Kapul urang kumei palei ba tangin tame padang ngak dom jalan hẽm hacih

Mayah tok maong tame dom baoh sang praong, siam daok rah tui jalan hẻm 24 (di ấp 3, xã Hiệp Phước, H.Nhà Bè, TP.HCM) urak ini ye oh thei sahneng mboh lac dom thun dahlau dieh tok lac dom ar pacang pambuak tui jalan sit, uranaih bhian jangan takai labuh trun hamu, khan aw gluh baok yaok harei nao tal sang bac; jeng oh thei thau, ula, ding, jamaok daok gam haong bhap bini di labik bak ia hadei di yaok mbang ia tagok. Tukvak nan, ia piah papah khan aw, rao pandap panda njauk nao naong mek meng kraong tame, daok ia piah manyum, piah ngak mbang ye njauk ghe tal Phú Xuân blei mai.

Thun 2015, tuk mbaik tatua Kênh Lộ (nduac tapa kraong Rạch Giồng, H.Nhà Bè) hu padang ngak, bruk tuh bê tông hẻm 24 meng hu peih ngak. Thei jeng caong hu jalan siam mekre piah nao mai, min sa jalan praong 6m nduac tapa ngak lahik rilo taneh riya lac sa bruk karei. Rah tui jalan hẽm hu 28 baoh sang, min tuk camriep tok hu 3 baoh sang alin brei taneh. Kayua yau nan ye, dahlak njauk nao tal yaok baoh sang, mek bruk anek saih labuh tame gluh, mbaok meta bak gluh baok gilam radaih juak nao tal sang bac… piah pachreih ba bhap bini. Bruk nan thei jeng mboh, dalam nan hu anek kamuan di drei. “Mayah drei damen taneh ye harei hadei anek kamuan di drei oh hadah tagok hu”- dahlak hu ndem biak rilo mbang panuac nan haong bhap bini. Piah jak ba, drei ndem saoh oh ginup nan ye dahlak halain hatain ba akaok nao dahlau. Taneh di sang dahlak atah labaih 100m, dalam tuk jalan mbang tame kreh, nan ye, abih tih mblang taneh alin ngak jalan lac labaih 600m². Min yau nan jeng ka oh pachreih hu mikva chip. Dahlak brei mek bruk di urang ini piah ndem haong urang dieh, blaoh ieu dom urang alin taneh nao jak ba dom urang karei. Abih jaik 5 bilan, taong abih 28 baoh sang meng njauk hatai pachrieh tui. Tuk nan, dahlak daok nao jak ba mikva rik prein tame ngak jalan. Jalan hẻm hu ngak salah hadei di 3 thun.

Tuk camriep dahlak jang yau mikva tok caong oh daok haduh hatai ka bruk ula, ding, điện ia tame tal sang tuk hu jalan bahrau praong siam ini. Min, dahlak oh sahneng tal bruk jalan hu ba mai dom salih bahrau praong jang biak rilo dut saong dom hagait kol dahlak saneng tal. Raidiuk pak ini samar salih bahrau tuk bhap bini hu jalan salih bruk ngak mbang, cak rok patagok kinh tế. Dom danao raong hadang, dom cửa hàng pablei salih tạp hóa, dom tiệm pasiam radaih hu tamuh tagok salih ka bruk ngak mbang duah jien glaih glar oh tani tanat dahlau daih. Raidiuk di bhap bini jeng dak harei dak tani tanat saong kaya mada jang.

Meng harei hu jalan hẽm praong, Kapul urang kumei palei ba tangin tame padang ngak dom jalan hẽm hacih. Thun 2020, hẻm 24 hu padang ngak jeng “jalan hẻm eng drei khik caga alam môi trường” kayua dom urang di kapul dalam hẻm eng drei khik ramik. Langiu di bruk caik dom thung hariek kiểu mẫu, khik tani tanat bruk tuh hariek njauk maong ye sang halei jeng pala bingu piah gam ngak brei mekre sang drei, gam ngak brei ghieh puk palei./.

Urang lang: Thu Thao – 09/05