Bruk blei pandap tapa online patagok hu siam lagaih

Ngak tui panuac jak ba di Trung ương Mặt trận Negar Việt Nam saong Akok negar, tal harei ini hu 105 kapol nyaom, doanh nghiep, menuac urang di Ban raya HCM tut angan rik tame labaih 2.293 tỷ đồng piah blei jru vaccine pacang caga Covid-19. UBMT negar Viet Nam Ban raya HCM taduan hu labaih 281 tỷ đồng jien di dom kapol nyaom, doanh nghiep, menuac urang rik tame piah blei vaccine pacang caga Covid-19.

Liên hiệp HTX pablei salih TPHCM (ieu katut lac Saigon Co.op) brei thau, hu brei patagok pandap khik piah, pabak ginup haong yaom kaom tani tanat darak pasar dalam takik di abih lac 6 bilan tal, dom janih pandap mbang menyum yaok harei yau ye saradang, brah, menyek mbang, ia masin, ralow, baoh ada baoh menuk, njam patam baoh kraoh, haong dom janih pandap pacang jit yau dom gel, ia rao tangin, sabon, pataih pacang mbaok. Taong abih dom janih nan hu rilo jang meng 3-5 mbang. Kayua yau nan ye, oh tuk halei kurang pandap panda dalam luac tukvak brei pa-atah di gauk, saong siêu thị peih pablei gam nan ye bhap bini jhui blei piah rilo, pataom gauk nao blei rilo mbuan ngak ka jit ruak tagok glaong.

Harei akaok meti peih ngak Sarak 16/CT-TTg di Ban raya Hồ Chí Minh, bruk blei pandap tapa online patagok hu siam lagaih, tuk urang payua angan pandap blei angaok online mai rilo  ka dom labik pablei pandap yau: Co.opmart, Co.opXtra, LOTTE Mart, MM Mega Market, Big C...Dalam nan, rilo labik pablei pandap di Ban raya HCM pataom prein khang tame piah pabak sumu bruk blei online ngan saong đơn hàng tagok labaih 10 mbang dalam dom harei akok bilan 7 thun 2021 saong kadun tukvak jao pandap ka urang saong sanya brei jao pandap dalam 3 harei ka urang blei. Dalam 2 adit meng dah page 9/7/2021,  dich vu beĐichợ jeng hu daong rilo ka urang blei hu mbuan lagaih dalam bruk blei dom pandap pandar yaok harei.

Tukvak ini, thanh long di  tỉnh Bình Thuận daok tame bilan paik baoh, tui kuhria, baoh paik hu meng ini tal puac thun 2021 lac 437.000 tấn. Anak bruk kan kandah kayua jit Covid-19, UBND tỉnh Bình Thuận hu panuac ieu dom gah pambuak tal, pataom tame jhul khang bruk pablei baoh thanh long tabiak negar lingiu, jhul patagok bruk pablei thanh long di darak pasar dalam taneh ia saong jhul khang bruk pablei salih điện tử…Gam haong nan, UBND tỉnh Bình Thuận jeng hu panuac caong dom doanh nghiệp brei jhul khang bruk blei veik tuk kan kandah piah ba tame khik piah, cang tuk lagaih ba tabiak negar lingiu pablei. Lingiu di baoh thanh long, meng ini tal puac thun 2021, tỉnh daok hu rilo janih kaya nong saong kaya ikan karei jeng caong hu pablei, yau katak cao su,  hadang thẻ takai patih tui kuhria hu labaih 142.000 tấn.

Huyện Châu Đức, tỉnh Bà Rịa-Vũng Tàu lac huyen hu taneh riya, langik tasik lagaih abih piah pala phun ca cao di tỉnh ini, ngan saong taneh praong labaih 500 ha ca cao, asar paik hu meng 2,4 -3 tấn asar thu sa hecta. Tukvak tapa, C.ty TNHH Sa thành viên ngak tabiak cacao Thành Đạt (Bà Rịa Vũng Tàu) pambuak saong urang ngak nong tacei pato pala saong iek glang phun ca cao tui jalan hữu cơ. Langiu di nan, hu pasang iek catang meng bruk pala tal bruk palih ruah baoh, paok kanduh tal bruk tagok men, pambu, hana…piah ngak tabiak cacao hữu cơ siam di abih. Urak ini, pandap cacao di c.ty ini hu rilo urang negar langiu caik hatai tal.

Jabat jru tavao Mỹ Pfizer brei thau lac meda ieu Jabat khik iek jru tavao saong pandap mbang Mỹ brei bruk klauk vaccine Covid-19 mbang klauk veik di drei dalam bilan tal. Mikael Donsten, urang ilamu dang akaok di Phai-dơ brei thau,  vaccine di hãng ini hu siam lagaih rilo dalam pacang caga biến chủng Delta, min meda oh patuah njom veik hadei di 6 bilan kayua kháng thể meda trun meneing prein pacang caga ruak. Ong Dolsten brei thau, meng dom roh duah di Pfizer brei mboh lac 1 mbang klauk veik ka 3 hu ngak tabiak kháng thể glaong jang meng 5 tal 10 mbang klauk ka 2. Pfizer urak ini daok kuhria ngak 3 tỷ mbang vaccine dalam thun ini saong 4 tỷ mbang dalam thun anak tal.

Mesruh gauk, jit praong Covid-19 saong biến đổi khí hậu daok ngak trak damak jang bruk eik lipa saong kurang pandap mbang di dunya. Ini lac panuac brei thau dahlau hu ba tabiak di harei kabroi di Gah langiu Rajaei Oxfam, dalam tuk menuac gaok bruk kurang pandap mbang di dunya yam tapa 155 trieu urang. Urang jaik iek lipa jeng tagok tal 520 ribau urang, glaong jang 6 mbang dut saong thun 2019. Tui Oxfam, meyah oh ngak samar chip, ye tal puac thun ini, yaok sa minit meda hu 11 urang metai kayua eik lipa, glaong jang urang metai kayua jit  praong Covid-19 urak ini lac 7 urang yaok minit.

Harei kabroi, gah an ninh Haiti cap mek 17 urang gam tal bruk cuh metai Tổng thống Jovenel Moise, dalam nan hu 2 urang lac urang Mỹ hu asal Haiti. Hadei di tuk bruk nan hu brei thau, gah Mỹ hu panuac caong daong bruk duah thau, lac bruk daok ngak ka taneh ia bhum Caribe ini laik tame srau kadau. Tổng thống Moise metai nao, daok caik veik labik huan gah quyền lực praong di Haiti, tui bruk di urak ini, oh ka thau urang halei pan bruk salih ka ong Moise./.

Urang lang: Ái Nghiêm – M. Phương – 10/07 06:30:00