Huyện taphia negar Sốp Cộp dahlau daih lac pasak ma túy di tỉnh Sơn La, tuk dom hamu puh di bhap bini bangsa pala ralo phun jru phien saong gam tui nan lac ralo urang pandar ma túy. Dom thun jaik di ini, kayua hu dom pakat karja, bruk njauk gauk di bhap bini, tệ nạn ma túy di bhum taphia negar daok dak hu jhul kadul likuk.

Yaom lac hu diuk saong dua anek sit, dom thun 2012, dalam sa mbang oh khang hatak anak dom panuac khích bác di ayut, saai Vì Văn Cương, daok di palei Tin Tốc, xã Dồm Cang hu gam ma túy tuk halei jeng oh thau. Drap ar dahlau nan di dua diuk pasang patak pataom hu samar nao tui bruk njuk ma túy abih. Bruk panuac pachreih ba di baoh sang, ayut sahabat saong bruk daong ba di dom pakat karja puk palei, saai cương kham merat nao cai nghiện. Thun 2014, saai gilac mai puk palei, kham merat padang veik rai diuk. 

Saai Vì Văn Cương khan lac: njuk ma túy lac bruk ngak sung praong abih dalam rai diuk dahlak. Dom harei bilan nao cai nghiện hu daong dahlak thau cambaih ka tác hại di ma túy. Urak ini nao cai mai meyah ayut hu jak ye dahlak kham merat oh nao tui jalan klak bo brei kham merat ngak mbang piah hu jien brei ka anek mbang bac. 

Tui thống kê di Công an xã Dồm Cang, thun 2015, xã hu 18 urang nyil ma túy hu nao cai nghiện gilac mai puk palei. Tapa pasang iek, dom urang ini jeng ngak siam dom nội quy, hukum di palei, oh hu urang halei njuk veik.   

Ong Lò Văn Thái, Phaok akaok UB bhap bini  xã Dồm Cang, huyện Sốp Cộp, brei thau: piah jhul kadul likuk tệ nạn ma túy, Đảng ủy, karja palei xã Dồm Cang hu pandar mban tacei jalan pacang cakak tội phạm, tệ nạn XH saong peih bruk ngak taong abih bhap bini khik caga an ninh palei negar pakat xã (ieu lac mban tacei jalan 2968) thau tình hình tội phạm ma túy di cơ sở, peih dom mbang tabung glaong pacang cakak ma túy. Tapa nan, gah chức năng hu palahik dom labik pablei salih dom janih ma túy; peih bruk pathau khan tal bhap bini ka tác hại di ma túy, dak padang xã, puk palei, baoh sang, sang bac oh hu ma túy. Urang dang akaok xã Dồm Cang daok kham merat tal puac thun 2016, mek hu chuẩn 4 oh ka ma túy.  

Maong tame baoh sang barau padang ngak khang kajap di bhum taphia negar kan kandahoh thei saneng nan lac baoh sang di saai Quàng Văn Thoát, daok di palei Nà Lốc, xã Sốp Cộp, huyện Sốp Cộp,  urang bhian 3 mbang nao trại cai nghiện. Saai padeih njuk ma túy di thun 1996 saong hadei 3 mbang nao cai, thun 2010 saai hu cai bloh ma túy. Gilac mai palei, saai kham merat padang veik mbang ngui. Mboh saai padeih njuk saong kham merat yam tagok dalam rai diuk, thun 2012 mikva hu jia tame pok saai ngak urang công an di palei.

Tui ong Lò Văn Hóa, akaok công an xã Sốp Cộp, bruk praong abih dalam pacang cakak tội phạm ma túy lac brei khik kajap bruk tố giác, phát giác urang hoạt động ma túy, khik iek khang kajap, patakik nao dom palei hu tệ nạn ma túy piah pacang cakak dom urang lợi dụng labik jaik taphia negar pablei salih ma túy.  Urak ini, xã jak ba hu 100% dom baoh sang di 17 palei dalam xã mbaoh tangin sanya 4 oh saong ma túy saong sanya oh pala phun jru phien, langyah hu kein lagaih 3 palei hu iek lac kan kandah ka ma túy jeng palei oh hu ma túy./.