Menek tabiak saong prong tagok di palei Caklaing – sa palei menyim
jih dalah daneiy angan di urang Cam pak Ninh Thuan, meng sit Quang Van Son mboh
takre bingu la jih dalah di ong amuk ong kei drei. Min kadha ngak ka Sơn njauk caik
hatai saneng saong sangka ralo jang nan lac dom thaik binguk hu sarak angaok
mbia patau saong angaok dom bimon kalan di urang Cam. Piah pabak hatai takre di
drei, urang likei dam bangsa Cam ini yam tapa abih dom kan kandah di sang drei
piah cih angan tame ngành Khảo cổ di sang bac Đai hoc Khoa học Xa hoi saong
Nhan van bal raya Ho Chi Minh. Hadei di tuk hu bằng đại học dalam tangin, sa-ai
oh nao likau bruk ngak bo quyết định kacah tagok Cao học piah patui veik jalan
bac megru di drei. Urak ini sa-ai daok ngak Phaok Akaok Pasak UNESCO Roh duah
saong khik ramik Ilamo Cam pak bal raya Hồ Chí Minh.
Bac tamat Trung học phổ thông, sa-ai pakacah tame sang bac Trung cấp Lương thực – Thực Phẩm bal raya Hồ Chí Minh. Tui bac hu sa thun saong mek hu pok jien bac di sang bac ini min trak hatian haong bruk roh duah ilamo di bangsa nan ye sa-ai klak bac meteh dhi sang bac Trung cấp Lương thực – Thực Phẩm piah kacah tame gah Khảo cổ học di sang bac Đại học Khoa học Xã hội saong Nhân văn bal raya Hồ Chí Minh. Sang kathaot ralo adei sa-ai nan ye Sơn nao ngak thêm ralo bruk piah hu jien mbang bac 4 thun dalam bal raya Hồ Chí Minh. Rambah rambup lac yau nan, blaoh blai sa-ai jeng pal hu blah bằng đại học dalam tangin di thun 2008. Hadei di tuk bac tamat blaoh Sơn hu mbaok gam haong dom urang jakar dalam Bộ môn Khảo cổ, Khoa Lịch sử, Sang bac Đại học Khoa học Xã hội saong Nhân văn bal raya Hồ Chí Minh coh rok ralo inem mek yau: inem mek Gò Ô Chùa pak Long An saong Gò Cây Tung pak An Giang, inem mek Gò Me – Biên Hoà – Đồng Nai, inem mek Thành Hồ - Phú Yên… Oh padeih di nan, thun 2010, Sơn pakacah tame cao học piah patui veik jalan bac megru di drei. Quảng Văn Sơn brei thau: Kayua meng sit hu taom gaok ralo kaya kan klak di urang Cam, ka dua tra dahlak biak takre ilamo Cam saong pak sang hu ralo harak vak meng Thrah, akhar Hán, dalam tuk roh duah dahlak biak takre nan ye darak quyết định pakacah tame sang bac Đai hoc Khoa hoc Xa hoi va Nhan van ban raya Ho Chi Minh.
Kadha ngak ka khaol dahlak iek prong Sơn nan lac hatai takre roh
duah ilamu saong bruk yam tapa kan kandah. Menek tabiak saong prong tagok dalam
sa baoh sang kathaot hu ralo adei sa-ai. Dom sa-ai di Sơn njauk klaak bac meteh
dhi piah daong amaik ame nao ngak duah jien cai pandar tapa harei. Sang kathaot
gilac takre gah roh duah, khảo cổ, gaok tuk mai si klaak bac meteh dhi min Sơn
yam tapa abih piah ngak ka ba hu hatai caong di drei. Ndom ka anek saih di drei
– Phó Giáo sư – Tiến sĩ Thành Phần – Gru pato di Sang bac Đại học Khoa học Xã
hội saong Nhân Văn bal raya Hồ Chí Minh lac: Ja Sơn nan lac sa urang abih hatai dalam bruk roh duah, min sang nyu
kathaot ralo, nan ye tuk nyu pakacah tagok cao học nyu hu mai khan haong Gru.
Gru lac merat nao, meyaih oh hu jien mai sang Gru daok gru blei jien nao bac,
Min njauk mek hu bằng thạc sĩ.
Urak ini Quảng Văn Sơn nan lac Phaok Akaok Pasak UNESCO Roh duah
saong Khik ramik Ilamo Cam pak bal raya Hồ Chí Minh. Ngan haong Sơn, hu
bac saong hu roh duah dom inem mek, inem krung ilamo Cam nan lac kadha bui
sambai prong. Dalam tukvak tapa, Sơn hu ralo kadha roh duah ilamu hu ba
tagok Tạp chí Khảo cổ, kỷ yếu di Pasak UNESCO Roh duah saong Khik ramik Ilamo Cam;
hu mbaok dalam ralo mbang nyaom biai dalam saong langiu negar saong hu dom urang
ilamu taong yaom glaong. Tiến sĩ Trương Văn Món, gru pato di Sang bac
Đại học khoa học Xã hội saong Nhân Văn bal raya Hồ Chí Minh – Akaok pasak
UNESCO Roh duah saong Khik ramik Ilamo Cam brei thau: Tui dahlak mboh ja Sơn nan lac urang ngak bruk hu ilamu, abih hatai
dalam bruk ngak meng tuk sinh vien mai. Tamat blaoh Đại học nyu patui veik
pakacah tagok Cao học saong hu Pasak UNESCO Roh duah saong Khik ramik Ilamo Cam
daa mai ngak bruk saong mboh nyu ngak siam, ngak jeng.
Oh lac takre gah khảo cổ, takre dom inem krung ilamo Cam, Quảng
Văn Sơn daok trak hatian haong palei ngak meng kan di palei drei, ka bruk daok
atau lahik di gah menyim jih dalah. Mai meng nan bo kadha roh duah ilamu“Khik
ramik saong Patagok bruk menyim jih dalah di urang Cam palei Caklaing” di
Quảng Văn Sơn mek hu Giải nhì Roh duah Ilamu di sang bac Đại học Khoa học
Xã hội saong Nhân văn bal raya Hồ Chí Minh saong Giải Khuyến khích Roh duah
Ilamu di Mentri Pato megru.
“Oh hu jalan halei tapak samu”, hu thau lac jalan nao tal ilamu
jeng daok ralo cuang kandah, glaih glar, min ngan haong hatai kham merat, khin
saneng khin ngak, oh kanda huac cuang kandah rambah rambup, jia lac cei dam
urang Cam takre gah khảo cổ ini meda ngak hu ngak jeng tui hatai takre di
drei./.
Kadha vak di Jasi
Viết bình luận