Klau thun ini mai, ong Phạm văn Miên blei radaih ôtô điện piah pajeng tuai rivang ma-in kaoh pulao Bé, duah jien tame tani tanat. Ong Miên khan lac, dalm xã hu labaih 10 urang ngak bruk pajeng tuai meng radaih điện: “Meng kan ngak nông, urak ini hu  dulich ye salih tapa ngak bruk ini. Bruk ngak ini takik glaih glar jang dahlau diah.”

Dom urang nao tasik, urang ngak nong yau ong Miên tame ngak dulich dak harei dak rilo. Likei ye peih radaih taxi, radaih kuan pajeng tuai. Urang kumei pablei salih dom kaya ikan ia tasik. Dom bruk ngak meng kan yau ngak ia mesin, ikan thu, ahar bilik hala gai …urak ini jeng hu pasiam veik, duah hu jien tame. Amuk Ngô Thị Lành pablei  lasun di xã An Hải brei thau, dulich cak rok ba mai bruk ngak saong duah hu jien tame ka urang kumei di kaoh pulao ini. Amuk Lành yaih lac, yaok harei, muk duah hu yaok rituh riabu đồng meng bruk pablei lasun, toi: “ Du lich patagok, tuai damuai tame tabiak, yaok harei duah hu meng 50 tal 100 ribau đồng”

  Thun 2017, huyện kaoh pulao Lý Sơn taduan jaik 210.000 mbang tuia mai rivang, tagok labaih 47 mbang saong jien dauh hu meng dịch vụ, du lich tagok labaih 3 mbang dut saong thun 2010. Tuai rilo ba tui dom bruk karei yau labik daok, mbang huak, rivang main tagok khang. Dom janih main di tasik yau canô, vah gghe gilai, iek san hô, vah ikan…pachreih hu rilo tuai damuai. Sa-ai Nguyễn Thị Hoài Thu, sa urang tuai daok di Hà Nội biak bui sambai chreih chrai tuk hu mai rivang Lý Sơn:“ Dahlak mboh  pak ini biak mekre yau daok tamo. Pak ini daok hu bruk njuk ia tasik, iek san hô, vah ikan…Ngan saong dom dam dara takre thaok binguk ye labik ini lac biak gheih.”

Ong Nguyễn Viết Vy, Bí thư Huyện ủy Lý Sơn, tỉnh Quảng Ngãi brei thau: Du lịch, dịch vụ jeng sa bruk kinh tế praong ba tal bruk rami ramik veik jalan ngak kinh tế, menuac ngak di palei, daong patagok jien mek tame, paglaong raidiuk bhap bini angaok kaoh pulao. Pluh dom thun dahlau, huyện đảo ini tok hu dua labik brei pah ka tuai ndih veik, tal urak ini, hu labaih 110 khách sạn, sang papah ka tuai padeih padei ngan saong 650 duk bilik. Mikva pak ini khang hatai buih jientame ngak dom bruk dulich homestay; pablei pandap mbang menyum. Ong Nguyễn Viết Vy daok brei thau lac, rilo danak dak hu buh jien tame padang ngak di kaoh pulao Lý Sơn piah daong cak rok bruk ngak mbang kinh tế, xã hội di bhum palei ini:“Khol dahlak tui bruk quy hoạch huyện Lý Sơn birau hu UB bhap bini tỉnh mbaok tangin. Dalam tuk pachreih urang buh jien tame ngak mbang, dom danak dak halei lagiah meng brei ngak, oh lac bruk halei jeng pachreih ngak, plaih ngak khut dom inem krung jeng yau ngak tayak tyayaic bruk cak rok patagok karei.”

Ông Đặng Ngọc Dũng, Phó Chủ tịch Ủy ban nhân dân tỉnh Quảng Ngãi brei thau, bruk ngak hồ sơ  poktagok UNESCO likau brei Lý Sơn lac Công viên địa chất di dunya meda peih tabiak sa jalan birau ka gah du lich, dich vụ, yam tagok padang ngak Lý Sơn jeng pasak du lịch rivang main tasik, pulao di bhum kreh negar. Anak dom bruk lagaih birau, yaok urang di kaoh pulao Lý Sơn njaukba gauk padang ngak ka nyu siam jang,  ngak brei tuai damuai, ayut jaik atah kanal hadar: “ Khol drei anit palei negar oh lac meng panuac ndem bo meng bruk ngak mboh di meta. Khol drei njauk padang ngak ka anek taco rai hadei mboh hadah mbaok meta lac anek di pulao kaoh Lý Sơn, raidiuk kaya meda, siam mekre pak di pualo Lý Sơn. Anak tal, meyah Lý Sơn hu UNESCO brei angan lac Công viên địa chất di dunya ye jein duah tame, jalan ngak kaya meda di urang Lý Sơn meda tagok jang 10 mbang.”

Dalam jalan cak rok patagok tal thun 2025, tỉnh Quảng Ngãi pataom tame padang ngak pulao kaoh Lý Sơn jeng đô thị tasik hijao, hacih, mekre, patagok kinh tế pambuak saong khik ramik thiên nhiên, khik caga an ninh quốc phòng, khik kajap bruk ngak po di tasik./.