Dom harei ini, saai Lê Minh Hùng saong dom urang ngak bruk haong gauk dalam chi hội ngak pahala Sa hatung hatian di phường 14, quận 5, ban raya HCM daok caga ka mbang nao brei 2.000 paok pandap ka urang taha daok sa drei saong anek saih kan kathaot daok di ban sit Đà Lạt, tỉnh Lâm Đồng. Patui di nan, dom saai hu nao brei sang anit ranam yaom labaih 50 triệu đồng ka sa baoh sang kan kathaot daok di ban sit Cần Thơ. Saai Lê Minh Hùng khan lac:

"Thau saong anit ka urang kayua dahlak saong sang dahlak hu rai diuk kan kandah yau urang. Meng nan, dahlak klah rabha hu saong dom urang kan kathaot jang drei, oh patuah jamo jang drei. Meng pren khang nan pachreih ba dahlak, dom adei saai dalam chi hội saong dom ayut sahabat di dahlak ba gauk  ngak pacadu pandik harao meng hatai anit ranam. Mek bruk klah rabha ngak bui sambai, piah gum nao bruk kan kandah, pandik harao jeng yau hoàn cảnh di baoh sang. Piah klah rabha hong taneh ia nan lac trách nhiệm di sa công dân, di urang VN drei, nan ye brei  daong ba gauk”.

Luac 20 thun tapa, chi hội ngak pahala Sa hatung hatian kayua saai Lê Minh Hùng dang akaok hu pambuak bruk saong urang jakar ralo puk palei dalam taneh ia, peih yaok rituh mbang nao ngak pahala. Urang hu sa-ai nao ngak pahla nan lac dom urang ruak gila, urang cai nghiện, urang taha daok sa drei, urang njauk jru mek klik kroc, uranaih joh jo… Chi hội hu peih ralo mbang iek ruak saong brei saoh jru, daong ka bhap bini njauk bala, ribuk ia sua, alin hadiah radaih lăn ka urang joh jo gaok kan kandah, alin hadiah jien bac ka anek saih kan kathaot kham merat bac daa, padang ngak sang anit ranam, sang tình nghĩa… … Kuhria rah tapa yaok thun, chi hội ngak pahla Sa hatung hatian hu meng 5 tal 10 mbang nao alin hadiah pandap, iek ruak kik, yaok mbang abih meng 100 tal 150 triệu đồng. Nan oh ka ndom tal bruk daong ka yaok pluh urang yaok thun gaok ruak kan kandah, njauk bala đột xuất…..yaom labaaih 200 triệu đồng yaok thun.

Dom bruk ngak hu kein lagaih di chi hội ngak pahla Sa hutung hatian kayua saai Lê Minh Hùng pal akaok chi hội hu rik daong oh lac sit tame bruk daong ka dom urang gaok kan kandah yam tagok dalam rai diuk, rik daong tame bruk peih ngak sarak an sinh xã hội di Đảng saong karja. Ong Nguyễn Bình Trứ, phaok akaok kapul chữ thập đỏ ban raya HCM brei thau:

 “Lac urang abih hatai jai ka bruk ngak pahla, dalam tukvak tapa, chi hội di saai ala bruk tacei pato di saai hu ngak biak siam dom bruk ngak pahala di quận 5. Saong bruk ngak di dom kapul nyaom karei hu jak ba ieu daong ka urang kan kandah ye chi hội di saai jeng hu mbaok tame biak siam. Oh lac jak ba daong dalam quận bo saai daok nao tal dom labik atah bayah, bhum kan kandah di dom tỉnh karei piah daong ka ralo urang oh patuah jamo, daong urang yam tapa kan kandah ba drei tame saong bhap bini”.

Ong Trương Ngọc Long, phaok akaok kapul chữ thập đỏ quận 5, lac:

 “Chi hội ngak pahala Sa hatung hatian di phường 14 yaok thun hu ralo mbang nao ngak pahla dalam taneh ia. Yaok mbang nao alin hadaih meng 500 tal yaok ribau paok pandap, yaok paok pandap yaom meng 300 tal 500 ribau đồng. Ini lac bruk ngak biak siam piah klah rabha kan kandah di bhap bini ngan saong bruk ngak pahla di Đảng, di karja, dalam nan hu chữ thập đỏ”.

Meng dom bruk ngak hu, ngak jeng biak praong dalam bruk ngak pahla, saai Lê Minh Hùng, akaok chi hội ngak pahla Sa hatung hatian di phường 14 hu hội chữ thập đỏ quận 5 pok panuac brei harak meyaom di TƯ hội chữ thập đỏ VN saong harak meyaom di UB bhap bini ban raya HCM./.