Di Long An, dom jabat chức năng di tỉnh pambuak bruk song ban raya HCM brei adat ka chuyên gia, po doanh nghiệp, urang ngak hu klauk vaccine bloh,  hu nao mai dalam harei di 2 tỉnh ban ini. Urak ni, tỉnh ni dok batabiak dom jalan ngak piah khik takai, dui pachreih urang ngak mai ngak bruk veik. Tui bruk batabiak, meng harei 15-10, tỉnh Long An hu klauk  2 mbang vaccine ka tong abih urang ngak song yam tame tukvak pasiam veik bruk ngak.

Sở Y tế tỉnh Bình Dương hu harak tacei pato, brei thau dom kadha piah peih ngak veik di doanh nghiệp, labik ngak pandap, pablei salih. Iek tui bruk jit ruak COVID-19, dom puk palei dalam tỉnh Bình Dương anak meta hu parabha tui dom bhum jit tễ. Daok dom doanh nghiệp di bhum hijao meda dut iek yaok adit 2 mbang brei ka takik abih lac 20% dom urang ngak. Doanh nghiệp hu eng drei peih bruk dut iek meng test samar kháng nguyên, eng drei brei harak lac dut iek blaoh piah brei ka urang ngak pan harak nan nao jalan.

Harei ni 5-10, Kiên Giang tui kuhria taduan hu  urang meng dom tỉnh mai palei, rilo meng lac uang kamei metain, urang taha, uranaih, urang ruak tabiak sang iek oh ka hu nao palei …Tui kuhria, mbang ni hu labaih 500 urang lac dom urang oh daok dalam nyaom  F1, F2, oh dok dalam labik njauk pacang veik song tapa dut iek mboh lac âm tính song virus SARS-CoV-2 dalam 72 tuk.

Công an TP.HCM hu peih bruk ngak căn cước công dân pagam “chip” ka rahra dalam ban raya hadei di sa tukvak brei padeih kayua jit COVID-19. Mbang ini, TP.HCM ngak căn cước công dân ka taong abih rahra thường trú, tạm trú hu ginup harak gar piah ngak bahrau, ngak veik saong oh daok pacang meneing menuac ngak, kuhria gam dom menuac daok pandar căn cước công dân mã vạch khin salaih tapa căn cước công dân pagam “chip”.  Rahra tuk nao tal dom labik ngak căn cước công dân brei pasang tabiak mã QR brei thau bruk nao mai dalam ban saong hu harak klauk vaccine atau harak lac F0 hu taong ruak bloh dalam 180 harei.

Dom urang halan hatain taduan panuac khan dong ka bruk iek glang song an sinh xã hội ka bhap bini di ban raya.HCM tapa Tổng đài 1022  padeih ngak bruk meng di kreih melam 4/10. Dalam 2 bilan ngak bruk meng bloh, dom urang halan hatain taduan hu labaih 100.000 mbang ieu, cih vak ginup khaw tin pagam tal hatai khin dong di jiak  78.000 mbang. Dalam nan hu jiak 10.000 mbang ieu ka bruk iek glang y tế samar song langyah dalam bruk pacang caga COVID-19, labaih 13.000 mbang ieu ka bruk dong pandap panda song labaih 55.000 mbang ieu ka bruk dong jien ndo, dong ka urang oh hu labik dok song dom bruk karei karei. Urak ni, ban raya HCM dok dak harei dak siam tagok, pacadu bruk paatah di gauk, dom mbang ieu tal Mạng lưới urang halan hatain trun daok takik. Gam song nan hu labaih 300 giảng viên, sinh viên meng sang bac Đại học Quốc gia ban raya HCM hu mbaok tame ngak urang halan hatain  ka mạng lưới ni jeng dok yam tame thun bac bahrau.

Harei 4-10, Hội đồng Nobel di Viện Karolinska di ban ine Stockholm - negar Thụy Điển brei thau giải Nobel Y học thun 2021 laik tame tangin 2 urang ilamu Mỹ lac David Julius haong Ardem Patapoutian “kayua dom roh duah di dom urang nan ka jalan mboh thau pandiak, la-an haong xúc giác di anek menuac”. Ủy ban Nobel ndom lac: “Bruk thau hu pandiak, la-an haong xúc giác di kol drei lac bruk brei hu piah diuk, jeng lac jalan ka bruk pambuak gauk haong dom bruk vil val drei”. Roh duah ini hu taong yaom lac ba tabiak dom prein khang y học kandauk dalam biak chreih, kayua nyu ngak brei hadah jalan patrun pandik suai lavik saong pandik drah samar pambuak tal dom ruak, saong jalan pasiam nyu. Dom giải thưởng Nobel 2021 karei karei hu khan brei thau dalam adit ini.

Brei panuac peih Mbang nyaom Liên Hợp Quốc ka bruk pablei salih song patagok  Ba-ba-đốt (Barbados) harei kabroi, Tổng thư ký Liên Hợp Quốc Antonio Guterres khan lac,bruk tavak sre oh hu pasang iek di dom taneh ia mbuan si kan kathaot  jeng lac "to klauk tapak tame pasak patagok kinh tế dunya" meng jit prong Covid-19. Ong An-tô-ni-ô Guê-tê-rết jeng ndom tal bruk   oh samu gauk tuk dom taneh ia kaya meda, hu mesraiy phun jien yaom laba bier piah patagok kinh tế, dalam tuk dom taneh ia duah hu jien takik song mbiah  daok glaih glar haong bruk  KT dok njauk kan kandah kayua jit Covid-19.

Piah caga bruk lac dom menuac ruak Covid-19 tagok rilo hadei di tuk pacadu dom jalan pasang iek jit ruak, Australia bahrau brei blei pabak jru sotrovimab piah taong ruak ka dom menuac njauk ruak Covid-19. Sotrovimab lac jru taong ruak hu taong yaom lac daong patrun patakik menuac tame sang iek ruak, patrun patakik menuac metai kayua Covid-19 di dom urang njauk ruak Covid-19 hanjul oh suak yava meng oxy atau dom menuac mbuan gaok dom ruak trak karei./.

Urang lang: H.Pha & M.Phuong - 05/10/2021