Urang ngak bruk pahla ka urang kan thaot dalam tuk jit Covid 19

Hadei di sa tukvak kreik pabah mbang, bahrau ini, Cty An Phát Cường, daok di ban sit Dĩ An, tỉnh Bình Dương, rilo meng ngak dom janih pandap meng kayau hu peih ngak veik. Hu mai ngak bruk veik, labaih 300 urang ngak biak uan tabuan, kayua hu tabiak truh bruk oh hu bruk ngak piah duah jien. Amuk Nguyễn Thị Thu, Kế toán trưởng Cty An Phát Cường brei thau, dahlau daih oh hu harak pambuak bruk blei pandap, Cty brei urang ngak padeih 15 harei. Dalam tuk padeih nan, Cty hu daong yaok urang meng 1 triệu tal 1 triệu meteh. Hadei di nan, mBan Yam ndok kham merat duah labik khin blei pandap piah khik bruk ngak ka urang ngak:

“Doanh nghiệp hu khan brei urang ngak thau bruk kan kandah meng jit ruak saong hu rilo kham merat daong ka urang ngak piah urang kak kajap haong Cty. Hadei ini, tuk abih jit ruak jeng daok ginup menuac ngak piah ngak hu pandap tui harak pambuak bruk di urang blei”

Oh njauk lac Cty halei jeng peih pabah mbang ngak bruk veik hadei di jit ruak yau An Phát Cường, kayua tui yaok pataom di Liên đoàn Lao động tỉnh Bình Dương brei mboh lac, labaih 240 doanh nghiệp gaok kan kandah kayua jit ruak Covid-19, dui tui jaik 130.000 urang ngak brei padeih ngak, padeih bruk oh mbang jien bilan… Lahik bruk ngak, jeng hu makna lac jien mek tame di urang ngak jeng trun daok takik.

Nao gam haong urang ngak, dom pakat công đoàn di Bình Dương gam gam peih ngak rilo danak dak sangka ka nyu lagaih saong taduan hu bruk daong brei di dom urang ngak pahla. Meng nan, yaok rabau pok pandap di dom urang ngak pahla hu ba tal sang trọ alin hadiah ka urang ngak gaok kan kandah. Taduan hu dom pok pandap nan, urang ngak atah palei di Bình Dương biak drut drui:

 “Oh ngak hu jien min hu bruk daong jeng hu pandap mbang yaok harei.

 "Oh thau ngak hagait tabiak jien. Jien pah labik daok 1,1 triệu yaok bilan, po labik  pah daok trun brei 200.000 đồng, daok 900.000 đồng oh hu jien bayar, nan ye likau trun meneing piah 3 amaik anek diuk tapa harei".

"Hu daong biak uan tabuan lo, tuk vil val drei daok hu menuac sangka tal drei, rambah lo thau ngak habar ini”

Meyah dom thun dahlau, di Bilan urang ngak, công đoàn dom doanh nghiệp kuhria caga dom bruk ngak piah ba bui sambai ka urang ngak, ye thun ini urang caik abih prein yava tame daong ka bruk mbang ngui di urang ngak gaok kan kandah kayua jit ruak Covid-19. Urang jakar công đoàn jeng daok padang angan dom urang ngak lahik bruk piah hu mbang tui meng pok jien daong 62.000 tỷ đồng di Rajaei; atau hu daong meng kadung jien công đoàn Bình Dương alin hadiah.

Amuk Nguyễn Hoàng Bảo Trân, Phó Chủ tịch Liên đoàn Lao động tỉnh Bình Dương brei thau, bruk daong, duah jalan ka urang ngak hu bruk ngak, mai veik ngak bruk tani tanat lac bruk praong njauk ngak chip. Kayua yau nan ye urang pan akaok tỉnh Bình Dương hu tacei pato dom gah abih drei daong brei piah ka doanh nghiệp samar hu ngak bruk veik:

“Kol dahlak hu tacei pato dom pakat công đoàn pambuak haong jabat di drei hu pok jien daong, hu danak dak, hu pandap daong tal tangin urang ngak, jak ba po sang brei pah labik daok klah rabha kan kandah haong urang ngak. Kol dahlak caong khin dom doanh nghiệp hu rilo jalan ngak piah khik bruk ngak ka urang ngak hu ginup jien mbang huak yaok harei”

Jit ruak Covid-19 ngak kan kandah khang tal raidiuk urang ngak. Dalam tuk nan, dom bruk ngak siam lagaih di dom pakat công đoàn dalam tỉnh Bình Dương hu daong ka rilo urang ngak atah palei mboh bui hatian, sambai hatai./.

Urang lang: Mousaphuong -24/5