Huỳnh Quang Khải prong tagok dalam sa baoh sang kan kandah. Meng sit Khải tok daok haong amaik saong bhian rah tapa dom harei bilan glaih glar piah duah mbang. Dom thun bac pakat 2, mong mboh dom amaik ame raok anek anak pabah mbang sang bac, Khải haok aia meta.

Thun 2009, Khải saong dom ayut peih tal bac anit ranam haong hatai caong khin palahik bruk oh thau akhar haroh ka dom adei sit nao pablei vé số, dhul ve chai daok jaik sang. Yaok melam mai, palei sit labik sang Khải daok di quận 12 hadah gom jeng lac tuk tal bac peih pato. Tuk camereip, tal bac tok hu dom adei. Min hadei ini, dom adei jak dom ayut sahabat hu rai diuk kan kandah mai bac nan ye tal bac dak harei dak rilo jang.

Yaom lac oh hu bac gah pato pakai min Khải tuk halei jeng kham merat, duah jalan pato tacei ka nyu mbuan thau di abih, jaik taphia di abih piah ka dom adei chreih bac saong thau hu samar jang. Tal thun 2015, ayut sahabat saong Khải thei jeng jan van nan ye tal bac brei kreik pabah mbang.

 Hadar veik dom harei bilan nan, Khải khan lac: “Dom adei sit, mai sang drei bac njauk lang ciew, tapuk siphau caik angaok pha kayua lac oh hu papan, oh hu bàn. Labik daok bac oh laghaih, hu tuk hajan thaik tame. Min mong mboh dom adei biak takre bac, drei mboh bui hatung sambai hatai”.  

Thun 2017 Khải salih tapa bruk taduan mek tour du lịch tự do piah hu rilo tukvak jang saong peih gilac veik tal bac. Thun 2018 Khải tok hadiuk. Tal bac tuk nan hu jaik 60 adei nan ye Khải kuhria padang ngak labik bac ka nyu praong jang piah ka dom adei hu labik bac da-a siam mekre. Dua diuk pasang jak ba hu labaih 60 triệu đồng min jien buh tabiak ngak tagok tal 100 triệu đồng. Diuk pasang Khải brei pablei abih ameh pariak amaik ame brei piah pabak tame. Hu amaik saong diuk tuk halei jeng pachreih tui, Khải hu jang pren khang. Tuk Khải jan van, diuk Khải lac manuac daong pato.

Khải khan lac: “Bhian di nyu dom adei nao ngak mai ye nduac tapak tame sang gru piah bac. Hu rilo adei oh ka mbang huak hagait atau mbang takik nan ye lapa hatian. Tuk nan dom adei mbang mì atau amaik di Khải lac urang dang tabiak tahanek lisei brei ka dom adei huak. Maong dom uranaih bui sambai chreih chai mbang menyum haong gauk, drei mboh biak bui sambai dalam hatai”.  

Urak ini, anek saih di tal bac ini lac dom adei umo mangaok 8 thun, sang oh hu jien padai piah brei nao bac di sang bac”. Tal bac peih tabiak meng mon 6 - 45 minit tal mon 9 melam di dom melam meng melam Som tal melam Suk yaok adit, kayua lac tuk harei, dom adei sit daok nao ngak piah duah jien diuk tapa harei. Dua môn bac chính nan lac Toán saong sap Yuan. Jalan daok pamaong tal tuk camereip di Khải nan lac daong ka dom adei thau bac, thau vak saong thau ngak toán piah hadei ini tabiak ngak mbang daong hu ka rup drei, duh ka bruk duah mbang yaok harei. Langiu di bac akhar haroh di tal bac, sa-ai bhian pambuak haong dom bruk nao ma-in di langiu, gam bac gam ma-in piah ka dom adei chreih takre bac da-a.

Langiu di bruk ngak gah du lịch, Khải daok hu peih dom sạp pablei bánh mì. Ka sa lac piah duah jien tame pabak ka bruk pato bac, ka dua lac Khải caong khin pato veik ka dom adei sit thau bruk ngak, piah harei hadei raong rup hu.

Rilo adei anek saih di tal bac hadei di ini tabiak langiu hu bruk ngak tani tanat. Hu urang jeng po cửa hàng pasiam veik điện thoại, urang ngak po gara pasiam veik radaih ôtô… Yaom lac yau nan, Quang Khải oh ka tuk halei caong khin drei hu rilo jang anek saih saong jeng oh caong mong drei peih ngak bruk ini miat miat. Kayua lac dalam hatai sa-ai tuk halei jeng caong khin, dom adei sit meda oh daok thei rambah rambup glaih glar, oh daok urang halei bo akhar haroh oh hu mong iek tapa./.