 Tây Ninh, tal harei 6/9, abih tih menuac metai kayua COVID-19 dalam tỉnh lac labaih 100 urang. Kuhria abih tih meng akaok mbang jit ruak, Tây Ninh hu labaih 6.800 urang ruak COVID-19, hu labaih 5.000 urang ruak hu taong thit ruak, saong urak ini daok taong ruak ka labaih 1.700 urang ruak. Urak ini jit ruak dalam tỉnh jeng daok srau kadau, Tây Ninh jeng daok paatah di gauk tui sarak 16.

Ong Nguyễn Nguyên Phương, phaok akaok Sở công thương ban raya .HCM brei thau, labik pataom mek, pajeng ba pandap panda di drak pasa Bình Điền hu peih veik meng harei 7/9. Bruk pabak pandap  ka bhap bini ban raya dahlau deih tuk peih ngak meng bhum pala ngak tal bruk pajeng ba, parabha pandap panda, khik piah gaok rilo kan kandah,  bruk daong nao pasa tuk camereip oh ka lagaih. Min mbiah tal urak ni hu tani tanat.Ban raya hu harak tacei pato dom quận huyện, anak tal bruk pabak pandap panda, bruk daong nao pasa hu tani tanat,  hu pabak menuac piah kuhri kurhia,  patagok bruk caga peih veik drak pasa meng kan.

G20 sanya oh caik ka urang halei njauk klaak veik gah likuk danak dak klauk jru pacang Covid-19. Nyaom biai Akaok Mintri Y tế G20  hu peih tabiak di Italia dalam 2 harei lac harei 5 haong harei 6/9, ngan saong kadha lac padang ngak veik siam jang saong patagok talei pambuak bruk, jum pataom saong samu gauk piah oh caik ka urang halei njauk klaak veik gah likuk. Dalam 2 harei, nyaom biai pataom tame ginum biai dom kan kandah di Covid-19 ngan haong dom bruk cakrok khang kajap di Danak dak ginum biai 2030 saong dom bruk yau ye jalan pacang caga jit praong di harei hadei, daong cakrok saong hu pandar samu gauk dom vắc-xin.

Philippin meda brei pacadu bruk pacang caga COVID-19 di bhum Manila, meng di harei  8-9 song daok kuhria salih tapa pacang veik sit jang, iek tui jit ruak di yaok labik piah dong ka gah  kinh tế. Bruk ni rah tabiak yaom lac negar Đông Nam Á hu dom urang njom mbak glong di abih kayua biến thể Đen-ta. Rajaei Philippin jia lac dom pacang caga  COVID-19 di tanut glong atau beir hu peih ngak iek tui yaok labik meda hu kein laba jang dalam bruk pasang iek jit, bo oh ngak kan kandah rilo tal bruk ngak mbang pablei salih song bruk nao mai di rahra.

Yaok ratuh labik y tế di Afghanistan daok mbuan njauk kreik pabah mbang kayua kurang jien piah ngak bruk. Ini lac panuac di ong Rick Brennan – Yam ndok bruk samar drah bhum timur Địa Trung Hải di Gah Y tế Dunya (WHO) haong gah ngak báo di harei kabroi (6/9). Tui ong Rích Bren-nan, makna lac kayua dom gah daong jien ka dom bilai y tế di Afghanistan lac Gilang pariak dunya, Liên minh châu Âu haong Jabat patagok Dunya Mỹ (USAID) oh brei adat ka dom bruk daong jien tapa sa rajaei kayua gah Taliban pan akaok. Bruk ini jeng hu makna lac rilo menuac di Afghanistan oh daok hu thau tal dom bruk y tế, tapa nan jeng lac jaleih tayah abih dom jak jeng gah y tế ngak hu di Afghanistan dalam 20 thun./.

Urang lang: M.P & H.Pha – 7/9/2021