Limo glai hu ba mai labik dok bahrau di Ninh Thuận 

Dahlau deih, tapol limo glai lai 11 drei dok dalam danak dak pasiam limo glai lai quý hiếm, kayua Pasak pandar  ilamu - Công nghệ tỉnh Lâm Đồng ngak po danak dak  (peih ngak di tỉnh Ninh Thuận). Sahneng lac, meng phun jien buh tabiak labaih  5 tỷ đồng ka danak dak, tapol limo hu tagok khang piah khik ramik gen quý. Min biak tatuak drei lac, kayua brei mbang hareik thu nan ye tapol limo lavang lavaih, oh dok pren duik. Hadei di tuk menuac sia ndom puac khang, 11 drei limo glai nan hu tỉnh Ninh Thuận jao ka Mban khik ramik bein pakat negar  (VQG) Phước Bình iek glang. Meng nan, tapol limo glai lai mboh yau jaik metai, urak ni hu diuk veik, khang kadang..

Dom bilan hadei di tuk bein pakat negar Phước Bình taduan iek glang, tapol limo glai lai 11 drei hu siam veik, lamek tagok tapa yaok harei. Abih di nyu nan lac, akaok bilan 12-2020, drei limo glai binai  lai F2 bo Pasak pandar ilamu - Công nghệ tỉnh Lâm Đồng blei veik meng sang ong Nguyễn Đình Tích (palei Bạc Rây 2, xã Phước Bình) menek hu 1 sa drei limo anek binai  khang kajap, trak labaih 25kg.

Tui  saai  Võ Đăng Khiêm – daok ngak bruk di jabat ilamu pambuak bruk dunya Bein pakat negar Phước Bình, lac urang iek glang tapol limo glai  lai, brei thau,  drei limo anek bahrau menek oh karei hagait limo glai, bahrau menek tabiak eng drei dang tagok chip. Patui di nan, drei limo anek meda nao mai biak khang kadang song 2 harei hadei, nyu nduac grauk labik dalam var ro. Saai  Khiêm ndom lac “Tuk limo lai F2 menek limo anek, tong abih adei saai di bein pakat negar Phước Bình biak bui sambai, kayua dahlau deih, yau dom drei limo glai lai karei dalam tapol, drei limo amaik lai F2 eik lipa lavang daok talang, min dok rong anek dalam tain”. 

Mai tal bein pakat negar Phước Bình, karei jang bruk 11 drei limo glai  lai lavang lavaih mbuan si metai eik,urak ni tong abih 11 drei limo glai lai jeng samar hu siam veik. Meyah dahlau deih, tapol limo eik lipa mboh biak slut mbut  kayua oh hu pren yava, ye urak ni nyu biak jhak tuk mboh binguk menuac. Nan jeng lac bruk di athur glai daok mai veik song tapol limo glai lai ni. Daok drei limo F1 prong di abih dahlau daih jiak metai kayua eik, ye jiak 2 bilan dahau  nyu siam veik biak samar, praong, lamek biak khang kadang song mong nyu yau drei limo , “pal akaok tapol”. 

Saai  Nguyễn Văn Linh, urang ngak di bein pakat negar Phước Bình, brei thau: “Meng di tuk tapol limo hu iek glang ginup ye rilo drei nduac pagui gauk, mboh biak jhak tuk hu urang karei mai . Ni lac bruk brei mboh pren yava di tapol limo hu siam veik song daok mai veik haong bruk di limo glai. Tapol limo jeng brei mboh pren khang di drei tapa bruk meriak gauk dalam tapol. Drei limo glai lai prong abih, khang abih brei mboh lac drei pal akaok tapol. Tuk nyu oh ka mbang, ye dom drei karei jeng oh mbang song nyu pasang iek 5 drei limo binai dalam tapol piah brei mboh pren khang di nyu”.

Brei thau hatai bui sambai tuk mboh tapol limo glai praong khang tapa yaok harei, ong Nguyễn Công Vân, Yam ndok bein pakat negar  Phước Bình brei thau, hadei di tuk taduan tapol limo glai lai di harei  5-10-2020, hu bruk sangka di urang pal akaok tỉnh Ninh Thuận, Bein pakat negar Phước Bình peih bruk iek glang  patagok pren yava ka tapol limo meng bruk yaok harei sa drei limo glai hu mbang 1,5kg pandap mbang tapung, 30kg tangei  song 10kg hareik that. Meng nan, pren yava di tapol limo hu siam veik biak samar, meda menek anek dalam tuk vak jiak di abih.

Limo F2 menek anek lac sa bruk bui sambai, brei mboh lac tapol limo glai lai meda menek song khik ramik hu gen. Bui sambai jang lac urak ni  UBND tỉnh Ninh Thuận njauk hatai brei padang danak dak piah iek glang, khik caga, patagok tapol limo dalam 5 thun tal ngan song yaom phun jien abih tih tui kuhria lac 2,5 tỷ đồng. Daok bein pakat negar  Phước Bình dok padang danak dak rong tapol limo glai  lai tui jalan palao tabiak langiu angaok taneh prong labaih 5ha. Anak tal,  khol hulin meda ba 11 drei limo glai lai meng var klak mai labik bahrau di bein kayau dalam bein pakat negar. Suai lavik, meda padang labik rivang iek limo glai lai jeng sa tour rivang du lịch, piah bhap bini meda rivang iek ./.

Urang lang: Hanipha- 5/3