Danak dak ngak nong công nghệ glaong hu ba Lâm Đồng jeng labik dang akaok taneh aia ka bruk pala njam hacih sa-at tui tanut di VietGap saong GloboGap. Ralo janih njam hu pala rilo piah pablei nan ye bruk pablei kaya nong tabiak negar langiu urak ini meblah jaik 80% jien mek tame meng bruk pablei tabiak negar langiu di tinh. Tapa danak dak ngak nong công nghệ glaong hu daong ka ralo urang nong saong doanh nghiệp ngak kaya meda. Ini jeng lac jalan nao daong ka Lâm Đồng peih ngak siam danak dak pakat negar ka bruk padang ngak palei pala bahrau. Urak ini jien mek tame kuhria rah tapa yaok thun meng bruk ngak nong di tỉnh hu labaih 45 triệu đồng sa ha; daok dom bhum pala njam, bingu dalam sang kareih di dom doanh nghiệp, bhap bani meda mek hu labaih 500 triệu đồng tal 1 tỷ đồng yaok ha. Dalam tukvak tua riya pandiak bhang daok khang yau urak ini, dom labik ngak nong công nghệ glaong di tỉnh jeng takik pambak tal. Ong Phạm S, Phaok Akaok Ủy ban bhap bani tỉnh Lâm Đồng brei thau: Bhum pala njam, bingu, kayua hu tacei pato jalan ngak dalam ralo thun tapa nan ye mikva hu pandar  công nghệ glaong, pruh aia patak pataom; kuac rok ribaong kraong saong klah rabha halau aia, nan ye kan kandah di tua riya pandiak bhang oh pambak rilo tal bhum pala njam, pala bingu. Yau nan min, tui kuhria mboh dahlau dalam tukvak anak tal dom labik bhum glaong saong labik pala njam, bingu jeng meda kurang aia. Nan ye, tỉnh pataom tame khai thác ribaong kraong saong pruh aia patak pataom piah patrun khat lahik ka mikva urang nong.

Di ban Đà Lạt saong dom huyện hu bruk ngak nong công nghệ glaong yau Đức Trọng, Đơn Dương…, ralo urang nong saong doanh nghiệp daok pala njam, bingu, baoh karaoh dalam sang kareih. Ini lac bruk ngak pandar công nghệ bahrau tui jalan tự động hóa saong điện khí hóa. Kayua yau nan ye, bruk pabak điện tani tanat lac bruk ba tal jak jeng saong kein laba glaong ka urang nong. Tukvak tapa, Công ty Điện lực Lâm Đồng hu patagok pren khang saong pandar ralo công nghệ bahrau piah paglaong chất lượng điện áp, pabak điện gam gam saong grap tanat. Abih di nyu, dalam tukvak tabung glaong bilan bhang urak ini, Điện lực Lâm Đồng pabak tame 100 trạm biến áp; saong jak ba bhap bani payeng gauk pruh ia piah plaih quá tải lưới điện, khik ginup điện brei ka bruk ngak mbang pala drak di bhap bani. Ong Nguyễn Văn Dũng, Phaok Akaok Công ty Điện lực Lâm Đồng brei thau: Điện pak ini mikva urang caong hu gam gam, pagap yau điện truac ka bingu cúc, ka dom janih njam patam. Meyah lahik điện dalam dom tuk ye nyu meda ngak patrun năng suất phun pala. Kayua yau nan ye khaol dahlak hu brei urang jakar khik iek, caga dom trang thiết bị, langyah tuk hu sự cố rah tabiak tui jalan samar di abih. Tuk padeih, patrun bruk pabak điện ye njauk samar brei ka bhap bani, brei ka doanh nghiệp  thau piah kuhria caga bruk ngak di drei.

Taphia dom laok hamu traong nde  tasak mekre pandar công nghệ pruh aia sit sit, hu yaom pablei meng 50 ribau tal 80 ribau đồng sa ki-lô-gam, amuk Lê Thị Vũ, po trang trại  pala njam, baoh karaoh dalam sang kareih di bal sit Liên Nghĩa, huyện Đức Trọng brei thau: Điện pabak siam ka bruk ngak di bhap bani. Taong abih bruk pala drak ini, meyah oh hu điện siam ye drei oh pala drak hu tui jalan công nghệ glaong. Meyah lahik điện ye dom janih phun pala dalam sang kareih meda thu hala, meda ngak khut abih dom janih pandap.Meng hu gah điện lực pabak điện siam dahlak meng ngak hu công nghệ ini.

Meng labaih 300 ribau ha taneh ngak nong, tỉnh Lâm Đồng urak ini hu labaih 55 ribau ha pala njam hacih, sản lượng mek hu labaih 2,5 triệu tấn yaok thun, meblah 11% dom njam patam dalam negar. Lâm Đồng urak ini lac tỉnh meblah tal 45% sản lượng bingu cakak dhar dalam negar ngan haong labaih 2,7 tỷ dhar yaok thun, dalam nan 74% brei ka bruk pablei tabiak negar langiu. Tapa nan brei mboh kein laba, jak jeng di bruk patagok ngak nong công nghệ glaong di Lâm Đồng, abih di nyu nan lac dalam tukvak daok rah tabiak tua riya pandiak bhang khang yau urak ini./.