Urang hu tangin gheih peih mbeik lan biak sami samar 

Lac urang hu mbaok tapak tame tal pathram, pato jalan ngak harak gar piah padang saong patagok palei ngak lan am Hamu Craok jeng pandap OCOP dalam danak dak “Yaok xã sa janih pandap”, ong Đàng Chí Quyết, Akaok khu phố Bàu Trúc, bal sit Phước Dân, huyện Ninh Phước brei thau: meng rilo thun ini mai, piah pabak bruk blei pandar di darak pasar, dom janih pandap lan am di palei ngak hu pamaong tal bruk ngak biak bahrau min jeng daok khik hu janih biak karei di lan am oh hu kapal pa-yeng, taong abih tok ngak meng tangin. Urak ini dom nghệ nhân di palei ngak lan am Hamu Craok biak kham merat ngak tabiak rilo janih pandap, mẫu mã bahrau biak karei saong abih di nyu lac chất lượng, piah pabak tiêu chí ka pandap panda mek hu chuẩn danak dak OCOP:

Caong khin lac tapa danak dak OCOP ini, pandap panda di palei lan am Hamu Craok meda mek hu tiêu chuẩn danak dak OCOP saong tuai  mai rivang ma-in jeng yau dom darak pasar takre pandap panda gaok glah lan am Hamu Craok, meng darak pasar dalam negar tal darak pasar negar langiu."

Lan am Cam di Hamu Craok oh njauk lac pandap lan am saoh bo daok hu yaom gah sajarah, ilamo di nyu ngan haong bruk cak rok patagok rivang ma-in. Yau nan min piah ka palei ngak ini cak rok patagok khang kajap ye pandap tamo piah ngak jeng lac bruk njauk kuhria tal. Ini daok lac paga pacang piah ka pandap panda hu mbaok dalam danak dak OCOP.

Jeng yau lan am hamu craok, pandap panda palei menyim jih dalah Cam Caklaing jeng hu meng lavik mai, hu Cục Sở hữu trí tuệ brei angan lac “Angan je kapul nyaom”. Piah lagaih haong hatai takre di urang blei pandar, rilo mẫu mã hu salih bahrau, rilo sambo màu hadah hu pablak tame dom bingu hala biak gheih di urang Cam.

Yau nan min, dalam tukvak padang ngak harak gar patagok palei menyim jih dalah Caklaing jeng pandap OCOP, sa dalam dom kan kandah prong abih urak ini nan lac puk palei ini oh caga hu pandap tamo piah ngak bo rilo meng lac nao blei meng negar lingiu. Amuk Đàng Sinh Ái Chi – Phaok akaok UBND bal sit Phước Dân, huyện Ninh Phước, Ninh Thuận brei thau, urak ini jeng daok hu rilo tavak tave ka pandap tamo piah ngak yau ban, merai piah ngak dom janih pandap pablei ka tuai damuai mai rivang ma-in:

"Anak tal, khaol dahlak caong khin lac dom gah, dom pakat patui bruk sangka, daong ba, buh jien tame ngak, piah ka mikva di dua palei ngak ini taduan mek hu bruk daong meng dom sarak ưu đãi. Tapa nan palaghaih ka mikva cak rok patagok palei ngak di drei saong hu jalan langyah, gam haong puk palei piah ngak tabiak pandap tamo piah ngak, piah cak rok patagok pandap panda".

Piah ka dua palei ngak ini hu mbaok tame danak dak “Yaok xã sa janih pandap”, bruk padang pandap tamo piah ngak pak di labik brei hu puk palei kuhria tal. Daok pandap tamo piah ngak gaok glah lan am Hamu Craok, puk palei njauk quy hoạch cambaih laih bhum taneh ngak gaok glah lan am tabiak truh taneh ngak padai. Daok pandap tamo brei ka bruk menyim jih dalah palei Caklaing njauk padang veik bruk pala phun kapah.Tui Tiến sỹ Ngô Thị Thu Trang – Phaok Akaok Pasak patagok palei pala Saemaul Undong - Đại học Khoa học Xã hội saong Nhân Văn, Đại học Quốc gia Thành phố Hồ Chí Minh, dahlau diah, Ninh Thuận lac labik pala kapah hu angan. Tuk pala kapah oh lac tok cak rok patagok pandap tamo piah menyim bo khaol drei meda padang sa palei rivang ma-in di pak ini.

"Phun kapah lac biak gheih mekre, yaok urang meda thaot binguk. Abih di nyu lac ilamu menyim meng kan di bangsa Cam pak ini meda ba mai yaom glaong biak prong oh lac ka pandap ngak meng tangin bo daok cak rok patagok bruk rivang ma-in, palei pala bahrau di bhap bani Cam Ninh Thuận".

 “Yaok xã sa janih pandap” (OCOP) nan lac dandak dak patagok bruk ngak mbang kinh tế bhum palei pala, ngan haong pasak lac cak rok patagok dom janih pandap panda, biak karei di yaok bhum,hu karja daong gah sarak, ilamu, phun jien saong darak pasar piah ba mai yaom glaong di abih. Bahrau ini, Hội đồng taong yaom, dak labik dang pandap OCOP tỉnh Ninh Thuận hu peih bruk taong yaom, brei tanut saong dak labik dang 69 pandap OCOP pakat tỉnh thun 2020 di dom labik dalam 7 huyện, ban di tỉnh… Pak ini, 8 janih pandap hu prein khang mek hu 5 baoh patuk, 15 pandap mek hu 4 baoh patuk, daok veik mek hu 3 patuk. Yau nan min, dalam mbang taong yaom, dak labik dang mbang ini pandap panda di dua palei ngak meng kan di urang Cam oh ka hu brei tanut dom baoh patuk, kayua oh ka ngak salah blaoh harak gar tut angan tui bộ tiêu chí taong yaom pandap panda OCOP.

Ong Đặng Kim Cương – Akaok Sở Ngak nong saong patagok palei pala  tỉnh Ninh Thuận brei thau,bruk taong yaom, dak labik dang pandap OCOP daok jeng pren khang piah pachreih ba, ngak bahrau bruk ngak mbang kinh tế palei pala,bhum ceik, bhum atah bayah,bhum urang bangsa takik.Bruk ini daok ngak jeng pren khang ka dom puk palei tui jalan khang kajap,brei mboh labik dang ka pandap panda di bhum palei. 

"Anak tal daok meyaih khan dom janih pandap tui tiêu chuẩn saong tui chuỗi giá trị piah pambuak labik pablei tabiak pandap panda, meng bruk pala drak, tal bruk ngak tabiak saong blei veik abih pandap panda piah paglaong yaom pandap panda di puk palei".

Urak ini dom janih pandap di dua palei ngak meng kan di urang Cam oh lac tok duh ka darak pasar dalam negar bo daok pablei tabiak negar langiu.Kayua yau nan ye, bruk padang pandap panda di dua palei ngak meng kan di urang Cam piah hu mbaok tame danak dak OCOP piah ba dom palei ngak ini cak rok patagok dom janih pandap siam jang,meng nan paglaong jien mek tame ka bhap bani saong brei mboh angan je di drei angaok darak pasar./.  

Urang lang: Jasi -20/12