Tỉnh Hải Dương brei thau lac hu duah mboh asal ba tal njom mbak rilo di phường Hải Tân

Mesup ini (18/2), Mintri Y tế brei thau lac oh hu urang bahrau njom ruak Covid-19. Min dalam jaik 690 urang ruak daok taong ruak, hu 9 urang daok trak nao; 2 urang daok bika trak, mbuan metai, njauk nduac tim phổi lingiu rup pabhap (ECMO), nan lac urang ruak 1536 (79 thun) meng Mỹ mai taneh ia saong urang ruak 1823 (65 thun) daok di Hà Nội. Patuah lac hu 625 urang daok hu siam tagok, taong ruak mboh siam lagaih.

Mban tacei jalan pacang caga jit Covid-19 ban Hải Dương, tỉnh Hải Dương brei thau lac hu duah mboh asal ba tal njom mbak rilo di phường Hải Tân, tuk dahlau di nan sahneng lac oh duah mboh F0. Dom urang ruak ni hu anek ruak mai meng sruh jit di Cty Poyun daok di ban sit Chí Linh. Urak ini, dom urang ni song dom F1, F2 jeng hu brei dok karei, pasang iek catang song oh caik brei njom mbak dalam bhap bini.

Lô vắc xin camereip hu mai tal Việt Nam di harei 23/2 tal. Tui harak bahrau hu mbaoh tangin harei 17/2, Cục Khik ramik jru tavao (Mintri Y tế) taduan brei ka Cty TNHH AstraZeneca Việt Nam blei meng negar lingiu tame vắc xin pacang Covid-19 AstraZeneca, blei 204.000 mbang piah pandar chip ka bruk pacang caga jit. Dahlau di nan, COVAX – sa kapul pambuak gauk piah khik ka nyu samu gauk dalam bruk pandar vắc xin pacang Covid-19, brei thau lac meda daong ka Việt Nam tukvak camereip 4,8 - 8,2 triệu mbang vắcxin AstraZeneca. Việt Nam jeng hu kakei blei 30 triệu mbang vắc-xin ini.

Sở ilamu Thể thao song rivang main tỉnh An Giang brei thau, meng harei 9 tal harei 17/2 (lac meng 28 tal 6 bingun Tết) hu labaih 400.000 tuai tal An Giang rivang main (trun meteh dut song tuk Tết thun 2020). Piah khik caga siam mekre dalam tuk vak jit ruak Covid-19 rah tabiak srau kadau, dom labik rivang main oh peih dom bruk ngak tuk Tết Nguyên đán atau patrun bruk peih ngak piah patrun bruk pataom rilo menuac. Dalam tuk taduan raok tuai , dom labik ni hu peih bruk pacang caga Covid-19.

Pambuak tal chuyên án 920G ka pablei salih pandap pakauk, ngak xăng ja kayua Phan Thanh Hữu pan akaok bahrau hu taong tayah, gah Cảnh sát điều tra Công an tỉnh Đồng Nai bahrau cap mek chip Lê Thanh Trung (38 thun, daok di Cần Thơ) lac urang pablei salih hóa đơn ja piah pablei xăng ja dalam chuyên án nan, pataom mek hu 27 baoh tara di dom Cty karei gauk kayua Trung padang tabiak saong pah urang karei dang angan. Dahlau di nan, CA tỉnh hu cap mek 35 urang pambuak tal bruk ngak 200 triệu lít xăng ja.

Ấn Độ hu pabak vắc-xin pacang Covid-19 ka tong abih gah khik ramik siam mekre di Liên hợp quốc, lac jiak 95 ribau urang lin peih ngak 12 bruk praong di dunya. Dahlau di nan, 25 negar di dunya taduan hu vắc-xin ngak di Ấn Độ. 49 negar taduan hu vắc-xin dalam dom harei tal, meng châu Âu, Bắc Mỹ, Mỹ Latinh, Ca-ri-bê tal châu Phi, Đông Nam Á song dom palao Thái Bình Dương.

Liên hợp quốc brei thau lac meda daong chip 15 triệu đôla brei ka Ghi-nê haong Công-gô pacang veik mbang tamuh jit bahrau di jit Ebola. Ini lac mbang camereip abih Ghi-nê hu dom urang ruak saong metai kayua Ebola, urak ini hu takik di abih 3 urang metai. Dom taneh ia jaik taphia nan, lac: Xi-ê-ra Lê-ôn haong Li-bê-ri-a hu ba rahra di drei daok dalam pacang caga biak glaong. Ini jeng lac 3 taneh ia gaok kan kandah khang abih di mbang tamuh jit thun 2013-2016, tapa nan hu labaih 11.300 urang metai.

Dalam panuac khan batabiak mesup ni (18/2), Facebook brei thau, jalan ngak di drei brei pacang cakak dom asal kadha khaw tin pagam tal Australia song oh brei urang pandar di Australia puac khaw tin dalam negar song dunya. Ni lac bruk cagar veik di Facebook anak bruk Quốc hội Australia caga brei tapa hukum ieu Google song Facebook bayar jien ka dom jabat harak mbao Australia. Facebook ndom lac hukum ni lac bruk sahneng oh njauk ka talei pambuak bruk di jalan ngak ni song dom jabat harak mbao, gah klah rahba khaw tin./.

Urang lang: M. Phương – Hani Pha – 18/02 10:25:24