Tui kuhria harei 8/4, TAND tỉnh Đắk Nông brei peih bruk langya urang njauk duas ngak tabiak, pablei salih xăng ja 

Lễ tuyên thệ taduan ngak Akok negar meng 9 tuk harei inin 5/4. Ong Nguyễn Xuân Phúc – UV Mentri Chính trị hu QH mbang XIV palih ruah pok ngak Akok negar CHXHCN Việt Nam, vaktu 2016-2021di mbang nyaom ka 11. Ong Nguyễn Xuân Phúc ndih tapui harei 20- 7-1954; palei di xã Quế Phú, huyện Quế Sơn, tỉnh Quảng Nam; lac Uỷ viên Mentri Chính trị mbang XI, XII, XIII; urang Quốc hội mbang XI, XIII, XIV. Ong Nguyễn Xuân Phúc hu taong yaom lac urang “ndem nao gam saong ngak” dam padang sa Rajaei dak padang, liêm chính, ngak bruk, kỷ cương.

Mintri Y tế mesup ni (5/4) khan lac oh hu urang halei dương tính haong nCoV. Njom mbak dalam bhap bini dalam negar labaih 2 bilan tapa jeng dok lac 910 urang. 24 tuk tapa, hu 2 urang njaom meng negar lingiu tame. Jit ruak dalam negar meda lac daok pasang iek hu. Rilo tỉnh, ban hu labaih 1 bilan oh hu urang halei njom bahrau dalam bhap bini. Tui, danak dak klauk jru peih prong pakat negar meng harei 29/3 - 4/4, hu 9.158 urang hu klauk vaccine Covid-19 di 12 tỉnh, ban.

Tui Đài khí tượng thủy văn bhum Nam Bộ, urak ini langik la-ar daok trun gah meraong yau nan ye langik bhum meraong negar meda siam lagaih, hu hjan di dom labik. Nhiệt độ meng harei 5/4 tagok hasit, ralo meng daok di tanut 34 tal 36 độ C, hu labik labaih 36 độ C di bhum Đông Nam Bộ saong meng 33 tal 35 độ C di bhum Pei negar. Dom harei hadei di nan, pandiak gilac veik di bhum Đông Nam Bộ saong dom labik di bhum Pei. Dalam 3 harei anak tal, chỉ số tia cực tím di bhum Meraong biak catang, bhap bini njauk brei caga.

Tui kuhria harei 8/4, TAND tỉnh Đắk Nông brei peih bruk langya urang njauk duas Trịnh Sướng song 38 urang ka bruk ngak tabiak, pablei salih xăng ja. Tapa pasang iek, duah thau, Trịnh Sướng haong dom urang karei ngak tabiak labaih 133 triệu lít xăng ja, jiak 1,6 triệu lít menyek DO ja, abih tih yaom xăng ja samu song yaom xăng biak labaih 2.500 tỉ đồng. Trịnh Sướng laba hu abih tih labaih 102 tỉ đồng tuk pablei tabiak drak pasa jiak abih dom xăng, menyek ja.

Tổng Thanh tra Rajaei iew UB bhap bini Ninh Thuận langyah ka jien padai ngan saong yaom jien abih tih labaih 194 tỷ đồng. Dalam nan, mek veik jien brei kadung karja labaih 188 tỷ đồng; trun phun jien caga padang ngak, trun yaom pambuak bruk dak padang, trun jien bayar gah tacei pato, trun jien kuhria iek brei salah jaik 6 tỷ đồng. Phun jien labaih 188 tỷ đồng lac jien khat lahik, bayar oh njuak tui bruk ba tabiak meng dom dabak dak peih ngak di tỉnh Ninh Thuận tukvak tapa.

Huac kanda anak dom biến thể bahrau di virut ba tal Covid-19, Rajaei Anh caga pabak 4 negar tame angan dom “bhum meriak” bo tuai dunya oh brei tame. Nan lac Băng-la-đét, Kê-ny-a, Pa-ki-xtan song Phi-lip-pin. Tui Mintri jalan mbak pajeng ba Anh, dom negar dok dalam harak angan “bhum meriak” tagok tal 39. Tui nan, tuia dunya tabiak nao atau nao tapa meng dom bhum dalam harak bhong dalam 10 harei jiak di abih oh brei tame negar Anh.

Tây Ban Nha birau taduan anek kamar akaok meti di taneh ia ini hu prein khang pacang virus SARS-CoV-2 hadei di tuk urang maik hu klauk jru pacang ruak Covid-19 tuk metian praong jaik ndih tapui. Bruk anek kamar likei birau ndih tapui nan lac sa bruk roh duah ka vaccine Covid-19 ngan saong urang kumei metian di Tây Ban Nha. Dom urang ilamu lac bruk nan meda peih tabiak jalan klauk jru vaccine Covid-19 ka urang kumei metian piah pacang caga hu ruak ka urang maik saong anek.

Takik di abih 50 urang metai hadei di tuk ia sua song glut jaleih taneh rah tabiak di gah timur Indonesia song negar dok jiak tapen Timor Leste mesup harei kabroi (4/4), dom urang jakar khan lac menuac metai meda hu rilo jang. Ia sua kayua hajan khang palai pajoa dom palao kaoh meng palao Flores di Indonesia tal Timor Leste. Karja song bhap bini dok samar padang tatua pambuak dom labik njauk pacang cakak nao mai piah ba dom urang njauk bala tabiak truh dalam tuk jamriak trak kan tame hu labik glut jaleih./.

Urang lang: Hani Pha – Ái Nghiêm – 05/04 10:24:14