Sang sa-ai Tồn Thị Hồng daok di palei Châu Hanh, xã Phan Thanh, huyện Bắc Bình, tỉnh Bình Thuận oh var hu bruk kuac rok bingun di tapen kraong Lũy  piah mek ia pandar di bilan bhang tabung glong meng blaoh. Sa-ai Hồng brei thau, sang hu buh jien tabiak mek ia mac mai piah pandar min di bilan pandiak bhang ye bhian oh hu ia: “ Bilan bhang, mikva oh hu ia pandar. Thu ia dalam 4 harei, mikva kuac rok bingun ia dalam kraong Lũy piah mek ia pandar. Di sang jeng hu ia mac min oh hu ginup ia pandar kayua ia kraong thu abih yau nan ye oh hu ia, ia mbau jhak.”

Blai pabak ia pandar palei pala xã Phan Thanh hu ba tame pandar meng thun 1995 saong prein khang brei ia abih tih 490 m3 dalam sa harei melam, ba ia ka labaih 1.800 baoh sang. Dalam xã hu 7 palei, dalam nan hu 5 palei daok jaik pasak xã, 2 palei daok  veik atah di pasak labaih 6 km. Di labik pasak ye blai nyuk ia di Mban khik iek danak dak công cộng kayua huyện khik iek, mek ia tapak meng kraong Lũy. Tuk vak tapa, pandiak bhang khang, ye yaok 10 harei meng hu ia peih  meng binek Đại Ninh mai kraong Lũy piah pabak ia ka dom balai. Kayua yau nan ye, bruk bhap bini hu brong ba ia mac mai sang min bhian kurang ia pandar.

Daok di xã Phan hòa, ong Thông Minh Linh, akok UB bhap bini xã ini brei thau, jaik abih urang dalam palei pandar ia mac di balai njuk ia Phan Rí Thành - Phan Hòa, hu padang ngak meng thun 1992 ngan saong prein khang 700 met khôi sa harei melam, pabak ia ka labaih 2.300 baoh sang. Bruk pandar ia di bhap bini ralo bo halau ia takik yau nan ye bruk kurang ia pandar bhian rah tabiak, oh lac cang tal bilan pandiak:“ Urak ini, drei tok pandar ia bingun bo bingun ini hu ngak meng lavik paje. Yaom lac hu pasiam veik dom labik min oh ia oh hu ginup. Karja palei jeng hu pok panuac likau brei pabak phun jien ngak jalan ba ia meng labik karei ba tame dom binek, ribaong kraong di drei, hu yau nan meng hu ginup ia.”

Dalam huyện Bắc Bình urak hu abih tih 16 danak dak ba ia kayua rilo gah khik iek, ba tame pandar ngan saong prein khang abih tih 14.830 met khoi dalam sa harei melam, min urak ini tok pandar hu 63%  prein khang di nyu.

Tui ong Lê Văn Long, Akok UB bhap bini huyện Bắc Bình, jaik abih dom danak dak ba ia praong di huyện hu padang ngak tui jalan mek ia tamo meng kraong, binek, daok veik kuac mek ia ala taneh nan ye bilan pandiak bhang bhian kurang ia: “ Dom danak dak ini lagaih saong halau ia bhian hu. Di bilan pandiak ye oh pandar hu bo brei mek ia di ribaong atau njuk pruh ia dalam binek ba ka mikva. Oh hu ia oh yer brei ngak binek praong, meteh bilan peih ia sa mbang.”

Mbang pandiak bhang meng blaoh, dalam tỉnh Bình Thuận hu 38 xã, phường, ban sit ngan saong labaih 97 ribau bhap bini di ralo labik njauk kurang ia pandar. Dalam nan, di huyen Bắc Bình hu tal 8 xã ngan saong labaih 44 ribau urang kurang ia pandar. Piah hu ginup ia pandar suai lavik di bhum palei pala anak tal, Bình Thuận njauk jhul khang bruk padang ngak, pasiam veik dom binek padang ia hu blaoh, mek ia tamo meng kraong ribaong saong buh jien tame padang ngak birau dom danak dak ba ia birau. Hu yau nan meng pasiam hu bruk dom binek padang ia praong gam kurang ia saong ia nduac oh khang./.

Urang lang: Aí Nghiêm  2/7/2020